Գյումրին դարձավ «Համայնքային վիզուալ բյուջե» ունեցող առաջին քաղաքը

Հայաստանի պատմության մեջ Գյումրին դարձավ համայնքային վիզուալ բյուջե ունեցող առաջին քաղաքը: Էստոնական փորձի և էստոնական Praxis քաղաքականության հետազոտությունների կենտրոնի հետ համատեղ, «Կոմպասս» գիտահետազոտական, կրթական և խորհրդատվական կենտրոնին հաջողվել է ստեղծվել Գյումրիի քաղաքային բյուջեի տվյալներն արտացոլող ինտերակտիվ կայք (www.gyumribudget.am), որն իր բնույթով աննախադեպ է. նախատեսված է ոչ միայն տնտեսագետների ու ֆինանսիստների, այլ բոլոր գյումրեցիների համար՝ հնարավորություն տալով տեղեկանալու համայնքային բյուջեի մասին, այդ թվում` նաև հարկային մուտքերի, եկամուտների կազմի ու կառուցվածքի, տրանսֆերտների, սեփական եկամուտների հավաքագրման ցուցանիշների և այլն:

Կայքում արտացոլված տվյալները թարմացվելու են եռամսյակը մեկ անգամ: Այն հնարավորություն է ընձեռելու Գյումրիի բոլոր քաղաքացիներին հարցերով դիմել ոլորտի փորձագետներին, կատարել առաջարկություններ, որոնք ամփոփվելու և պարբերաբար ներկայացվելու են Գյումրիի քաղաքապետին ու ավագանու անդամներին: Ծրագրի առաջիկա քայլերի ընթացքում նախատեսվում է նաև կազմակերպել հանդիպում-քննարկումներ քաղաքացիական հասարակության լայն շրջանակների և Գյումրիի տեղական ինքանակառավարման մարմինների մասնակցությամբ: Ծրագրի ավարտական փուլում առաջարկությունների փաթե թ է ներկայացվելու ՏԻՄ-ին համայնքային բյուջետավորման գործընթացը մասնակցային դարձնելու նպատակով:

«Մեր փողերը, տեղեկացված լինելու մեր իրավունքը. համայնքի վիզուալ բյուջե» ծրագրի երկարաժամկետ նպատակն է նպաստել կարիքների վրա հիմնված ավելի թափանցիկ բյուջետային արդյունավետ քաղաքականության մշակմանն ու իրականացմանը՝ Գյումրիի տեղական ինքնակառավարման մարմինների կողմից ընդունված ֆինանսական որոշումների մասին իրազեկվածության բարձրացման, բյուջետային գործընթացներին բնակիչների կողմից իմաստալից և տեղեկացված մասնակցության ապահովման, փորձագիտական խորհրդատվության տրամադրման միջոցով: Ծրագրի արդյունքները և նախատեսվող գործողությո ւնները ներկայացրեց «Կոմպասս» գիտահետազոտական, կրթական և խորհրդատվական կենտրոնի նախագահ, ծրագր ղեկավար Ղարիբ Հարությունյանը սեպտեմբերի 25-ին՝ կայքի շնորհանդեսի ընթացքում: Ինտերակտիվ կայքը ոչ միայն տեղեկություններ տալու, այլև յուրաքանչյուր քաղաքացու կողմից համայնքին մուտքագրած գումարների վերահսկման լավագույն տարբերակ համարում է ծրագրի փորձագետ, Praxis քաղաքականության հետազոտությունների կենտրոնի ներկայացուցիչ Հիլլե Հինսբերգը: Էստոնացի փորձագետը, ներկայացնելով նմանատիպ էստոնական կայքը, հույս հայտնեց, որ Գյումրիում էլ նմանա տիպ կայքը ոչ միայն կգործի, այլև կզարգանա, օրինակ՝ էստոնական կայքում կա «ինտերակտին քննարկում» բաժինը, բայց դեռ նմանատիպ քննարկման օրինակ չի եղել:

Փորձագետը վստահ է՝ այն մասնագիտական թիմը, որն ունի Գյումրին, կկարողանա զարգացնել այս նախաձեռնությունը: Ավելին, Հիլլե Հինսբերգը հնարավոր է համարում, որ Գյումրիի օրինակին հետևեն այլ համայքներ ևս: Արդյունավետության ապահովման համար ծրագիրը պահանջում է նաև ՏԻՄ մարմնի հետ համագործակցություն: Այն որ համագործակցությունը կա և կլինի նաև հատագայում, շնորհանդեսի ժամանակ հայտարարեց Գյումրու փոխքաղաքապետ Ռուբեն Սանոյանը՝ փաստելով, որ Գյումրիի քաղաքապետարանը գործում է թափանցիկ և այս ծրագիրը, որը բյուջեն հանարության համար տեսանելի է դարձնում, ևս իրականացվում է քաղաքապետարանի հետ ձեռք բերված համաձայնության և արդյունավետ համագործակցության արդյունքում:

Շնորհանդեսի ժամանակ ներկայացվեցին նաև համայնքի բյուջեի վերլուծությունների արդյունքները և կայքից օգտվելու ուղեցույցը: Ծրագիրն իրականացվում է «Բաց Հասարակության Հիմնադրամներ-Հայաստան»-ի և Հետազոտական Կենտրոնների Հիմնադրամի աջակցությամբ:

Արմենուհի Մխոյան