Հարցվածների 52.3 %-ը, հաջորդ քաղաքապետ կրկին ցանկանում է տեսնել գործող քաղաքապետ Տարոն Մարգարյանին

«Gallup International Association» կազմակերպության հայաստանյան ներկայացուցչությունը հրապարակել է արդեն 5-րդ տարին անընմեջ անցկացվող «Երևանցիները՝ Երևանի մասին» հետազոտության արդյունքները, որով մայրաքաղաքի բնակիչները գնահատել են 2016 թվականի ընթացքում Երևանում կատարված աշխատանքները։

Հետազոտության շնորհանդեսին ներկա է գտնվել Երևանի քաղաքապետարանի ներկայացուցիչ Արմեն Հարությունյանը: 
«Gallup International Association» կազմակերպության հայաստանյան ներկայացուցչության նախագահ Արամ Նավասարդյանը նշել է, որ, դեկտեմբերի 7-19-ն իրականացված հարցման արդյունքների համաձայն, անցնող մեկ տարում մայրաքաղաքում արձանագրված փոփոխությունները հարցվածների 65%-ը գնահատել է դրական՝ գերազանցելով նախորդ տարվա 57% ցուցանիշը: Հարցվածների 27.0 %-ը փոփոխությունները գնահատել է բացասաբար:
Որպես Երևանի առջև կանգնած ամենակարևոր խնդիր՝ հարցման մասնակից մայրաքաղաքի բնակիչներն առանձնացրել են հասարակական տրանսպորտի հարցը՝ 24.6%, երկրորդ տեղում կոմունալ վարձերի խնդիրն է՝ 10.8%-ով, որից հետո բնապահպանության խնդիրը՝ 9.8 %, մաքրության խնդիրը՝ 8.3%: 
Վերջին մեկ տարվա ընթացքում Երևանի քաղաքապետարանի կողմից իրականացրած դրական փոփոխությունների առաջին տեղում 21.4%-ով բակերի բարեկարգումն է: Քաղաքացիները դրական են գնահատել նաև մայրաքաղաքի արտաքին տեսքի փոփոխությունները՝ 19.5%, կանաչապատ տարածքների ավելացումը՝ 17.1%, խաղահրապարակների կառուցումը՝ 15.6%, այգիների բարեկարգումը՝ 15.5%, աղբահանությունը՝ 15.1%, նստարանների տեղադրումը՝ 15%, ճանապարհաշինություն և փողոցների ասֆալտապատումը՝ 12.4%: Իսկ 20.6%-ի կարծիքով փոփոխություններ չեն իրականացվել: 
Հարցին, թե ինչ ծրագրեր ու ﬕջոցառուﬓեր կցանկանային, որ իրականացվեն Երևանում, բնակիչների 28.6%-ը, չնայած այն հանգամաքին, որ կանաչապատումը դրական փոփոխություններում առաջատար դիրքում է, նշել է կանաչ տարածքների ավելացումը: Մշակութային միջոցառումների անցկացումն ու խաղահրապարակների կառուցումը 2-րդ և 3-րդ տեղերում են՝ 25.1 և 22.3 % հարաբերակցությամբ։ 
Առանձին գնահատվել են նաև քաղաքային տրանսպորտի, մաքրության պահպանման, բնակիչների անվտանգության, կանաչապատման, մշակութային կյանքի և արտաքին լուսավորության բաղադրիչները։
Երևանում զբոսաշրջության զարգացման համար որպես գերակա ուղղություններ երևանցիներն առանձնացրել են հնի և նոր համադրմամբ ծրագրերի իրականացումը: 
«Երևանցիները՝ Երևանի մասին» հետազոտությամբ կանաչապատման, լուսավորության, անվտանգության և մաքրության չափանիշներով գնահատվել է նաև վարչական շրջանների աշխատանքը: 1-5 միավորանոց համակարգով բոլոր վարչական շրջանները յուրաքանչյուր բաղադրիչով ստացել են 3 և ավելի միավոր: 
Բոլոր ուղղություններով վերջին մեկ տարում վարչական շրջաններից յուրաքանչյուրում կատարված փոփոխությունները հարցվածների մեծ մասը՝ 65-90%-ը, գնահատել է դեպի լավը: 
Հաշվի առնելով, որ 2017թ. Երևանի ավագանու ընտրություններն են, «Gallup International Association» կազմակերպության հայաստանյան ներկայացուցչությունը հետաքրքրվել է նաև, թե արդյոք ո՞ւմ կընտրեին երևանցիները որպես քաղաքապետ, եթե ընտրությունները լինեին առաջիկա հանգստյան օրերին: Հարցվածների 52.3 %-ը, հաջորդ քաղաքապետ կրկին ցանկանում է տեսնել գործող քաղաքապետ Տարոն Մարգարյանին, այլ թեկնածուներին՝ 6.5 %-ը: 
Հարցմամբ անդրադարձ է եղել նաև ՀՀ նախագահի հանձնարարականով կայացված որոշմանը, ըստ որի՝ ճանապարհային երթևեկության կանոնների նկատմամբ վերահսկողական համակարգերի (արագաչափեր, տեսախցիկներ) և վճարովի ավտոկայանատեղերի (կարﬕր գծանշաններ) ողջ ֆինանսական հոսքերը պետք է տնօրինվեն համապատասխան պետական և համայնքային կառույցների կողﬕց: Այս առումով՝ հարցված քաղաքացիների 49.8%-ը փոփոխությունը համարել է ավելի շուտ դրական:
Ամփոփելով հարցման արդյունքները՝ Երևանի քաղաքապետարանի ներկայացուցիչ Արմեն Հարությունյանը նկատել է, որ նմանօրինակ հարցումներն ու ոլորտային ուսումնասիրությունները կարևոր են քաղաքապետարանի համար և հնարավորություն են տալիս հետագայում ավելի մեծ ուշադրություն դարձնելու համեմատաբար ցածր ցուցանիշներ արձանագրած ուղղություններին: 
«Հետևելով հետազոտության արդյունքներին՝ կարող ենք ասել, որ տարեցտարի նկատվում է դրական տեղաշարժ, ինչը նշանակում է, որ մեր համաքաղաքացիները կարևորում և գնահատում են Երևանի քաղաքապետարանի կատարած փոփոխությունները: Միևնույն ժամանակ, ուսումնասիրելով հարցման արդյունքները, պետք է նշեմ, որ այն ուղղություններում, որտեղ առայժմ կան որոշակի դժգոհություններ, մասնավորապես, հասարակական տրանսպորտի, արտաքին լուսավորության, այս տարի ձեռնարկվեցին մի շարք ծրագրեր: Մասնավորապես, ժամանակակից տրանսպորտային սպասարկում ունենալու նպատակով միջազգային խորհրդատու կազմակերպության կողմից կատարվում են ուսումնասիրություններ՝ համակարգային փոփոխությունների իրականացման և երթուղային նոր ցանցի ստեղծման համար: 
Ինչ վերաբերում է քաղաքային լուսավորությանը, ապա տեղեկացնեմ, որ 28 փողոցում նախատեսվում է փոխարինել լուսավորության ցանցը՝ նոր «Լեդ» լուսատուներով: Այս ուղղությամբ պիլոտային ծրագրեր իրականացվեցին Իսակովի և Մաշտոցի պողոտաներում: էներգախնայողության հաշվին հնարավոր կլինի շարունակել ծրագիրը: Հավելեմ նաև, որ նոր կառուցվող ճանապարհների ծրագրերում ևս հաշվի է առնվում այս սկզբունքը» ,- նշել է Արմեն Հարությունյանը: 
Անդրադառնալով կանաչ տարածքների ավելացմանը՝ նշվել է, որ դրանք քաղաքապետարանի առաջնային ծրագրերում են: Այս ուղղությամբ աշխատանքներ են տարվում նաև մասնավոր հատվածի հետ: 
Երևանում զբոսաշրջության զարգացման մասով՝ Արմեն Հարությանը մանրամասնել է, որ այս տարի հատուկ ուշադրություն է դարձվել ձմեռային զբոսաշրջությանը և առաջիկա Ամանորի տոներին կգործեն ինչպես համայնքային ենթակայության երեք թանգարանները, այնպես էլ կաշխատեն սննդի և ժամանցի մի շարք կենտրոններ:

Երևանի քաղաքապետարանի տեղեկատվության 
և հասարակայնության հետ կապերի վարչություն