Չպայքարել չենք կարող. Արմեն Մարտիրոսյան

Ինչպես հայտնում է Past.am-ը, այսօր՝ փետրվարի 13-ին, ստորագրվեց «Օհանյան-Րաֆֆի-Օսկանյան» դաշինքի հուշագիրը: ՀՀ նախկին արտգործնախարար Վարդան Օսկանյանի «Համախմբում», Րաֆֆի Հովհաննիսյանի «Ժառանգություն» կուսակցությունները և նախկին Պաշտպանության նախարար Սեյրան Օհանյանն ապրիլի 2-ին կայանալիք ընտրություններին մասնակցելու են միասին: Հուշագրի ստորագրումից առաջ ելույթով հանդես եկավ «Ժառանգություն» կուսակցության փոխնախագահ Արմեն Մարտիրոսյանը:

Նա նշեց. «Ապրիլին լինելու են ԱԺ ընտրություններ՝ նոր Սահմանադրությամբ, միակ համապետական ընտրությունները և ամբողջ իշխանությունը որոշվելու է բացառապես այս ընտրություններով, ուստի չմասնակցել այս կարևորագույն քաղաքական գործընթացին անթույլատրելի է։ Չպայքարել չենք կարող, քանի որ վերջին տարիներին արձանագրվող բացասական արդյունքների պատճառով ՀՀ–ն անցնում է անթույլտարելի բոլոր սահմանները՝ մարդու իրավունքի համատարած խախտումներ, արհեստական և ապօրինի մենաշնորհներ, տարատեսակ տուգանքների մեխանիզմներով քաղաքացու եկամտազրկում, իշխանության և բիզնեսի սերտաճում, համակարգային կոռուպցիա, ընտրությունների կեղծում, անարդար դատարաններ, ինքնիշխանության կորուստ, քաղբանտարկյալներ, հուսահատություն և հուսալքություն»:

Մարտիրոսյանի խոսքով՝ այս ամենը պատճառ է հանդիսացել մարդաթափության հասնող արտագաղթի և երկրի անվտանգության թուլացմանը։ «Անհրաժեշտ է փոխել այս արատավոր համակարգը։ Երեք փորձառու պետական գործիչներ՝ Սեյրան Օհանյանը, Րաֆֆի Օսկանյանը, Վարդան Օսկանյանը միավորում են իրենց ջանքերը՝ Հայաստանի առաջ ծառացած սպառնալիքները հաղթահարելու, նոր որակի իշխանություն ձևավորելու, մեր ինքնիշխանության պահպանման, արմատական բարեփոխումների համար»,- ասաց Մարտիրոսյանը՝ հավելելով, որ իրենց ձևավորած ուժի առանցքը լինելու է քաղաքացին, պետական և հասարակական շահը։

Լևոն Փանոսյան