Կառավարությունն առաջարկում է «1000 դրամների» հիմնադրամն ազատել պետական տուրքերից և հարկերից

 Ազգային ժողովն առաջին ընթերցմամբ սկսել է քննարկել «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» («1000 դրամների» պայմանական անվանումն ստացած) և կից ներկայացված օրենքների նախագծերի փաթեթում լրացված նախագծերը: Հիմնական զեկուցող, ՀՀ պաշտպանության նախարար Վիգեն Սարգսյանը նշեց, որ օրենսդրական նա խաձեռնությունը լրացվել է «ՀՀ բյուջետային համակարգի մասին», «Դատական ակտերի հարկադիր կատարման մասին», «Եկամտային հարկի մասին», «Հարկերի մասին»,  «Հիմնադրամների մասին», «Շահութահարկի մասին», «Պետական տուրքի մասին, «Անձնական տվյալների պաշտպանության մասին» և «Սնանկության մասին» ՀՀ օրենքներում փոփոխություններ և լրացումներ կատարելու մասին օրենքների նախագծերով: «Ներկայացված օրենքների նախագծերի ընդունման անհրաժեշտությունը պայմանավորված է «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» ՀՀ օրենքի նախագծի ընդունման պարագայում օրենքի ամբողջական կիրառման ապահովմամբ: Առաջին ընթերցմամբ օրենքի նախագծի քննարկումները հանգեցրել են նրան, որ մենք որոշում ենք կայացրել որոշ փոփոխություններ իրականացնել»,- «Արմենպրես»-ի հաղորդմամբ՝ նշեց Վիգեն Սարգսյանը:

Նախարարը մանրամասնեց, որ «Բյուջետային համակարգի մասին» ՀՀ օրենքում փոփոխություն կատարելու նախագծով  առաջարկվում է որպես պետական բյուջեի հարկային եկամուտների աղբյուր ներառել նաև դրոշմանիշային վճարները: «Դատական ակտերի հարկադիր կատարման մասին» ՀՀ օրենքում փոփոխություն կատարելու մասին օրենքի նախագծով սահմանվում է, որ հատուցման հիմնադրամի միջոցների վրա չի կարող տարածվել բռնագանձում, կիրառվել արգելանք կամ որևէ այլ սահմանափակում որևէ պահանջով՝ բացառությամբ կյանքին կամ առողջությանը հասցված վնասներից, ինչպես նաև աշխատ ավարձի ու դրան հավասարեցված միջոցներից բխող պահանջների, վարկային փոխառության պայմանագրերով հիմնադրամի կողմից թողարկված արժեթղթերով պարտավորությունների, ինչպես նաև շահառուների պահանջների: «Եկամտային հարկի մասին» օրենքում լրացում կատարելու մասին օրենքի նախագծով առաջարկվում է որպես եկամտային հարկից նվազեցվող եկամուտ համարել նաև շահառուների կողմից վճարվող հատուցման գումարները: «Հարկերի մասին» ՀՀ օրենքում լրացում կատարելու օրենքի նախագծով առաջարկվում է որպես պետական հարկի տեսակ ներառել նաև դրոշմանիշային վճարը: «Հիմնադրամների մասին» ՀՀ օրենքում լրացում կատարելու մասին օրենքի նախագծով սահմանվում է, որ զինծառայողների կյանքին կամ առողջությանը պատճառված վնասների հատուցման հիմնադրամի իրավական կարգավիճակի, հիմնադրման, կառավարման մարմինների, կանոնադրության, հիմնադրամի և վերջինիս կառավարման մարմինների  իրավունքների և պարտականությունների, հիմնադրամի լուծարման, հիմնադրամի միջոցների առանձնահատկությունները սահմանվում են «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցմա ն մասին» ՀՀ օրենքով:

«Շահութահարկի մասին» ՀՀ օրենքում լրացում կատարելու մասին օրենքի նախագծով սահմանվում է, որ զինծառայողների հատուցման հիմնադրամը շահութահարկ չի վճարելու: «Պետական տուրքի մասին» ՀՀ օրենքում լրացում կատարելու մասին օրենքի նախագծով սահմանվում է, որ հատուցման հիմնադրամն ազատվում է բոլոր տեսակի պետական տուրքի վճարումից: «Անձնական տվյալների պաշտպանության մասին» ՀՀ օրենքում լրացում կատարելու մասին օրենքի նախագծով սահմանվում է, որ հատուցման հիմնադրամի կողմից հատուցման հիմնադրամի շահառուների անձնական տվյալների հրապարակ ումը չի համարվում օրենքով նախատեսված անձնական տվյալների հրապարակում: «Սնանկության մասին» ՀՀ օրենքում լրացում կատարելու մասին օրենքի նախագծով սահմանվում է, որ հատուցման հիմնադրամը չի կարող հանդես գալ որպես օրենքով սահմանված սնանկության վարույթի պարտապան:

Վիգեն Սարգսյանն ընդգծեց, որ նախագծերի փաթեթի ընդունումը կապահովի «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասի հատուցման մասին» ՀՀ օրենքի կիրառումն ու օրենսդրական կարգավորումների ամբողջականությունը: