Ընտրությունների ժամանակ կարող է ֆորս–մաժորային իրավիճակ լինել. «Փաստ»

«Փաստ» օրաթերթը գրում է.

«Ժողովրդավարական դաշինք» կուսակցությունը թեև չի մասնակցի խորհրդարանական ընտրություններին, սակայն չի էլ պատրաստվում ձեռքերը ծալած նստել ու սպասել, թե ինչպես են իշխանություններն իրենց սցենարն իրականացնելու: «Փաստի» հետ զրույցում Պետրոս Մակեյանն ասաց, որ առաջիկայում իրենք կուսակցության քաղխորհրդի նիստ են հրավիրելու և այդ ժամանակ էլ որոշում են կայացնելու, թե ընտրություններին ինչ ձևաչափով կմասնակցեն:

«Մեր մասնակցությունը ընտրություններին մեկ նպատակ էր հետապնդում և իմաստ կունենար դրան մասնակցել, եթե ձևավորվեր այլընտրանքային ուժային կենտրոն, որը կկարողանար կանխել ընտրակաշառք բաժանելով ընտրվելու հնարավորությունը: Փաստորեն դա չստացվեց և մենք երկրորդ քայլով փորձեցինք համագործակցել «Սասնա ծռեր»–ի հետ: Քանի որ դատական վճիռներ չկան, ուստի նրանք կարող էին մասնակցել ընտրություններին, սակայն նրանք մնալով իրենց սկզբունքին, հայտարարեցին, որ Հայաստանում ընտրություններով ոչինչ հնարավոր չէ փոխել: Հիմա մնում է երրորդ քայլը՝ տեսնենք, թե այս պայմաններում ինչ հնարավոր կլինի անել»,– ասաց Պ. Մակեյանը:
Քաղաքական գործչի կարծիքով իշխանությունների սցենարը պարզ է և եթե ամեն ինչ ընթանա իշխանության՝ հանդարտ և ստանդարտ ծրագրի համաձայն, իրենք ընդհանրապես չեն մասնակցի ընտրություններին: Սակայն չի բացառվում, որ ֆորս–մաժորային իրավիճակ լինի, որի ժամանակ արդեն նրանք հստակ կիմանան իրենց անելիքը:

Խոսելով ստեղծված դաշինքներին չմիանալու պատճառների մասին, Պ. Մակեյանն ասաց, որ «Ելք»–ի անդամներ Նիկոլ Փաշինյանի և Արամ Սարգսյանի հետ երկար ճանապարհ են անցել, բայց նրանք հապշտապ, այսպես կոչված՝ գաղափարական դաշինք ձևավորեցին և այլևս չընդլայնվեցին: Օհանյան–Րաֆֆի–Օսկանյան դաշինքի մասով էլ քաղաքական գործչի համար պարզ չէր, թե իրականում նրանք ինչ խնդիր են ցանկանում լուծել: Ու թեև «Ժառանգության» առաջնորդի միջոցով միջնորդավորված կերպով իրենց համագործակցության առաջարկ եղել է, բայց նրանք հրաժարվել են միանալ այդ դաշինքին:

«Շատ հարցերում մեզ համար հստակություն չկար: Օրինակ՝ մարտի 1–ի դեպքերի մասին Սեյրան Օհանյանը և Վարդան Օսկանյանը պետք է հստակ դիրքորոշում արտահայտեին, որովհետև իրենք այդ գործընթացների կիզակետում են եղել: Երբ աթոռը տակից դուրս է գալիս ու հետո է մարդկանց ուղեղները պայծառանում, դա էլ պետք է բացատրություն ունենա: Բացի այդ, պետք է նաև հասկանալ, թե այդ դաշինքի միջոցով որտեղից ինչ մեսիջներ են գալիս: Նրանց աշխատանքներին ստվերային ձևով մասնակցում է Սամվել Բաբայանը և չի բացառվում, որ նա Ռոբերտ Քոչարյանի հետ վերադառնա: Այս բոլորը խնդիրներ են, որոնց պատճառով մենք պետք է նրանցից հեռու մնանք»,– ասաց Պ. Մակեյանը:

ՀԱԿ–ՀԺԿ խմբակցության հետ նույնպես նրանք չէին կարող միանալ, քանի որ 2012 թ–ի պառլամենտական ընտրությունների ժամանակ ՀԱԿ դաշինքով ընտրություններին մասնակցելուց հետո, չկիսելով նրանց մոտեցումները, հրաժարվեցին հետագա համագործակցությունից: Գուցե քաղաքական շատ հարցերում ՀԱԿ–ի մոտեցումներն ընդունելի են կուսակցության անդամների համար, սակայն ՀԱԿ–ականների կողմից կատարած անմարդկային քայլերը թույլ չեն տալիս, որ «Ժողովրդավարական հայրենիքի» անդամները մտածեն նրանց հետ հետագա համագործակցության մասին:
«Ես կարծում եմ, որ ՀԱԿ–ՀԺԿ դաշինքը մասնակցում է զուտ մասնակցելու համար կամ էլ ինչ–որ տեղից երաշխիքներ են ստացել, որ իրենց համար անցողիկ շեմը հաղթահարելու տոկոս են գրելու»,– ասում է Պ. Մակեյանը:

«Եթե իշխանություններին հաջողվի հանդարտ ձևով, ընտրակաշառքով ու թվանկարչությամբ այն ավարտել, այդ դեպքում կունենանք այն, ինչ հիմա ունենք` նույն վարչախումբն իրեն սպասարկող հաճախորդներով: Բայց մենք անգործ չենք նստելու և սպասելու, որ իշխանությունները փողերը բաժանելով և ժողովրդին փչացնելով ևս 5 տարի երկիրը շարունակեն թալանել: Գարշանքն ու գարշահոտությունը մաքրելու համար ժողովուրդը պետք է դուրս գա հրապարակ: Դա արյան ճանապարհ չէ, դա միակ ճանապարհն է այս իշխանություններից ձերբազատվելու համար: Հակառակ դեպքում նրանց երեխաներն են իրենց փոխարինելու»,– ասում է Պ. Մակեյանը:

Շարունակությունը` «Փաստ» օրաթերթի այսօրվա համարում: