«Ապարանցիների համար մեկ ա՝ ով ում ա հով անում». «Փաստ»

«Փաստ» օրաթերթը գրում է.

Լյովա Խաչատրյանը՝ իր դեմ Աղվան Հովսեփյանի աշխատելու մասին

Մամուլում գրվել է, որ Քննչական կոմիտեի ղեկավար Աղվան Հովսեփյանը մտերմիկ շրջապատում անկեղծացել է, թե իր վրա է վերցրել Արագածոտնի ընտրատարածքում ու հատկապես Ապարանում ԲՀԿ–ին ձայնից «զրկելու» գործը և ողջ թիմով աշխատելու է հանուն Ռուբեն Հայրապետյանի՝ Գազի Ռուբոյի որդու օգտին` ընդդեմ իր վաղեմի գործընկեր, այժմ հակառակորդ, «Ծառուկյան դաշինքի» ռեյտինգային թեկնածու Լյովա Խաչատրյանի: 
Նշենք, որ ապարանցի Ռուբեն Հայրապետյանի՝ Գազի Ռուբոյի, ՀՀԿ–ից առաջադրված որդին՝ Ռոման Հայրապետյանը, «Փաստի» տեղեկություններով, Դատախազության նախկին աշխատակից է, իսկ այժմ սեփական ՍՊԸ–ի տնօրեն: 
Այս առթիվ «Փաստը» մի քանի հարց ուղղեց ապարանից «Ծառուկյան դաշինքով» առաջադրված Լյովա Խաչատրյանին:

– Պարոն Խաչատրյան, տեղեկություն կա, որ Ձեր դեմ մարզում աշխատելու է ՔԿ ղեկավար Աղվան Հովսեփյանը՝ ի դեմս Գազի Ռուբոյի տղայի: Կարծում եք` կդիմանա՞ք մրցակցությանը Ձեր երբեմնի «գործընկերոջ» հետ:

– Ինձ համար միևնույն է՝ ով ում համար է աշխատելու, վերջիվերջո ժողովուրդն է ձայնը տալու, ժողովուրդն է ընտրելու: Ապարան, Արագածոտնի մարզ, ստեղ սարի ժողովուրդ են: Սրանց համար սաղ մեկ ա՝ ով ա ում հով անում, թե արև անում, սառը կամ տաք անում: Էս ժողովրդի համար մեկ ա, սրանք իրանք իրանց խոդով իրանց ուզածն անում են: Մնացածները բոլորը ձև են անում, թե իրանք որևէ ազդեցություն ունեն այդ պրոցեսների վրա՝ իրենց աշխատատեղերը պաշտպանելու, իրենց թալանը պաշտպանելու համար: Դա իրականության հետ բացարձակ աղերս չունի:

– Կարծում եք, որ այդ հովանավորչությունը Ձեր համար խնդիր չի՞ առաջացնի:

– Ես կարծում եմ, որ վերջիվերջո, ընտրողը իր որոշումը կայացնելու է և դրա վրա ոչ ոք ազդեցություն ունենալու հնարավորություն չի ունենալու: Իսկ կեղծիքների դեմը կառնենք: Կարծում եմ, մենք էդքան պոտենցիալ ունենք: Կունենանք մեր վստահված անձինք հանձնաժողովներում, հանձնաժողովի անդամները, որոնց ոչ առնել կլինի, ոչ վախեցնել կլինի: Ու ամեն ինչ կլինի նորմալ:

– Գազի գրասենյակի ղեկավարն ու Քննչական կոմիտեի ղեկավարը հաստատ էդտեղ լծակներ ունեն, Դուք ի՞նչ ունեք:

– Ես ունեմ ժողովուրդ, որը հաստատակամ է, թույլ չտալու որևէ կեղծիք:

– Պարոն Խաչատրյան, հայտնի է, որ նախկինում Դուք Աղվան Հովսեփյանի հետ համատեղ բիզնեսներ եք ունեցել...

– Եվ նախկինում, և ապագայում մենք լինելու ենք ընկերներ: Գուցե միջանկյալ ժամանակահատվածում ինչ–որ բան այնպես չէ, բայց վերջիվերջո սաղ էլ թոշակի են գնալու, փեդը ձեռին իրար հետ նստելու են ինչ–որ մի տեղ ու զրուցելու:

– Տեղեկություն կա նաև, որ Դուք հիմա էլ համատեղ բիզնեսներ ունեք, չնայած իրար հետ չեք շփվում:

– Ես բիզնեսով չեմ զբաղվում վաղուց և երբեք Հայաստանում բիզնեսով չեմ զբաղվել: Ես ունեմ, ունեցել եմ սեփականություն, անմիջական կապ չեմ ունեցել բիզնեսի հետ: 
Որևէ մեկը չի կարող բերել փաստ, որ ես որևէ բիզնեսում եղել եմ, որևէ պատասխանատու պաշտոնի, որևէ թուղթ եմ ստորագրել: Ես չեմ հիշում նույնիսկ, որ ԱԺ–ում իմ աշխատավարձի տակ ստորագրել եմ այս տարիների ընթացքում, որովհետև այն հիմնականում ստացել են օգնականներս:

– Իսկ ո՞նց եք ապրել, եթե ոչ բիզնեսով եք զբաղվել, ոչ ԱԺ–ից աշխատավարձ եք ստացել:

– Ապրել եմ իմ ունեցած սեփականության հասույթներից և նախկինում աշխատած փողերով մինչև Հայաստան գալս: Ես Հայաստանում միայն ծախսել եմ:

– Իսկ ինչպե՞ս եք գնահատւմ ԲՀԿ–ի շանսերն Ապարանում: Կարծում եք՝ ապարանցին կրկին կվստահի՞ ԲՀԿ–ին:

– Կարծում եմ՝ կվստահեն ինձ և ԲՀԿ–ին:

– Ձեզ հետ այս անգամ մրցակցում են նախկին ԲՀԿ–ականներ Արագած Ախոյանը, Բազմասեր Առաքելյանը, իրենց հետ մրցակցությունն ինչպե՞ս եք պատկերացնում:

– Իմ հետ ոչ ոք չի մրցակցում, յուրաքանչյուրն աշխատում է իր կատարածը ներկայացնելու և իր աշխատանքներն է կատարում: Իմ մրցակիցը ժողովուրդն է, որին ես կարող եմ ներկայանալ իմ կատարած գործերով:

– Եվ ի՞նչ եք արել, ԱԺ–ում կարծես ակտիվ չեք եղել, ակտիվ օրենսդիր աշխատանքով չեք զբաղվել:

– Ես բոլոր քննարկվող հարցերի շուրջ տարեկան առնվազն 300 հարցազրույցներ եմ ունենում, առնվազն: Ոչ թե 10, 20, այլ 300: Այս տարիների ընթացքում առնվազն 10 նախաձեռնությունների և մեկ օրենքի հեղինակ եմ: Որ չի անցնում, դա չի նշանակում..., երբ քիչ ես, ձայները չի հերիքում, չի անցնում: Կարծում եմ՝ սա է ակտիվությունը, որը մարդիկ տեսնում, լսում և գնահատում են:

Շարունակությունը` «Փաստ» օրաթերթի այսօրվա համարում: