Անհրաժեշտ է միասնական լինել հզոր հայրենիք ունենալու համար. Ամո Շարոյան

 «Միդիա-Շանգալ» եզդիների ազգային միավորում ՀԿ խորհրդի նախագահ Ամո Շարոյանը վստահ է, որ Հայաստանում Ազգային ժողովի առաջիկա ընտրություններին հասարակությունը համաձայնության կգա մի գաղափարի շուրջ: «Բարեկեցիկ և ապահով երկրում ապրելու համար անհրաժեշտ է միասնական լինել: Հավատացած եմ, որ Ազգային ժողովի առաջիկա ընտրություններն անհամեմատ  թեժ ենանցնելու»,-«Արմենպրես»-ի հետ զրույցում նշեց Շարոյանը:

Խորհրդի նախագահի խոսքով` կարևորն առաջիկա ընտրություններում պետության, պետականության, առողջ, մտածողության և մշակույթի ուժը տեսնելն է: «Պետք է այնպիսի մթնոլորտ ստեղծել, որ բացթողումներով հանդերձ ընտրական գործընթացն ավարտվի ձեռքբերումներով»,-ասաց նա:

Ըստ Շարոյանի`երկրի կայունությունը, անվտանգությունը, խաղաղությունը պետք է պահել համերաշխությամբ, միասնությամբ և «աչքի լույսի պես»: Նա մեջբերեց ՀՀ նախագահ Սերժ Սարգսյանի խոսքերը. «Ժամանակն է, որ բոլորս կարևորենք մեր երկրում տնտեսական և քաղաքական բարեփոխումների անհրաժեշտությունը, որոնք ինքնանպատակ չեն և իրականացվում են անվտանգ հայրենիք ունենալու, սեփական հողի վրա հազարամյակներ ապրելու և արարելու նպատակով»: 

Եզդիների ազգային միավորում ՀԿ խորհրդի նախագահն ընդգծեց, որ պետք է ուժեղ լինել, քանի որ այսօրվա աշխարհն օգնում և գնահատում է նրան ով հզոր է, ինքն է իրեն օգնում, մրցունակ է, պատվախնդիր, հավասարակշռված և կանխատեսելի:

Նա կարծում է, որ պետք է լինել սոցիալապես արդար և պատասխանատու` վստահ,  որ հանրության ձայնը լսելի կլինի: «Իդեալական, օրինակելի ընտրություններ գուցե չկարողանանք ապահովել, սակայն անհրաժեշտ է պատրաստ լինել մեր հասարակության ընտրությանը»,-շեշտեց Շարոյանը:

Նա հատկապես կարևորում է ՀՀ Ազգային Ժողովում ազգային փոքրամասնություններին տեղեր հատկացնելը: «Փառք Աստծո այդ խնդրահարույց հարցը լուծվեց և մեր հանրապետության ազգային փոքրամասնություններն իրենց ներկայացուցիչը կունենան մեր ներկայացուցչական մարմնում»,-ասաց  նախագահը:

Շարոյանի խոսքով` վերը նշված իրադարձությունը բարձրացնում է ազգային փոքրամասնությունների պատասխանատվությունը: Նա կրկին մեջբերեց ՀՀ նախագահի խոսքը. «Ես համոզված եմ, որ ցանկացած երկրի ամենամեծ և կարևոր ռեսուրսը մարդն է, որն ուսումնասիրում և արարում է, երազում և ստեղծագործում, պայքարում և աշխարհն ավելի լավը դարձնում»:

ՀԿ նախագահը կարծում է, որ քաղաքական բոլոր ուժերն անկախ դիրքից և գաղափարախոսությունից անկեղծորեն պետք է նվիրվեն Հայաստանի քաղաքացիական ապագայի պայքարին: Ըստ նրա`բոլոր ուժերը` իշխանամետ, ընդդիմադիր, քաղաքացիական շարժումները պետք է պարզ գիտակցեն և աշխուժորեն ձեռնամուխ լինեն երկրի կայունացմանը, հզորացմանը, անվտանգությանը ու բարեկեցությանը:

Շարոյանը համոզված է, որ ՀՀ-ում ստացած դաստիարակությունը, իրենց բարոյական նկարագիրը, հայրենիքի հանդեպ պարտքը, իրենց երբեք չեն շեղի ճիշտ ուղուց` հավերժ և ուժեղ Հայաստան ստեղծելու նպատակից: