Արթիկի «հազվագյուտ» գրադարանում հազվագյուտ գրքեր են պահվում (լուսանկարներ)

Մենք այցելեցինք Շիրակի մարզի Արթիկ քաղաքի գրադարան, զրուցեցինք աշխատողների և գրադարանի ընթերցողներ հետ:

Պետք է նշել, որ գրադարանը գտնվում է անմխիթար վիճակում: Վերանորոգումը անասելի հին է, հին գրքերի խնամքի համար անհրաժեշտ միջոցներ չկան: 

Գրադարանի արդեն 40 տարվա գրադարանավարուհի Աիդա Քոչարյանը Past.am-ի հետ զրույցում նշեց, որ գրադարանն ունի մոտ 1600 ընթերցող, որոնք ակտիվ չեն: Ընթերցողների հիմնական մասն ուսանողներ են, որոնք փնտրում են մասնագիտական գրականություն, բայց պահանջարկն ամբողջությամբ բավարարելու  հնարավորություն չկա: 

-Մեր խնդիրը հիմանականում նոր տպագրվող գրքերի մեջ է: Ժամանակակից գրականության պահանջված գրքերը մեզ չեն հասնում, ինչն էլ հասնում է` հետաքրքրություն չի ներկայացնում: Ցանկալի կլիներ, որ դասական գրողների ստեղծագործությունները վերահրատարակվեին: 

Գրադարանը չունի ընթերցասրահ, իսկ այն գրքերը, որոնք գրադարանից հանելու թույլտվություն չունեն, ընթերցողները ստիպված են կարդալ մի կերպ` դասավորված սեղանների վրա, որոնք գտնվում են հենց գրքային ֆոնդին կից:

-Մենք ֆինանսական օգնության կարիք ունենք, գույքը շատ հին է, և լավ սպասարկել չի կարող: Ունենք մեկ համակարգիչ, որը տնօրենի սենյակում է: Քարտերը ես եմ գտել արխիվներից, որոնք հիմա ոչ մի գրադարանում չեն օգտագործվում և շատ անհարմար են:

Արթիկի ուսանողներից մեկը մեզ հետ զրույցում նշեց, որ շատ գոհ է գրադարանի ֆոնդից:

-Շատ է պատահել, որ Երևանում փնտրել եմ որոշ գրքեր, չեմ գտել, բայց էստեղից գտել եմ: Այնպիսի գրքեր կան, որ շատ դժվար են ճարվում: Ես հաճախ եմ օգտվում ու հատկապես այն ժամանակ, երբ անտիպ գրքերի կարիք ունեմ:

 

Արուսիկ Տիգրանյան