Ալաշկերտ - Փյունիկ. խաղից առաջ

СПОРТ 27 Сентябрь, 2015 14:27

Ալաշկերտ» - «Փյունիկ». 11 խաղ, +3=1-6, 15:27

սեպտեմբերի 27, «Ալաշկերտ» մարզադաշտ, սկիզբը՝ 15:00

գլխավոր մրցավար՝ Զավեն Հովհաննիսյան

բուքմեյքերներ՝ 2.40 - 3.50 - 2.40

Հայաստանի Բարձրագույն խմբի առաջնության 8-րդ տուրի կենտրոնական խաղում ներկայիս առաջատար «Ալաշկերտը» հյուրընկալում է գործող չեմպիոն «Փյունիկին»:

Հանդիպումը մեծ կարևորություն ունի թիմերի համար, քանի որ մրցաշարային աղյուսակի վերնամասում պայքարը բավականին սուր է: 7 տուրերից հետո առանց պարտության «Ալաշկերտը» 17 միավորով գլխավորում է աղյուսակը, իսկ Սարգիս Հովսեփյանի գլխավորած թիմը 11 միավորով 4-րդն է: Երեկ հաղթանակ տարած «Գանձասար Կապանն» առաջատարին զիջում է արդեն 2 միավորով, ուստի առաջընթացը շարունակելու համար Աբրահամ Խաշմանյանի թիմին հաղթանակ է անհրաժեշտ: «Փյունիկի» համար հաղթանակը մեծ կարևորություն ունի, քանի որ 3 միավորը թույլ կտա հավասարվել եռյակը եզրափակող «Շիրակին»:

Թիմերը հանդիպել են ընթացիկ առաջնության մեկնարկային տուրում. Վարազդատ Հարոյանը գոլին Հեբեր Արաուխոն դուբլով էր պատասխանել՝ 2:1:

Հայաստանի Բարձրագույն խմբի նախորդ առաջնությունում 4 դիմակայություններից 3-ում «Փյունիկը» հաղթել է 2:0, 1:0 և 3:1 հաշիվներով. 10-րդ տուրում կայացած գոլառատ խաղում գրանցվել է 3:3 հաշիվը: Կողմերի դիմակայությունը 11 խաղից է բաղկացած. «Փյունիկը» հաղթանակների կրկնակի առավելություն ունի՝ 6-ն ընդդեմ 3-ի:

«Ալաշկերտը» և «Փյունիկը» նույն կերպ են մոտենում խաղին. չեմպիոնը 3 օր առաջ կայացած Սուպերգավաթի խաղում 3:0 հաշվով հաղթել է «Միկային», իսկ «Ալաշկերտը» 7-րդ տուրում հյուրընկալվելիս 2:1 հաշվով հաղթել է «Շիրակին»:

Ընթացիկ առաջնությունում «Ալաշկերտն» առայժմ ամենաշատ գոլ խփած և ամենաքիչը բաց թողած թիմն է՝ 14:5: «Ալաշկերտի» հետ համեմատ՝ «Փյունիկի» ֆուտբոլիստները մեկ գոլ պակաս են խփել և մեկն էլ ավել բաց թողել:

Հատկանշական է, որ լավագույն ռմբարկուների ցանկը 5-ական գոլով գլխավորում են «Ալաշկերտի» հարձակվողներ Հեբերը և Միհրան Մանասյանը: «Փյունիկի» լավագույն ռմբարկուները ներկա դրությամբ Վարդան Պողոսյանը և Վարդգես Սաթումյանն են, որոնց ակտիվում կա 3 գոլ:

Թիմերը մարտունակ կազմերով են մոտենում հանդիպմանը: