«Անձնական կյանքի համար հիմա ժամանակ էլ չունեմ. ես ամբողջովին տրվել եմ իմ աշխատանքին». Շուշան Երիցյան

Past.am-ը զրուցել է դերասանուհի Շուշան Երիցյանի հետ:

- Ինչպե՞ս ստացվեց, որ մոդել Շուշան Երիցյանն սկսեց նկարահանվել հեռուստասերիալներում:

- Ես Հայաստանում մոդելինգով շատ քիչ եմ զբաղվել, այսինքն, մի քանի տարի առաջ ուղղակի մասնակցել եմ մի քանի գեղեցկության մրցույթների, Հայաստանն եմ ներկայացրել որպես Միսս Հայաստան և մի քանի անգամ էլ այստեղ բեմ եմ դուրս եկել ինձ հարազատ շոուդիզայներների համար: Իսկ ինչ վերաբերում է նկարահանումներին որպես դերասանուհի՝ նախ ասեմ, որ ես իմ հիմնական մասնագիտությունը թողեցի դերասանությամբ զբաղվելու համար ու արդեն երևի թե 3 տարի է՝ նկարահանվում եմ տարբեր սերիալներում:  

Այժմ նաև կրթություն եմ ստանում, որ ամեն ինչ լիարժեք լինի: Ուսումից հետո հեռուստադիտողին արդեն կներկայանամ այլ ժանրում, այլ կերպարով և, բնականաբար, որակական այլ մակարդակով:

 - Այժմ որևէ տեղ նկարահանվու՞մ եք սովորելուն զուգահեռ:

- Այժմ նկարահանվում եմ ֆիլմում, ուղղակի չեմ կարող փակագծերը բացել: Կարծում եմ՝ շուտով կվերջացնենք նկարահանումները: Ֆիլմը, կարծում եմ, մարտի 10-ին, եթերում կլինի: 

- Անձնական կյանքը դժվար չէ՞ արդյոք համատեղել դերասանի մասնագիտության հետ:

- Ճիշտն ասած ինձ մոտ հիմա գերակշռում է միայն, այսպես ասած, իմ մասնագիտական կյանքը: Անձնական կյանքի համար, կարելի է ասել, հիմա ժամանակ էլ չունեմ. ես ամբողջովին տրվել եմ իմ աշխատանքին:

- Բացի նոր ֆիլմի պրեմիերայից՝  ապագայում ի՞նչ սպասենք Ձեզնից: Որտե՞ղ կարող է հանդիսատեսը գտնել Ձեզ, եթե փնտրում է:

- Այժմ նկարահանվում եմ այնպիսի ժանրի ֆիլմում, որտեղ երբեք չեմ նկարահանվել, սրանից հետո արդեն կա ևս մեկ պայմանավորվածություն՝ հումորային ժանրում նկարահանվելու համար, սակայն այստեղ էլ չեմ կարող փակագծերը բացել:

Մի խոսքով, մարտից բազմաթիվ նորություններ կլինեն ու մեկը մյուսին հաջորդող պրոեկտներ, և հանդիսատեսը տևական ժամանակ կկարողանա ինձ տեսնել էկրաններին:

Մարիամ Նալբանդյան