«Եթե սիրահարված ես, արդեն ՆԱ «իդեալական» է». Իննա Խոջամիրյան

Exclusive

Past.am-ի զրուցակիցն է հոգեբան, դերասանուհի Իննա Խոջամիրյանը, ում հեռուստադիտողը ճանաչում է տարբեր հեռուստասերիալներից:

- Ինչպես գիտենք, մասնագիտությամբ հոգեբան եք: Ինչպե՞ս ստացվեց, որ սկսեցիք դերասանությամբ զբաղվել:

- Կյանքում գրեթե բոլոր լավ իրադարձություններն անսպասելի ու հանպատրաստից են լինում: Չգիտեմ, ճիշտ կլինի՞ ասել ընդամենը, թե արդեն, բայց 4-րդ տարին է լրանում այն օրից, երբ «Շանթ» ՀԸ-ից Էմիլիան կապ հաստատեց ինձ հետ ու քասթինգի հրավիրեց: Ամեն ինչ սկիզբ առավ հաջորդ օրվանից իսկ:

- Ձեր մասնագիտությամբ երբևիցե աշխատե՞լ եք և արդյոք հոգեբա՞ն եք Ձեզ շրջապատողների համար:

- Հոգեբանությունն իմ տարերքն է: Երբ հոգեբան եմ, այլ աշխարհում եմ, իսկ երբ դերասան եմ՝ մեկ այլ, լրիվ ուրիշ աշխարհ եմ ընկնում: Բայց այդ երկու աշխարհները համասեռ են, միահյուսված, երկուսով էլ տարված եմ հավասարաչափ: Իմ մասնագիտությամբ աշխատելու փոքրիկ փորձ ունեմ, բայց լիասիրտ կսկսեմ աշխատել, երբ համապատասխան որակավորում ստանամ. առայժմ շեշտը սովորելու և վերապատրաստվելու վրա է: Ինձ շրջապատողների համար աշխատում եմ ո՛չ դերասան լինել, ո՛չ հոգեբան, ո՛չ ուսանող, ո՛չ էլ այլ սոցիալական ստատուս ունեցող մեկը. մարդ-մարդ շփումն ամենագեղեցիկն է:

- Դերասանական կրթություն չունենալու պատճառով երբևէ որևէ խնդրի բախվե՞լ եք նկարահանումների ժամանակ:

- Շատ հաճախ եմ մտածել, թե ինչ կլիներ, եթե առհասարակ կրթություն չստանայինք որևէ բուհում: Միևնույնն է, սովորում ենք մենք, մոտիվացիան մերն է միայն, ձգտում ենք մենք, մենք ենք առավելապես մեր վրա աշխատում. պետական կրթական կառույցը խթան է միայն: Եկել եմ այն եզրահանգման, որ եթե անգամ մասնագիտություն չունես կամ, եթե ունես նույնիսկ, ոչինչ չի խանգարում նույն ուժով (գրեթե) հաջողություն գրանցել մեկ այլ ոլորտում:

Նկարահանման հրապարակում շատ խնդիրների եմ բախվել, բայց բոլոր խնդիրները լուծելի են, երբ անդադար աշխատում ես ինքդ քո վրա՝ դա լինի աշխատանք՝ տեսական գիտելիքի տեսանկյունից, թե պրակտիկ, անկախ քեզնից սկսում ես ամեն ինչ ավելի գրագետ մատուցել:

- Ձեր կերպարները հիմնականում դրական, բարի, ինչ-որ տեղ փխրուն, բայց միևնույն ժամանակ շատ համարձակ են: Իրական կյանքում ինչպիսի՞ն եք:

- Եթե հիմա նշեմ, որ կերպարներս իմ տեսակին մոտ են եղել ու ինձ նման՝ կստացվի գովաբանում եմ ինձ, ու ես էլ բարի, փխրուն, համարձակ անձնավորություն եմ: Իրական կյանքում սովորական մարդ եմ՝ բոլոր շարքային առավելություններով և թերություններով:

- Մինչ այժմ խաղացած կերպարներից կա՞ մեկը, որ առանձնահատուկ է եղել Ձեզ համար:

- Միանշանակ բոլոր կերպարներս առանձնահատուկ են եղել՝ իրենց բնորոշ յուրահատուկ հատկանիշներով, սովորություններով, աուրայով, կերպարային կուլմինացիաներով, ամեն, ամեն ինչով:

- Հասցրել եք նաև հայրենասիրական ֆիլմում խաղալ: Ի՞նչ է Ձեզ համար հայրենիքը:

- Հայրենիքը մեր բանակն է, ազատությունը, հավատն ու կրոնը, արժանապատվությունը: Սերը դեպի հայրենիքը քաղաքակիրթ մարդու առաջին արժանիքն է:

- Դուք միշտ տարբերվում եք Ձեր ոճով: Կա՞ ինչ-որ մեկը, ով ոգեշնչում է Ձեզ:

- Նորաձևությունն, առհասարակ, արտաքին գրավչությունն ընդգծելու միջոց է, որը սերտորեն կապված է ներաշխարհի ու հույզերի հետ: Մենք ոճային ու գեղեցիկ ենք, երբ ամեն ինչ կարգին է, և բարձիթողի տեսք ունենք, երբ հուզական անկում կա կամ որևէ այլ խնդիր: Այնուամենայնիվ պարբերաբար հետևում եմ նորաձևությանն ու տեղեկացված եմ գրեթե բոլորից:

- Դեռևս երիտասարդ, բայց արդեն հայտնի և միաժամանակ գեղեցիկ. կարելի է կարծել, որ շատերի համար ցանկալի հարսնացու կլինեք: Ձեր սիրտը դեռ ազա՞տ է:

- Կարելի է կարծել))  Անձնականիցս առհասարակ չեմ սիրում խոսել: 

- Ինչպիսի՞ն պետք է լինի ՆԱ:

- Ինչպիսին էլ լինի, եթե սիրահարված ես, արդեն ՆԱ «իդեալական» է:

- Եվ վերջում, սիրահարների տոնին ընդառաջ՝ Ձեր հոգեբանական խորհուրդը սիրահարված հայ աղջիկներին:

- Խորհուրդ տալն ամենասխալ բանն է: Առավել ևս, եթե այն պետք է սիրահարված աղջիկներին տրվի: Ովքեր սիրահարված են՝ անխոս երջանիկ են. ի՞նչ խորհուրդ տաս երջանիկ մարդկանց:

Պատրաստեց՝ Շուշան Գրիգորյանը