Իտալական հրամանատարությունն ակնկալում է Լիբանանում հայ խաղաղապահների թիվը ավելացնել և հասցնել 100-ի

МЕЖДУНАРОДНОЕ 20 Декабрь, 2016 18:38

Բազմաթիվ մեդալներ, անթիվ շնորհակալագրեր, այլ պարգևներ ու երախտիքի խոսքեր. ՀՀ ԶՈՒ խաղաղապահ բրիգադի հրամանատար, գեներալ-մայոր Արթուր Սիմոնյանը հպարտությամբ է ներկայացնում հայ խաղաղապահների ձեռքբերումներն ու պատմում հաջողությունների մասին: Հայ խաղաղապահներն իրենց առաքելությունն իրականացնելու ժամանակ միշտ աչքի են ընկել պատրաստվածության բարձր մակարդակով: Եվ դա պատահական չէ: Ինչպես Արթուր Սիմոնյանն ընդգծեց, դա ամենօրյա, ամենժամյա աշխատանքի արդյունք է:

«Բավական մեծ թվով զորավարժությունների ենք մասնակցել ՆԱՏՕ-ի ծրագրով, տարեկան մեկ, երկու անգամ մասնակցել ենք մեր Զինված ուժերի պատրաստության ծրագրով անցկացված զորավարժությունների, ինչպես նաև մեր մասնակցությունն ենք ապահովել ՀԱՊԿ-ի շրջանակում կազմակերպված վարժանքներին»,-ասաց Արթուր Սիմոնյանը:

Խաղաղապահ բրիգադն ուշադրության կենտրոնում է պահում վերապատրաստման տարբեր դասընթացները, կարևորում փորձի փոխանակումը` շփվելով առաջատար զինված ուժերի ներկայացուցիչների հետ: Արթուր Սիմոնյանը նկատեց, որ հայկական զինված ուժերի ղեկավարությունը խաղաղապահներին դիտարկում է այն օղակը, որով միջազգային փորձը ներմուծվում է հայկական բանակ:

Հայ խաղաղապահների հաջողություններից Արթուր Սիմոնյանն առանձնացրեց տարբեր տեսակի վերապատրաստում-քննություններին գրանցված առաջընթացը: 2007 թվականին 1-ին մակարդակի ինքնագնահատում է ստացել մեկ վաշտը, այնուհետև 2008 թվականին վաշտը ստացել է համագործակցելի գնահատական, 2009 թվականին կատարվել է առաջին հրաձգային գումարտակի ինքնագնահատումը: Ստանալով բարձր գնահատական ՆԱՏՕ-ի շտաբի կողմից` հայտ է ներկայացվել գումարտակի 2-րդ աստիճանի գնահատման համար:

«Սրանք բավական լայնածավալ քննություն-զորավարժություններ են, աշխարհի լավագույն բանակ ունեցող երկրներից շատերը վաշտի մակարդակից այն կողմ հայտ չեն ներկայացնում, իսկ մենք 2012 թվականին ինքնագնահատում իրականացրեցինք գումարտակի մակարդակով: 2013 թվականին իրականացվեց հրաձգային գումարտակի գնահատում և տրվեց համագործակցելի գնահատական: Բարձր արդյունքներ գրանցվեցին 2014-ին ու 2015-ին: Մեր զինվորների գործունեությունից մասնագետները հիացած էին, այդ հիացմունքը չէին թաքցնում»,-ասաց Արթուր Սիմոնյանը:

ՀՀ ԶՈՒ խաղաղապահ բրիգադի Ռազմաքաղաքացիական համագործակցության բաժնի պետ փոխգնդապետ Սամվել Սարգսյանը նկատեց, որ հայ խաղաղապահները տարբեր իրավիճակներում կարողանում են արագ կողմնորոշվել:

«Շփվում ենք տարբեր մշակույթներ կրող ժողովուրդների հետ, ծանոթ ենք նրանց մտածելակերպին և այդ ամենը մեզ օգնում է տարբեր տեղերում առաքելությունների ժամանակ ավելի արագ կողմնորոշվել, այսպես կոչված միջանկյալ օղակը հանդիսանալ»,-ասաց նա:

Հայ խաղաղապահներն առաջին առաքելությունը սկսել են իրականացնել 2004 թվականին Կոսովոյի տարածքում` հունական զորախմբի կազմում: Եղել է 32 հոգանոց խումբ: Հաջորդող տարիներին հայ խաղաղապահներն առաքելություն են իրականացրել Իրաքում, Աֆղանստանում, Լիբանանում: Արթուր Սիմոնյանը նշեց, որ իտալական կողմն ակնկալում է Լիբանանում զորախմբի ավելացում: Առաջարկվում է հայ խաղաղապահների թիվը հասցնել մինչև 100 -ի: Արթուր Սիմոնյանը նշեց, որ հայ խաղաղապահների համալրվածությունն այնպիսին է, որ հնարավոր է 4-5 անգամ ավելի մարդ գործուղել:

«Արտասահմանյան բազմաթիվ գործընկերների կողմից երախտիքի խոսեր ենք ստացել: Աֆղանստանի Կունդուզ քաղաքում մեր առաջին զորախումբը հենց եկավ, չպայթած զինամթերք հայտնաբերեց օդանավակայանի տարածքում: Այդ նույն օդանավակայանում մեր զինծառայողները երկու թաքնված աֆղանցի հայտնաբերեցին, որոնք միջազգային հետախուզման մեջ էին: Հետագայում պարզվեց ահաբեկիչներ են: Ուսումնասիրում էին տարածքը, ահաբեկչություն իրականացնելու համար հնարավոր տարբերակներ էին փնտրում»,-պատմեց բրիգադի հրամանատարը: Արթուր Սիմոնյանը ներկայացրեց փոխգնդապետ Աշոտ Զախարյանին` բնորոշելով նրան համեստ սպա, ով Լիբանանում դիտորդական առաքելություն կատարելու ընթացքում կանխել է երկու էթնիկ խմբերի միջև բախումը: Իտալացի գեներալը հիացմունքով է արտահայտվել այդ դեպքի մասին:

Առաջիկայում` հունվարի 9-ին, հայ խաղաղապահների զորախումբ կմեկնի Աֆղանստան: Այն բաղկացած է 65 հոգուց: Հինգ օր առաջ էլ Հայաստան էր վերադարձել Կոսովոյում առաքելություն իրականացրած զորախումբը: