Բնապահպանության նախարարությունը քննարկել է էկոկրթության խնդիրների կարգավորման ռազմավարական մոտեցումները

 ՀՀ բնապահպանության նախարարությունը դեկտեմբերի 23-ին  ԵԱՀԿ երևանյան գրասենյակի հետ համատեղ կազմակերպել էր «Էկոլոգիական կրթության և դաստիարակության զարգացման  ռազմավարությունը` Օրհուսի կոնվենցիայի համատեքստում» խորագրով աշխատաժողովը: Աշխատաժողովին մասնակցել են ՀՀ բնապահպանության նախարար Արծվիկ Մինասյանը և ՀՀ կրթության և գիտության նախարարի տեղակալ, ՀՀ ԱԺ պատգամավոր Ռուզաննա Մուրադյանը, ԵԱՀԿ երևանյան գրասենյակի ղեկավար, դեսպան Արգո Ավակովը,  պետական և գիտական հաստատությունների և հասարակական կազմակերպությունների ներկայացուցիչներ, փորձագետներ: Այս մասին «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի բաժնից:

Էկոկրթության համակարգի կատարելագործման  նպատակով  ՀՀ բնապահպանության նախարարությունը  նախաձեռնել է Էկոլոգիական կրթության և դաստիարակության զարգացման ռազմավարության մշակումը, ինչն ընդգրկվել է ՀՀ կառավարության 2017 թ. գործունեության միջոցառումների ծրագրի և գերակա խնդիրների  մեջ: Ռազմավարության շրջանակներում  մշակվելու է ոլորտի կարգավորման նոր մոտեցումներ և մեխանիզմներ:

Իր ողջույնի խոսքում ՀՀ բնապահպանության նախարար Արծվիկ Մինասյանը, կարևորելով էկոկրթության զարգացմանն ուղղված միջոցառումները, որպես բնապահպանական խնդիրների լուծման կարևոր միջոց, շեշտել է դրանց համակարգային մոտեցման առաջնայնությունը: Բնապահպանության նախարարը շեշտել է տարբեր ոլորտների խնդիրներին լէկոհամակարգային լուծումներ տալու անհրաժեշտությունը և այդ գործընթացում կարևորել էկոլոգիական կրթությունը և դաստիարակությունը. որպես բնապահպանական մտածողության և աշխարհայացքի հիմք: 

 ԵԱՀԿ երևանյան գրասենյակի ղեկավար, դեսպան Արգո Ավակովը կարևորել է բնապահպանության ոլորտի, մասնավորապես էկոկրթության զարգացման գործընթացում պետության և քաղաքացիական հասարակության ներկայացուցիչների համարգործակցությունը, ներկայացրել այդ ուղղությամբ իր ղեկավարած գրասենյակի իրականացրած ծավալուն աշխատանքը:

ՀՀ ԱԺ պատգամավոր Ռուզաննա Մուրադյանը իր ելույթում նշել է, որ պետք է հատուկ ուշադրություն դարձվի մատաղ սերնդի դաստիարակությանը: Պատգամավորը իր պատրաստակամությունն է հայտնել համագործակցել բնապահպանական և մասնավորապես էկոկրթական խնդիրների լուծման աշխատանքների շրջանակներում:

ՀՀ Կրթության և գիտության նախարարի տեղակալ Դավիթ Սահակյանն, առաջնային համարելով համագործակցված աշխատանքը, ներկաների ուշադրությունը հրավիրել է, ոչ ֆորմալ կրթության զարգացման խնդիրներին:

 ՀՀ բնապահպանության  նախարարության նախաձեռնած նոր ռազմավարության մշակմամբ, հստակ և ամբողջական կսահմանվեն ոչ միայն նպատակներն ու իրականացվելիք գործողությունները, այլև դրանց կատարողական ցուցանիշները, հաշվետվողականությունը և չափելիությունը` ինչը կնպաստի մշակվող մեխանիզմների կիրառման արդյունավետության բարձրացմանը:

Աշխատաժողովին ոլորտի մասնագետները և հասարակական կազմակերպությունների ներկայացուցիչները ներկայացրել են էկոկրթության ներկա վիճակը, առկա բացերը, նախանշել`  զարգացման հնարավոր մեխանիզմները: Քննարկումների ժամանակ մատուցվել են ոչ ֆորմալ էկոկրթության ոլորտում միջազգային և հասարակական կազմակերպությունների իրականացրած աշխատանքները, հնչել են  ոլորտում առկա խնդիրների համալիր լուծումների առաջարկներ: 

Էկոկրթական խնդիրներին համալիր լուծում տալու նպատակով, նախկին խորհրդային պետություններից առաջինը 2001թ-ին Հայաստանը ընդունել է «Ազգաբնակչության էկոլոգիական կրթության և դաստիարակության մասին» ՀՀ օրենքը:  2009 թվականին ՀՀ կառավարության թիվ 47 արձանագրային որոշմամբ հաստատվել է «Բնապահպանական կրթության, դաստիարակության և իրազեկման ամբողջական և միասնական ազգային համակարգի ստեղծման հայեցակարգը: Մեկ տարի անց հաստատվել է հայեցակարգից բխող միջոցառումների ծրագիրը, որի շրջանակներում կրթության ոլորտի լիազոր մարմնի` կրթության և գ իտության նախարարության հետ իրականցվել են մի շարք միջոցառումներ: ՀՀ կառավարության 2017թ. գործունեության միջոցառումների ծրագրի և գերակա խնդիրների  մեջ ՀՀ բնապահպանության նախարարության նախաձեռնությամբ ընդգրկվել է Էկոլոգիական կրթության և դաստիարկության զարգացման ռազմավարության մշակման հարցը: