Ընդդիմությունն ապահովում է իշխանությունների օրինական վերարտադրությունը

Մեր հյուրն է քաղաքագետ Ստեփան Դանիելյանը.

– Երեկ պաշտոնապես հայտարարվեց ընդդիմադիր առաջին դաշինքի ձևավորման մասին: Ըստ Ձեզ, ընդհանուր առմամբ, ընդդիմադիր հատվածն այսօր ի՞նչ շանսեր ունի: Ի՞նչ վիճակում է:

– Ճիշտն ասած, ես չեմ հավատում Հայաստանում ազատ և արդար ընտրությունների հնարավորությանը: Իսկ երբ ընտրությունների ինստիտուտը չի գործում, ոչ իշխանական ուժերի մասնակցությունն ընտրություններին ինձ համար անհասկանալի է: Եթե խնդիրը որոշ քանակությամբ մանդատ ստանալն է, ինչն իշխանության ծրագրերի մեջ է մտնում, քանի որ ֆորմալ առումով Ազգային ժողովում պետք է ընդդիմություն լինի, ապա դա մի խոսակցություն է: Բայց թե այդ մի քանի մանդատ ունենալը մեր հանրային խնդիրների հետ ի՞նչ կապ ունի, ես չգիտեմ:

– Բայց ՀՀԿ վերջին համագումարում նախագահը հայտարարեց, որ իրենք հանձնառու են ազատ, արդար ընտրություններ կազմակերպել:

– Ես հավատում եմ Սերժ Սարգսյանին, բայց հարցը հետևյալն է` արդար ո՞ւմ համար: Եթե արդար է ՀՀԿ–ի համար, դա մի խոսակցություն է, եթե արդար է հանրության համար՝ այլ խոսակցություն է: Երկու տարի առաջ ՀՀԿ–ի գործադիր մարմնի փակ ժողովից հետո Էդ. Շարմազանովը հանդես եկավ պաշտոնական հայտարարությամբ, ըստ որի` առաջիկա առնվազն 10 տարում իշխանության համար պայքարն ընթանալու է ՀՀԿ–ում, և ով ուզում է մուտք գործել իշխանություն, ապա այդ դուռը գտնվում է Մելիք–Ադամյան փողոցում: Դա, ըստ էության, հայտարարություն է իշխանության բռնազավթման մասին: Իրեն ընդդիմադիր համարող կուսակցություններից ոչ ոք այդ հայտարարության առնչությամբ քաղաքական հարց չի բարձրացրել, դատական հայց չի ներկայացրել:

– Վերջերս ԱՄՆ դեսպանատունը հայտարարեց, որ պատրաստ է ֆինանսավորել ԸՕ–ով նախատեսվող ընտրական նոր մեխանիզմների ներդրումը: Եվ մեծ ուշադրությամբ հետևելու է, որպեսզի ընտրությունները կազմակերպվեն ազատ և արդար, օրենքի տառին համաձայն: Սա չի՞ կարող իշխանությունների համար զգաստացնող, սթափեցնող ազդակ լինել:

– Խնդիրը հետևյալն է` փոխվել է Սահմանադրությունը, փոխվել է ԸՕ–ն, ընդունվել է ամենաթողության մասին օրենք, որը կոչվում է «Կուսակցությունների մասին» օրենք, շուտով փոփոխվելու է ԱԺ Կանոնակարգը: Այդ համալիրն ապահովելու է, որպեսզի օրինական և արդար ընտրություններ լինեն` ըստ Սերժ Սարգսյանի: Այսինքն՝ խախտումները լինեն այնպիսին, որպեսզի չստվերեն ընտրությունների օրինականությունը, բայց իշխանությունը չփոխվի: Դրա հնարավորությունը նրանք ունեն, որովհետև արդեգրել են այնպիսի մեխանիզմներ, որ իշխանության փոփոխությունը համարյա անհնարին լինի: Ու այդ ընտրություններից հետո կդիմեն ԱՄՆ–ին և Արևմուտքին, որպեսզի վարկեր ստանան: Եվ այս ամբողջ գործընթացում կարևոր դեր ունեն ոչ իշխանական կուսակցությունները` գործընթացն օրինականացնելու տեսանկյունից:

– Ու դաշինքներն էլ ձևավորվում են այդ տրամաբանությունից ելնելո՞վ:

– Բա ուրիշ ի՞նչ հարց են լուծում: Այս 20 և ավելի տարիների ընթացքում ընդդիմությունը ուրիշ ի՞նչ հարց է լուծել:

– Դե, ըստ իրենց, փորձում են ավելի լավ Հայաստան կառուցել, փոխել երկիրը:

– Իսկ նրանց նախընտրական ծրագրերում նման վերլուծություն, երկիր փոխելու ճանապարհային քարտեզ, փիլիսոփայություն, տնտեսական ծրագրեր, վիճակի պատճառների իրական գնահատում ներկայացրե՞լ են, բացի ընդհանուր ձևակերպումներից` կոռուպցիա և այլ նման բառեր օգտագործելով: Խնդիրն ավելի լուրջ է և ավելի լուրջ վերլուծություն է պահանջում, որից հետո հնարավոր կլինի դուրս գալու ելքեր գտնել: Այնինչ՝ ամենը պոպուլիստական բառեր են, պոպուլիստական ծրագրեր:

Արփի Սահակյան