Նարեկ Հախնազարյանը հնարավոր է համերգով հանդես գա նաև Հայաստանում

 Աշխարհում մեծ համբավ ունեցող թավջութակահար Նարեկ Հախնազարյանը, ով բազմաթիվ մրցանակների դափնեկիր է, հաջորդ տարի հնարավոր է համերգով հանդես գա նաև հայ հանդիսատեսի առաջ: Չայկովսկու անվան XIV միջազզային մրցույթի դափնեկիրն իր անցած ուղու և ապագա ծրագրերի մասին դեկտեմբերի 27-ին զրուցեց լրագրողների հետ: «Ճանապարհիս բազմաթիվ խոչընդոտնեÖ € եմ հաղթահարել: Վերջին տարիներին հովանավոր էի փնտրում, ով կօգներ ինձ լավ գործիք ձեռք բերել: Ծանր է, երբ ցանկանում ես երաժշտական որևէ ստեղծագործություն կատարել, սակայն ունեցածդ թավջութակն այդ հնարավորությունը չի տալիս»,-«Արմենպրես»-ի հաղորդմամբ` նշեց թավջութակահարը և հավելեց, որ այժմ ունի համապատասխան գործիքը և հաջորդ տարի պատրաստվում է համերգներով հանդես գալ  արտասահմանում, գուցե նաև Հայաստանում:

Նոյեմբերի վերջին Կանադայում երաժշտին հանձնվել է Ջուզեպպե Գվարներիի 1707թ-ի պատմական գործիքը, որով նա հիմա ելույթ է ունենում։ «Իմ  կյանքում դա չափազանց մեծ իրադարձություն էր. նման գործիք ստանալը երազանք է յուրաքանչյուր երաժշտի համար: Այն ունի հարուստ պատմություն: Այս թավջութակով նվագել է լեգենդար Յանուշ Տարկերը, որը 20-րդ դարի լավագույն երաժիշտներից էր»,-ասաց Նարեկը:

Գործիքը Նարեկին է հանձնել նրա չինացի երկրպագուն, որի հետ Նարեկը մտերմացել է: «Պայմանագիր ենք ստորագրել երեք տարվա համար, սակայն այն հնարավոր է երկարաձգել»,-ընդգծեց Հախնազարյանը:

Երաժշտի խոսքով` ինքը միշտ ցանկացել է նվագել Մանուել Պոնսեի «էստրելիտա» ստեղծագործությունը, սակայն իր նախկին գործիքով լիարժեք կատարել չի ստացվել: «Այն դանդաղ, փոքր գործ է, որը ոսկերչական տեխնիկա է պահանջում:  Ստեղծագործությունը կատարելիս իսկապես հուզվել եմ»,-շեշտեց Նարեկը:

Անդրադառնալով նախորդ տարվա միջոցառումներին` Հախնազարյանը  նշեց, որ հատկապես տպավորվել է Բուքինգհեմյան պալատում անցկացրած համերգով, որտեղ ներկա է եղել նաև արքայազն Չարլզը, իսկ ինքը նվագել է Մարինյան թատրոնի նվագախմբի հետ: «Հիանալի էր նաև համագործակցությունը  հանրահայտ սերբ ռեժիսոր Էմիր Կուստուրիցայի հետ: Նրա հրավերով Սերբիայում էի: Համերգ ունեցանք, որից հետո ռեժիսորն ինձ առաջարկեց կատարել իր վերջին ֆիլմի երաժշտությունը, որը հատուկ թավջութակի համար գրեց նրա որդին»,-ասաց երաժիշտը:

Նարեկը խոսեց նաև ապագա ծրագրերի մասին: «Հունվարին մեկնելու եմ Ամստերդամ և համերգային ծրագրով հանդես գալու տեղի հայտնի  դահլիճներից մեկում, այնուհետև համերգով կներկայանամ նաև  Բեռլին «Concert hall»-ում: Երևանում հաջորդ տարի նույնպես հանդես կգամ համերգով, սակայն հստակ չեմ կարող ասել, թե երբ»,-ընդգծեց երաժիշտը:

Նարեկ Հախնազարյանը երաժշտական կրթությունը ստացել է պրոֆեսոր Զարեհ Սարգսյանի թավջութակի դասարանում։ 2006 թվականին Նարեկը ավարտել է Մոսկվայի կոնսերվատորիային կից երաժշտական քոլեջը և ընդունվել Մոսկվայի Կոնսերվատորիա։ Շրջագայություններով հանդես է եկել աշխարհի տարբեր երկրներում՝ ԱՄՆ, Գերմանիա, Մեծ Բրիտանիա, Ֆրանսիա։ «Վաշինգթոն փոսթ» թերթը նրան անվանել է «ֆենոմենալ թավջութակահար»: ԱՄՆ-ի Փասադենա քաղաքի սիմֆոնիկ նվագախմբի մենակատարն է։