«Ժառանգություն» և «Համախմբում»` ընդդիմադիր հատվածի երկրո՞րդ դաշինքը

Մեր հյուրն է «Ժառանգություն» կուսակցության փոխնախագահ Արմեն Մարտիրոսյանը

– «Ժառանգությունը» ներքին համաձայնության եկե՞լ է, թե ինչ ձևաչափով է մասնակցելու առաջիկա ընտրություններին:

– Ներքին համաձայնություն, իհարկե, կա: Եթե հնարավոր է ստեղծել այնպիսի միավորում, որը կարող է իշխանափոխության հայտ ներկայացնել, մենք այդպիսի միավորման մասնակից կլինենք: Իհարկե, իշխանափոխությունը պետք է լինի առաջին քայլը, որովհետև հիմնական նպատակը Հայաստանի ինքնիշխանության վերականգնումը և երկրում արմատական բարեփոխումներ իրականացնելն են: Այսինքն, եթե հնարավոր լինի ստեղծել նմանատիպ միավորում, որը կձևավորի ուժային կենտրոն, մենք մաս կկազմենք, եթե ոչ, «Ժառանգությունը» ընտրություններին կմասնակցի միայնակ:

– Փաստորեն առանցքը, որի շուրջ «Ժառանգությունը» պատրաստ է դաշինք ձևավորել, իշխանափոխությո՞ւնն է:

– Առանցքը Հայաստանի ինքնիշխանության վերականգնումը և արմատական բարեփոխումներ իրականացնելն է:

– Վերջերս ԼՀ, ՔՊ և «Հանրապետություն» կուսակցություններից ձևավորված դաշինքը հայտարարեց, որ իրենք միավորվում են գաղափարական հենքի շուրջ: Փաստորեն, Դուք այս պահին գաղափարական հենքի խնդիր չեք դնում:

– Ես կարծում եմ ասացի ամենամեծ գաղափարը, որ այսօր կարող է Հայաստանում լինել: Ի՞նչ է` դա գաղափար չէ: Ինչ վերաբերում է Ձեր նշած դաշինքում ընդգրկված կուսակցությունների ծրագրային ուղղվածությանն ու գաղափարախոսությանը, ապա դրանք իրար բացարձակ նման չեն: ՔՊ–ն ոչ ոքի կողմնակից է: Արամ Զ. Սարգսյանի «Հանրապետությունը» չակերտավոր պրոարևմտյան է, իսկ Էդմոն Մարուքյանն էլ ասում է եվրոպական տիպի պետություն, բայց չի ասում` գնանք դեպի Եվրամիություն և այլն: Այսինքն, արտաքին տարբեր կողմնորոշումներ ունեն, իսկ ներքաղաքական ուղղվածության առումով երևի թե լիբերալ արժեքների կրողներ են: Հաստատ չեմ կարող ասել: Ուստի գաղափարական հենք ասածն այս դեպքում մի փոքր հարաբերական է:

– Իսկ այս պահին «Ժառանգությունը» քաղաքական քննարկումներ անցկացնո՞ւմ է և ո՞ր ուժերի հետ:

– Թե որ ուժերի հետ, չեմ կարող ասել, բայց հանդիպումներ լինում են:

– «Համախմբում» կուսակցության ղեկավար Վարդան Օսկանյանը հայտարարել է, որ հանդիպել է Րաֆֆի Հովհաննիսյանի հետ` քաղաքական քննարկումների նպատակով: «Համախմբման» հետ դաշինքը որքանո՞վ է հավանական:

– Նորից եմ կրկնում` այս պահին որևէ մեկնաբանություն, անուններ և քննարկումների բովանդակություն չեմ կարող բացահայտել, մինչև մեզ համար ամեն ինչ հստակ չլինի:

Արփի Սահակյան