Ճեպազրույց` շարունակվող ձնամաքրման վերաբերյալ

Բացօթյա ճեպազրույցի ժամանակ մայրաքաղաքի վարչական շրջաններում շարունակվող ձնամաքրման ընթացքն են ներկայացրել Երևանի քաղաքապետարանի կոմունալ տնտեսության վարչության պետ Հրայր Անտոնյանն ու «Սանիթեք» ընկերության գործառնական տնօրեն Արգիշտի Տիգրանյանը: 

Անդրադառնալով ձնամաքրման գործընթացին՝ Հրայր Անտոնյանը նշել է, որ «Սանիթեքն» ու մայրաքաղաքի վարչական շրջանների կոմունալ ծառայությունները որպես կանոն ձնամաքրումն սկսում են տեղումներն սկսվելուն պես և աշխատանքը շարունակում անգամ չդադարող ձյան պայմաններում: Այսպիսի պայմաններում աշխարհի շատ երկրներում աշխատանքները դադարեցվում են` նկատի ունենալով դրանց նվազ արդյունավետությունը, սակայն Երևանում ձնամաքրումը շարունակվում է՝ քաղաքացիներին հասցվող հնարավոր անհարմարությունը նվազագույնի հասցնելու համար: Ըստ այդմ, նախ մաքրվում են գլխավոր փողոցները, կենսապահովման ոլորտի ու կրթական հաստատությունների ճանապարհները, որից հետո հատուկ տեխնիկան ու մարդիկ տեղափոխվում են մայթեր, միջբակային տարածքներ ու բակեր: Այդ գործընթացին ներգրավվում են նաև համատիրությունների աշխատակիցները:
«Սանիթեք» ընկերության գործառնական տնօրեն Արգիշտի Տիգրանյանն իր հերթին վստահեցրել է, որ թեև գործընթացը շարունակվում է չդադարող ձյան պայմաններում, պարզապես պետք է առանձին դեպքերում ըմբռնումով մոտենալ և վստահ լինել, որ տեղումների դադարից հետո արդյունքը մի քանի անգամ ավելի ակնառու կլինի: Ներկայում փողոցների ձնամաքրումն իրականացվում է շուրջ 150 միավոր մեքենասարքավորումներով: Ընկերության գործառնական տնօրենը նաև հորդորել է քաղաքացիներին դժգոհությունները, կարծիքներն ու առաջարկները ներկայացնել «Սանիթեքի» ֆեյսբուքյան էջով կամ զանգահարել թեժ գծի 80-90 հեռախոսահամարին:
Ճեպազրույցին մասնակցող ՃՈ 1-ին սպայական գումարտակի հրամանատարի տեղակալ Հայկազ Մաթևոսյանը, անդրադառնալով վարորդների կողմից անվտանգության կանոնների պահպանմանը, նրանց ու հատկապես սկսնակներին կոչ է արել խստորեն հետևել երթևեկության կանոններին և ձեռնպահ մնալ մեքենա վարելուց, եթե չկա դրա խիստ անհրաժեշտությունը: Ճանապարհային ոստիկանության ներկայացուցիչը նաև հորդորել է հատկապես մառախուղի ժամանակ փոխադրամիջոցները վարել ավտոմեքենայի լուսարձակները միացրած, զերծ մնալ ղեկին կտրուկ գործողություններից:

Երևանի քաղաքապետարանի տեղեկատվության

և հասարակայնության հետ կապերի վարչություն