Life.panorama.am-ը գրում է.
Հայ աղջիկների թուլ տված ամենատարածված հակաթրենդների, նորաձեւության ընկալումների ու ազգային ոճի մասին Life.panorama.am-ը զրուցել է Մարիաննա Քաբաբյանի հետ, ով Հայաստանում եզակի բլոգերներից է, որ նորաձեւության մասին է գրում: Ի դեպ, Մարիաննան հանդիսանում է «Armenian Brands» նախագծի ղեկավարը:
-Մարիաննա, վերջին տարիներին նորաձեւությանը հայ աղջիկներն ու կանայք սկսել են ավելի շատ հետեւել, ի՞նչ կարծիքի եք
-Կարծում եմ, դարեր ի վեր հայ կինը սիրել է լինել խնամված ու կոկիկ՝ մշտապես ընդգծելով իր կանացիությունը: Այսօր էլ Հայաստանում կանայք չեն դադարում հետևել իրենց, շպարվել ու հարդարվել, սիրում են հետեւել նորաձևության միտումներին ու կիրառել դրանք առօրյայում: Ցավոք, խնդիրները, որոնք հայ կանանց հաճախ ստիպում են համարել գերխնամված, հնարավոր չէ լուծել մեկ օրում. խոսքս գնում է գեղեցիկի ընկալման, հարմարավետության ձգտման բացակայության եւ որեւէ մեկի համար չհագնվելու մասին: Այստեղ առաջ են գալիս ավելի շատ հոգեբանական խնդիրներ: Իսկ հոգեբանորեն հասուն կինը, վստահ եղեք, կգտնի իր սեփական ոճը և կցանկանա կրել միայն այն հագուստը, որն ընդգծում է իր առավելություններն ու թաքցնում է թերությունները:
- Հաճախ կարելի է դուրս գալ փողոց ու տպավորություն լինի, թե ամեն քայլափոխի միմյանց նման աղջիկներ են քայլում: Ինչի՞ հետ եք կապում այդ միտումը:
-Հայ աղջիկներից շատերը ոճի առումով համարձակ չեն, վախենում են քննադատվելուց, այդ իսկ պատճառով կրում են միայն այն հագուստը, որով ողողված է շուկան կամ որն արդեն կրել է այս կամ այն աստղը:
-Նորաձեւությանը հետեւելիս ու նորաձեւության կանոններով շարժվելիս՝ մեր կողմից թույլ տված ամենատարածված սխալները որո՞նք են:
- Ըստ իս՝ սեփական «Ես»-ին անհամապատասխան հագուստ կրելը, խոսքը գնում է սեփական կառուցվածքի, տարիքի, սոցիալական ստատուսի մասին, որոնք հաճախ անտեսվում են:
-Մարիաննա, ի՞նչ եք կարծում, նորաձեւ լինելու համար գումարը շա՞տ մեծ նշանակություն ունի:
-Մենք ապրում ենք այնպիսի դարաշրջանում, երբ գումարն առհասարակ այդքան էլ կարևոր չէ որևէ ոլորտում հաջողելու համար, առավել եւս՝հագնվելու:
-Ըստ Ձեզ կա՞ն ոճեր, որոնք ազգային բնույթ են կրում:Այս առումով,ո՞րն է մեր երկրի առանձնահատկությունը:
- Յուրաքանչյուր երկիր ունի իր յուրահատուկ ներքին նորաձեւությունը, ես այդ միտումները անվանում են լոկալ թրենդներ, որոնք ակտուալ են մեկ վայրում եւ բացարձակ չեն ընկալվում մյուսում: Հայաստանը այս առումով նույնպես հետ չի մնում, սակայն արդյո՞ք այն, ինչ մեզ մոտ է ընդունված, գեղեցիկ է: Դատեք ինքներդ:
