Խորհրդարանի ընտրության ամենակարեւոր ցուցակը. «Ժամանակ»

«Ժամանակ» թերթը գրում է.

«Թեեւ ապրիլի 3-ին պարզ կլինի, թե ինչ հարաբերակցություն կունենա Հայաստանի խորհրդարանում ուժերի դասավորությունը, այնուհանդերձ՝ առկա գործընթացը արդեն իսկ վկայում է, որ խորհրդարանի ընդհանուր բովանդակությունը կամ պատկերը ավելի շուտ խճանկար կհիշեցնի, անգամ ոչ միայն ընդհանուր պատկերի իմաստով, այլ նաեւ առանձին ուժերի:

Այս ամենում, սակայն, կա առանցքային նշանակության մի հարց, որն իրականում օրակարգային կարող է դառնալ խորհրդարանական ընտրություններից հետո: Խոսքը Հայաստանում կապիտալի բաշխվածության պատկերի մասին է: Հայաստանում բիզնեսի եւ իշխանության սերտաճածությունը նորություն չէ, այն հանդիսացել է թե՛ համակարգային գլխավոր խնդիրներից մեկը, թե՛ հայաստանյան ներքաղաքական զարգացումների առանցքային խթաններից, մոտիվատորներից մեկը: Խորհրդարանը, ըստ էության հանդիսացել է հայաստանյան կապիտալի բաշխվածության հայելային արտապատկերը:

Եվ այս իմաստով, երբ խորհրդարանում ակնհայտորեն հասունանում է խճանկարային նոր պատկեր, երբ ավելի ու ավելի պարզ է դառնում, որ նոր խորհրդարանը իրենից ներկայացնելու է բովանդակային խճանկար, առաջ է գալիս կապիտալի, այսինքն՝ առանցքային հարցը: Խոսքը այն մասին է, որ եթե ունենում ենք խայտաբղետ խորհրդարան, ապա դա նշանակում է, որ համանման վիճակ է նաեւ ֆինանսատնտեսական հարթության, կապիտալի բաշխվածության առումով: Ավելին՝ մեծ հաշվով հենց կապիտալի դաշտում առկա խայտաբղետ վիճակն է, որ բերել է նաեւ քաղաքական գործընթացների խճանկարայնության շեշտակի աճի:

Այդ իմաստով խորհրդարանական ընտրություններից հետո խնդիրը դառնում է այն, թե ինչ զարգացումներ են ծավալվելու տնտեսական, կապիտալի դաշտում վերադասավորումների իմաստով: Ինչպիսի ուժերի հարաբերակցություն է ձեւավորվելու այդ դաշտում, որը պետք է բերի 2022 թվականի խորհրդարանի արդեն առավել որոշակի եւ հստակ պատկերի: Դա պահանջելու է հստակեցում նաեւ կապիտալի դաշտում, ինչը գործնականում անխուսափելի է դարձնում սեփականության որոշակի վերաբաշխման գործընթացը:

Ընդ որում, այստեղ իրավիճակը ամենեւին նույնական չէ «կուլակաթափությանը», եւ սեփականության վերաբաշխումը հազիվ թե տեղի ունենա ագրեսիվ եղանակով: Եղանակը կլինի ներիշխանական պայմանավորվածությունների տարբերակը, անվտանգության որոշակի երաշխիքներով: Ընդ որում, գործընթացը կլինի տեւական եւ թերեւս կարտահայտվի մի շարք տնտեսական գործարքների տեսքով, որ կլինեն համակարգի տարբեր ներկայացուցիչների միջեւ, կամ նոր ներդրումների, որոնք կփոխեն տնտեսական ստատուս քվոն եւ կձեւավորեն արդեն քաղաքական նոր ստատուս քվոյի որոշակիացման տնտեսական հիմքերը:

Խորհրդարանի ներկայիս ընտրությունը պարզապես «ջրի երես» է դուրս բերում սեփականության վերաբաշխման գործընթացի թիրախները, բացահայտում է թույլ օղակները, որպիսին կհանդիսանան անձինք կամ խմբերը, որոնք ներկայիս քաղաքական գործընթացում կցուցաբերեն առավել անմրցունակություն եւ կարձանագրեն դիրքերի զգալի հետընթաց: Այդպիսի մի շարք գործիչներ արդեն հայտնի են, ցուցակը կամբողջանա թերեւս ապրիլի 3-ից հետո: Եվ սա է ըստ էության լինելու խորհրդարանական «ընտրությունների» ամենակարեւոր ցուցակը»:

Առավել մանրամասն՝ թերթի այսօրվա համարում