«Շատ-շատ եմ չարչարվել, մինչև ստացել եմ իմ Մելիքսեթյանին». «Բանակում»-ից մինչև Վալենտին՝ Վահագն Սիմոնյանի հետ

Exclusive

Past.am-ի զրուցակիցը դերասան Վահագն Սիմոնյանն է, ով հեռուստադիտողին առավել հայտնի դարձավ «Բանակում» հեռուստասերիալից, որտեղ մարմնավորում էր 2-րդ վաշտի հրամանատար Մելիքսեթյանին:

- Ինչպե՞ս հայտնվեցիք «Բանակում»-ում:

- Առաջարկն անձամբ սցենարիստից ստացա, բայց կերպարը, որ պետք է խաղայի, ընդամենը 4 սերիայի մեջ էր լինելու: Բայց չորրորդ սերիան եթեր տալուց հետո պրոդյուսերը որոշեց, որ կերպարը պետք է զարգացնել, և այդպես ես դարձա 2-րդ վաշտի հրամանատարն ու շարունակեցի նկարահանվել:

 

- Ֆիլմում Ձեր կերպարը, կարծես, այնքան էլ դրական չէր: Հե՞շտ համաձայնեցիք խաղալ այդ դերը:

- Ինձ համար երբեք տարբերություն չի եղել՝ կերպարը դրակա՞ն կլինի, թե՞ բացասական: Կարևորն այն է, որ տվյալ կերպարն ասելիք ունենա և լինի կոնկրետ մարդ: Հենց դրա համար էլ համաձայնեցի խաղալ այդ դերը: Բայց անկեղծ՝ շատ-շատ եմ չարչարվել, մինչև ստացել եմ այն, ինչ իմ սրտով է և այն, ինչ հանրությունն ընդունեց և ճանաչեց՝ իմ Մելիքսեթյանին:

 

- Գաղտնիք չէ, որ հանրային մարդիկ մշտապես ուշադրության կենտրոնում են նաև իրենց անձնական կյանքով: Ինչպես տեղյակ ենք, վերջերս Ձեր անձնականում լուրջ փոփոխություններ են տեղի ունեցել: Ինչպե՞ս եք հանդիպել Ձեր կնոջը, ինչպե՞ս է սկսվել Ձեր սիրո պատմությունը:

- Ճիշտն ասած՝ ես այդքան էլ չեմ սիրում իմ անձնական կյանքից խոսել կամ այն հանրության համար մատչելի դարձել: Բայց կփորձեմ շատ կարճ պատմել: Կնոջս՝ Նազելիին հանդիպել եմ մեր ամուսնությունից 3-4 տարի առաջ՝ «Գարեգին Նժդեհ» ֆիլմի նկարահանումների ժամանակ, ու պատահական հանդիպումը տևել է 15 րոպե:

Դրանից հետո նրան չեմ տեսել ու երկար եմ փնտրել՝ երեք տարուց ավելի՝ հույս ունենալով, որ մի օր նորից կտեսնեմ: Եվ, փառք Աստծո, այդքան ժամանակ անց նորից հանիպեցի նրան, կրկին պատահական՝ ինչպես առաջին անգամը: Հենց այդ ժամանակ էլ որոշեցի, որ պետք է ամուսնանանք ու շատ կարճ ժամանակ անց այդպես էլ եղավ:

 

- Վերջերս հաճախակի չեք երևում հեռուստաեթերով: Ինչո՞վ եք զբաղվում հիմա: Առաջիկայում Ձեզ մեր էկրաններին կտեսնե՞նք: Ունե՞ք նոր առաջարկներ, պայմանավորվածություններ:

- Ես հիմա էկրաններին չերևալու պատճառներ ունեմ:

Առաջարկներ շատ կան, բայց դրանց մեջ չկան այնպիսիք, որոնք կուզենայի խաղալ: Ինձ համար առաջնայինն այն է, որ կերպարն ունենա ստեղծագործելու տեղ, ոչ թե զուտ տեքստ ասող մարդ լինի:

Այժմ պատրաստվում եմ նոր ներկայացում բեմադրել, բայց փակագծերը դեռ չեմ ուզում բացել:

- Եվ, քանի որ այսօր աշխարհում նշում են սիրահարների օրը, հետաքրքիր է՝ Դու՞ք ինչպես եք պատրաստվում անցկացնել այն:

- Առաջին հերթին շնորհավորում եմ բոլոր սիրահարներին և նորաստեղծ ընտանիքներին, հատկապես նրանց, ում հարսանյաց հանդեսի թամադան ես եմ եղել: ))

Իսկ ինչ մնում է օրն անցկացնելուն, ինձ համար բացարձակ կարևոր չէ, թե որտեղ: Կարևորն այն է, որ այս օրն իմ սիրելիի համար հրաշալի և տոնական կլինի:

Մարիամ Նալբանդյան