Հարաբերություններում թույլ տրվող սխալներ, որոնք հանգեցնում են բաժանման

Զույգերի միջև հարաբերությունները մի ամբողջ գիտություն են, և դրանք պահպանելու և նորանոր մակարդակների հասցնելու համար պահանջվում է երկուսի ցանկությունն ու աշխատանքը:

Ամերիկացի հոգեբան Ջոն Գոթմանն իր ուսումնասիրությունների վերջին 40 տարին նվիրել է հարաբերությունների ուսումնասիրությանը: Զույգի վիճակն «ախտորոշելու» և հարաբերությունների ապագան կանխատեսելու համար նրան բավական է մի քանի րոպե շփվել մարդկանց հետ:

Գոթմանի կարծիքով` տխուր ավարտ է սպասվում այն զույգերին, որոնց հարաբերությունները համապատասխանում են 4 տիպերից մեկին, որոնք նա անվանում է «Ապոկալիպսիսի ձիավորներ» հարաբերությունների համար:

Հարաբերություններն ամուր պահելու համար AdMe.ru-ն առաջարկում է ուսումնասիրել փորձագետի վերլուծությունը և հետևել նրա խորհուրդներին.

Չգնահատելն ու արհամարհանքը

Նշաններ. սիրահարներից մեկը ծաղրում է մյուսին, երբ նրանք երկուսով են, կամ ուրիշների մոտ, և հաշվի չի առնում նրա կարծիքը: Կարճ ասած` ամեն կերպ ցույց է տալիս, որ չի գնահատում նրան և շատ ավելի կարևոր մարդ է համարում իրեն:

Լուծում. դրեք ձեզ նրա տեղն ու փորձեք իրավիճակը տեսնել նրա աչքերով: Թույլ մի տվեք ձեզ կոպիտ վարվել նրա հետ և միշտ հիշեք` որքան թանկ է նա ձեզ համար:

Քննադատություն

Նշաններ. զուգընկերներից մեկը նյարդայնանում է մյուսի թույլ տված ցանկացած վրիպումից և արդյունքում քննադատության ենթարկում ոչ միայն կոնկրետ արարքը, այլ նաև նրա անձը:

Լուծում. զրույցի ժամանակ պետք է խուսափել ագրեսիվ տոնից և ոչ մի դեպքում մի խնդիր չկապել մյուս խնդիրների հետ: Պետք է հանգիստ խնդրել հաջորդ անգամ այլ կերպ վարվել` թեթև մոտենալով իրավիճակին:

Պաշտպանողական պահվածք

Նշաններ. զուգընկերներից մեկը զգում է, որ ինքն ինչ-որ բան սխալ է արել, և քննադատությունից խուսափելու նպատակով անմիջապես փորձում է պաշտպանվել, հաճախ` ագրեսիվ կերպով: Արդյունքում զուգընկերը սկսում է կտրուկ արտահայտվել, ինչը բերում է փոխադարձ պահանջների:

Լուծում. այսպիսի դեպքերում շատ ավելի հեշտ է ընդունել սեփական պահվածքի պատասխանատվությունն ու ժամանակին ներողություն խնդրել` խնայելով ժամանակն ու ավելի օգտակար բաների վրա ծախսելով այն:

Խուսափում կոնֆլիկտից

Նշաններ. զգալով, որ կոնֆլիկտ է առաջանում, ոմանք նախընտրում են ժամանակին «փակվել»` պահանջներին պատասխանելով կարճ և առանց հույզերի, կենտրոնանալ կողմնակի զբաղմունքների վրա` ձևացնելով, թե ոչինչ չեն լսում, ընդհանրապես դուրս գալ սենյակից կամ նույնիսկ բնակարանից: Լավագույն դեպքում երկրորդ կեսը կբարձրաձայնի իր կարծիքը նման պահվածքի վերաբերյալ և կհանգստանա, սակայն հնարավոր է, որ նա կնեղանա ձեր սառնասրտությունից և այլևս չի ցանկանա լուծել խնդիրը:

Լուծում. ոչ մի դեպքում չի կարելի «փախուստի դիմել» կամ ամեն ինչ պահել ներսում: Փորձեք խնդիրը լուծել խաղաղ ճանապարհով, քանի որ հակառակ դեպքում այն կրկին ի հայտ կգա ապագայում և ավելի կբարդանա: