ՀՀ-ում գործող ցիկլոնի ուժը կթուլանա, սակայն ամսի 31-ին հնարավոր է նոր ցիկլոնի ներթափանցում

ОБЩЕСТВО 26 Декабрь, 2016 14:58

Հայաստանի տարածքը այս պահին շարունակում է գտնվել Միջերկրական ծովից ներթափանցած ցիկլոնի ազդեցության գոտում, որն իր հետ բերել է ջերմաստիճանի բարձրացում եւ տեղումներ:

ՀՀ ԱԻՆ «Հիդրոմետ» ծառայության օդերեւութաբանության կենտրոնի պետի տեղակալ Գագիկ Սուրենյանը մեզ հետ զրույցում հայտնեց, որ նախորդ օրերի հետ համեմատ օդի ջերմաստիճանը Հայաստանում արդեն բարձրացել է 10-15 աստիճանով:

«Այսօր գիշերը Արարատյան դաշտում գրանցվել է ընդամենը -6...-7 աստիճան ցուրտ՝ նախորդ օրերի -20...-22-ի փոխարեն: Հանրապետության ողջ տարածքում ձյուն է տեղացել. հատկապես առատ տեղումներ են գրանցվել Ջերմուկի հատվածում եւ Արարատյան դաշտում»,- մանրամասնեց Սուրենյանը:

Օդերեւութաբանը ընդգծեց, որ այսօր ամբողջ օրը ցիկլոնի ազդեցությունը կպահպանվի, իսկ վաղվանից սկսած ազդեցությունը կթուլանա:

«Ամպամածությունը կթուլանա եւ հիմնական տեղումները կդադարեն, բայց չի բացառվում, որ առանձին հատվածներում թույլ ձյունը շարունակվի: Ինչ վերաբերում է օդի ջերմաստիճանին՝ առաջիկա 5 օրերին այն էապես չի փոխվի: Ջերմաստիճանի նվազում չենք կանխատեսում, քանի որ եւ տաք օդային հոսանքները եւ ամպամածությունը պահպանվելու են»,- ասաց Գագիկ Սուրենյանը:

«Հիդրոօդերևութաբանության և մթնոլորտային երևույթների վրա ակտիվ ներգործության ծառայություն» ՊՈԱԿ-ի տնօրեն Լեւոն Վարդանյանն այսօր ԱԻՆ-ում ամենշաբաթյա խորհրդակցության ժամանակ ներկայացնելով առաջիկա օրերի եղանակի կանխատեսումը՝ հայտնել է, որ դեկտեմբերի 31-ից նոր ցիկլոն է ներթափանցում հանրապետության տարածք, կանխատեսվում է առատ ձյուն, սակայն ջերմաստիճանի նվազում չի սպասվում:

Գագիկ Սուրենյանին խնդրեցինք մանրամասնել, թե ներթափանցող նոր ցիկլոնն ինչ ազդեցություն կունենա Հայաստանի եղանակի վրա եւ արդյո՞ք Երեւանում եւս Ամանորի առաջին օրերին տեղումներ են սպասվում:

Ի պատասխան Սուրենյանն ասաց, որ ցիկլոնը, որի մասին խոսել է Վարդանյանը՝ դեռ հստակ չի երեւում, ուստի դժվար է այսօր խոսել դրա ազդեցության մասին.

«Երբ օրը մոտենա, կերեւա, մենք համոզված կլինենք, կհայտարարենք: Հիմա դեռ համոզված չենք՝ կգա՞ ցիկլոն, թե՞ ոչ: Այս պահին նաեւ դժվար է խոսել դեկտեմբերի 31-ին եւ հունվարի 1-ին տեղումների հավանականության մասին»,- նշեց նա:

(Գագիկ Սուրենյանի լուսանկարը՝ Ներսես Մատինյանի)