Զինծառայողների հատուցման նախագիծը երկրորդ ընթերցմամբ ԱԺ-ի քննարկմանը ներկայացվեց պարտադիր բաղադրիչով

Ազգային ժողովը երկրորդ ընթերցմամբ քննարկում է «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» և կից ներկայացված օրենքի նախագծերի փաթեթը: Հիմնական զեկուցող, ՀՀ պաշտպանության նախարար Վիգեն Սարգսյանը նշեց, որ օրենսդրական նախաձեռնության վերաբերյալ պատգամավորներն արել են մի շարք դիտողություններ և որոշ դրույթների հ ետ կապված իրենց մտահոգությունն են հայտնել, որոնց վերաբերյալ պարզաբանումներ տրվել են դեռևս օրենսդրական նախաձեռնության առաջին ընթերցմամբ քննարկման ժամանակ: «Այնուամենայնիվ, մենք մեկ անգամ ևս անդրադարձել ենք գրավոր ներկայացված բոլոր առաջարկներին, որի արդյունքում դրանց մի մասն ընդունվել է, իսկ մյուսները չեն ընդունվել համապատասխան պատճառաբանություններով»,- «Արմենպրես»-ի հաղորդմամբ՝ նշեց Վիգեն Սարգսյանը:

Նախարարը հավելեց, որ քննարկումներ է անցկացրել նաև հասարակության ամենալայն շերտի ներկայացուցիչների հետ՝ հասկանալու համար իրենց դիրքորոշումները, մոտեցումները և առաջարկները ներկայացված նախագծերի վերաբերյալ: «Ներկայացված առաջարկները հիմնականում վերաբերվում են օրենքի հետադարձ ուժի, պրոգրեսիվ վճարման սկզբունքի կիրառման, ինչպես նաև վճարման ենթակա գումարներն այլ աղբյուրներից հավաքագրելու գաղափարին»,- ասաց Սարգսյանը:

Անդրադառնալով օրենքին հետադարձ ուժ տալու առաջարկներին՝ նախարարն ասաց, որ օրենքի նախագծի նպատակն է ներդնել ապահովագրական համակարգ, որը պետք է ուժի մեջ մտնի օրենքի ուժի մեջ մտնելուց հետո ծագած հարաբերությունների վրա, իսկ մինչ օրենքի ուժի մեջ մտնելը տեղի ունեցած դեպքերի համար հատուցումը կարող է իրականացվել բացառապես օգնության կարգով՝ կապված հիմնադրամի ֆինանսական միջոցների հետ:

Պրոգրեսիվ վճարման սկզբունքի վերաբերյալ արված առաջարկների հետ կապված նախարարը նկատեց, որ օրենքի նախագծի համաձայն՝ դրոշմանիշային վճարն անձանց կողմից Հայաստանի Հանրապետության պետական բյուջե վճարվող պարտադիր վճար է, և անձի կողմից աշխատավարձի միջոցով ստացված եկամտի չափի հետ չպետք  է առնչություն ունենա:

Վիգեն Սարգսյանը հավելեց, որ նախատեսվող վճարման ենթակա գումարներն այլ աղբյուրներից հավաքագրելու գաղափարն առաջ քաշելուց առաջ անհրաժեշտ է հաշվի առնել այն հանգամանքը, որ խոսքը գնում է ՀՀ պետական բյուջե վճարվող պարտադիր վճարի միջոցով ապահովագրական համակարգ ներդնելու մասին և այդ առումով բոլոր հնարավոր այլ աղբյուրները կարող են ունենալ միայն լրացուցիչ օժանդակ աջակցություն:

Նա պատգամավորներին ևս մեկ անգամ վստահեցրեց, որ օրենքի նախագծի ընդունման արդյունքում կներդրվի զինծառայողների կյանքին և առողջությանը պատճառված վնասների հատուցման, հասարակության վստահությունը վայելող պարզ, թափանցիկ և արդյունավետ համակարգ, ինչի արդյունքում միանվագ վճարվող ապահովագրական գումարների չափերը ներկայումս տրամադրվող գումարների չափերի համեմատությամբ կբարձրանան բազմապատիկ անգամ: Նախարարի խոսքով՝ սա իր հերթին խթան կհանդիսանա ռիսկային պայմաններում ծառայող զինծառայողների բարոյահոգեբանական վիճակի բարձրացման համար:

ՀՀ պաշտպանության նախարարն անդրադարձավ նաև օրենքի նախագիծը կամավոր սկզբունքով ընդունելու առաջարկներին և այդ թեմայի շուրջ քննարկումներին: «Այդ քննարկումների արդյունքում անընդհատ որպես օրինակ բերվում էր «Մարտիկ» հիմնադրամը, որը իր գործունեությամբ, կարծես թե,  այնպես է ստվերել այս գաղափարը, որ անհնար է այլևս մարդկանց համոզել դրա արդյունավետության մեջ և պետք է կամավոր իրականացվի: Ես բոլոր առկա բաց աղբյուրներում մանրամասն ուսումնասիրել եմ «Մարտիկ» հիմնադրամի հրապարակած հաշվետվությունները: Պետք է ասեմ, որ «Մարտիկ&raqu o; հիմնադրամի պարագայում պատկերը բավականին մտահոգիչ է, որովհետև երկար տարիների գործունեության ընթացքում հիմնադրամի նվիրատուների թիվը որևէ տարում չի գերազանցել 7 հազարը: Նվիրատուների գերակշիռ մեծամասնությունը եղել են զինծառայողներ և նրանց ընտանիքի անդամներ: Բոլոր տարիների ընթացքում հավաքագրված գումարները կազմել են 1 միլիոն 200 հազար դոլար: Բոլոր այդ գումարներն անձեռնմխելի են և դրված են բանկերում՝ հիմնադրամի հաշիվներին, որևէ կոպեկ այդ մայր գումարից չի ծախսվել: Հիմնադրամից որոշակի աջակցություն է տրվել սոցիալական խնդիրներ ունեցող զինծառայողների ընտանիքներին: Ես սա հնչեցնում եմ՝ ցույց տալու համար, որ միշտ չէ, որ ակնհայտ թվացող լուծումն ամենաարդյունավետն է: Մենք ընտրել ենք այս մոտեցումը, երբ, կարևորելով այս գաղափարը, առանձին տողով հնարավորություն ենք ստեղծել  յուրաքանչյուր քաղաքացու համար, որ ապրիլյան պատերազմի օրերին դրսևորած կամքին տրվի իրավական և  կազմակերպված լուծում»,- եզրափակեց նախարարը՝ ընդգծելով, որ խոսքը գնում է բացառապես մարտական գործողությունների մեջ ներգրավված զինծառայողների հատուցմանը: