Հակոբ Սանասարյան. «Բնապահպանության նախարարության և «Լիդիան Արմենիայի» միջև կնքված հուշագիրը անհեթեթություն է»

Դեկտեմբերի 12–ին Բնապահպանության նախարարության և «Լիդիան Արմենիա» ընկերության միջև ստորագրվեց փոխըմբռնման մի հուշագիր «Ջերմուկ ազգային պարկի» ստեղծման նպատակով: «Ջերմուկ ազգային պարկի» ծրագրում ընկերությունը հինգ տարիների ընթացքում իրականացնելու է 5,7 միլիոն դոլարի ներդրում: Ըստ բնապահպանության նախարարության կայքի՝ ծրագիրը բազմակողմ է՝ միտված կենսաբազմազանության պահպանմանը, էկոտուրիզմի զարգացման և էկոգյուղատնտեսական ծրագրեր ներդնելու միջոցով՝ «Ջերմուկ ազգային պարկի» կայուն զարգացման ապահովմանը:

 

«Հայաստանի կանաչների միության» նախագահ Հակոբ Սանասարյանը բավական վրդովված է Բնապահպանության նախարարության կողմից նման հուշագրի ստորագրումից:

 

 

– «Լիդիան Արմենիան» մի ընկերություն է, որը պատրաստվում է Հայաստանում իրականացնել Ամուլսարի հանքավայրի շահագործումը, ինչն ըստ բնապահպանների՝ բնապահպանական աղետ կլինի մեր երկրի համար: Ի՞նչ կարծիք ունեք նման համագործակցությունների վերաբերյալ:

 

– Առաջին հերթին դա ծիծաղելի է: Նրանք այդ ամենը անում են շատ խորամանկորեն ու ծրագրավորված: Տեսեք, թե ինչպիսի բառեր են օգտագործում նրանք՝ պատասխանատու հանքարդյունաբերություն, պատասխանատու վերաբերմունք, կայուն զարգացում և ցավալի է, որ Բնապահպանության նախարարությունը նրանց թակարդն է ընկնել: Ի՞նչ է նշանակում պատասխանատու հանքարդյունաբերություն, երբ Հայաստանում ընդհանրապես գնում է բնության ոչնչացում և պետական ունեցվածքի կողոպուտ: Մյուս կողմից՝ ընկերությունը թող հրաժարվի Հայաստանի ավերման ծրագրից, քանի որ այդ «Լիդիանը» միայն այդ մի ծրագրով և՛ Որոտան գետն է շարքից հանելու, և՛ Արփա գետը: Եվ ընդհանրապես Ամուլսարին հարող տարածքները հետագայում կդառնան թույն սփռող ամայի տարածքներ: Նրանք հայտարարում են, որ 5,6 միլիոն դրամի ներդրում են կատարելու, բայց պետք չէ զարմանալ, եթե պարզվի, որ այդ ներդրում կոչվածը թղթի վրա է մնացել կամ էլ կատարվել է փողերի լվացում:

 

 

– Մի՞թե Բնապահպանության նախարարությունը չի հասկանում այդ ամենը:

 

– Ես բնապահպանության նախարարին համարում են բանիմաց անձնավորություն, բայց ընդհանրապես Բնապահպանության նախարարությունը մինչև հիմա կանգնած է եղել Հայաստանի բնության ավերման, Հայաստանի բնական պաշարների կողոպուտի թիկունքում: Թե ինչպես իրեն կդրսևորի նորանշանակ նախարարը, պարզ կդառնա ամիսներ անց:

 

– Լիդիանի մոտ 6 միլիոն դոլարի հասնող ներդրումները, էկոտուրիզմի զարգացման վերաբերյալ խոստումները արդյոք կարո՞ղ են փոխհատուցել Ամուլսարի հանքավայրի շահագործումից առաջացած ռիսկերը:

 

– Դա ընդհանրապես համեմատելու բան չէ: Էդ միլիոնները թող վերցնեն ու իրենց գլխով տան: Ամուլսարի հանքավայրի շահագործումից սպասվելիք կորուստները հարյուրավոր, հեռահար ծրագրում գուցեև հազարավոր միլիարդ դոլարների են հասնելու: Պատկերացրեք, որ միայն Որոտան և Արփա գետերի տարեկան հոսքը մոտավորապես 1 միլիարդ 300 միլիոն խմ է, և դա աղտոտվելու է ծանր մետաղներով: Սրան պետք է ավելացնել այգիների, վարելահողերի, արոտավայրերի, աղբյուրների, ջրագոյացման ու ջրահեռացման համակարգերի թունավորումն ու վերացումը: Ընկերության հետ ստորագրված հուշագիրը հայհոյանք է, որն ուղղված է հայոց պետությանն ու մեզ: Ուրեմն գալիս են ծանր մետաղներով հողն ու ջուրը աղտոտեն, բնակավայրերի հարևանությամբ ցիանիդով վերամշակվող արտադրություն են կառուցում, թափոններն էլ լցնում են մեր գետերն ու կիրճերը, և հետո ասում են՝ մենք հիմք ենք դնելու էկոլոգիապես մաքուր գյուղատնտեսությանը: Եվ սա էլ մեր պետական պաշտոնյաները համարում են աջակցություն–ներդրում:

 

Նաև պետք է նկատի ունենալ այն, որ նշված փոխըմբռնման հուշագրով նախատեսված 5,7 մլն դոլար ներդրումը իրացնելու է բնապահպանության նախարարությունը, երբ այսօր քննարկման առարկա է նույն բնապահպանության նախարարության կողմից Ամուլսարի հանքավայրին տված փորձագիտական դրական եզրակացության օրինականության հարցը...

 

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ

Կիսվել