Կնոջ դերը քաղաքականության մեջ. մեկնաբանում են Հայաստանի խորհրդարանի կին պատգամավորները

Հայաստանի քաղաքական և հասարակական կյանքի գրեթե բոլոր ոլորտներում կանանց դերը տարեցտարի ավելանում է: Կանանց ներկայացվածությունը, դերն ու նշանակությունը Հայաստանի քաղաքական կյանքում երբեք չի եղել այն մակարդակի վրա, ինչ վերջին տարիներին է: Ազգային ժողովի 6 խմբակցություններից երկուսի ղեկավարները կին են, իսկ, ընդհանուր առմամ բ խորհրդարանի 131 պատգամավորներից 13 կին են: Նորանկախ Հայաստանի պատմության մեջ  մինչև 2012թ. խորհրդարանական ընտրությունները Ազգային ժողովում այդքան կին պատգամավոր երբեք չի եղել: Բացի նրանից, որ խորհրդարանական քաղաքական խմբակցություններից երկուսը կանայք են ղեկավարում, ԱԺ փոխնախագահներից մեկի պաշտոնն էլ զբաղեցնում է ՀՀԿ խմբակցության պատգամավոր  Հերմինե Նաղդալյանը: «Ժառանգություն» խմբակցության արդեն պատգամավոր Զարուհի Փոստանջյանն էլ խորհրդարանի ամենաակտիվ պատգամավորներից մեկն է: Նա իր ակտիվությամբ գերազանցել է նույնիսկ շատ տղամարդ պատգամավորների:

Կանայք իրենց ուրույն տեղն ու դերն ունեն ոչ միայն ՀՀ խորհրդարանում, այլ նաև գործադիրում: ՀՀ արդարադատության նախարարությունը ղեկավարում է Արփինե Հովհաննիսյանը, ով մինչ այդ Ազգային ժողովի պատգամավոր էր, իսկ Սփյուռքի նախարարությունը ստեղծման պահից մինչ օրս ղեկավարում է Հրանուշ Հակոբյանը:

Հայաստանի նոր ընտրական օրենսգրքի նախագծում էլ կանանց մասին չեն մոռացել: Համաձայն նախագծի՝ խորհրդարանական  ընտրություններին մասնակցող բոլոր քաղաքական կուսակցությունների կամ դաշինքների համամասնական ցուցակներում յուրաքանչյուր հնգյակում պետք է առնվազն մեկ կին լինի, ինչը նշանակում է, որ 2017թ. խորհրդարանական ընտրությունների արդյունքներով խորհրդարանում կանանց ներկայությունն ավելի զգալի կլինի:

Կանանց դերը զգալիորեն բարձրացել է ոչ միայն երկրի քաղաքական կյանքում, այլ հասարակական կյանքի բոլոր ոլորտներում: Վերջին տարիներին նկատվում է նաև գործարար կանանց թվի զգալի աճ:

Կանանց միջազգային օրվա՝ Մարտի 8-ի կապակցությամբ, «Արմենպրես»-ը Հայաստանի քաղաքական կյանքում և հասարակական կյանքի այլ բնագավառներում կնոջ դերի և նշանակության, քաղաքական դաշտում կանանց առավել ներգրավվածության հնարավորությունների մասին զրուցել է ԱԺ կին պատգամավորների հետ:

Ազգային ժողովի ՀՀԿ խմբակցության պատգամավոր Կարինե Աճեմյանը կարծում է, որ վերջին տարիների ընթացքում Հայաստանում, ինչպես ամբողջ աշխարհում կանանց դերը գնալով ավելի ու ավելի կարևորվում է: «Ես ինքս համարում եմ, որ քաղաքականության մեջ սեռերի բաժանումը այնքան էլ ընդունելի չէ, որովհետև, եթե մարդը պրոֆեսիոնալ է, եթե մարդը գիտակցում է որտեղ է և ինչ գործիքներով պետք է աշխատի, ինչպես իրեն դրսևորի, որոշումների կայացման ժամանակ ինչպես պետք է կարողանա ինքնադրսևորվել, կանանց և տղամարդկանց հավասար իրավունքները պետք է պահպանվեն»,- ընդգծեց պատգա մավորը:

Նա հավելեց, որ քաղաքականության մեջ կանանց դերակատարությունը տարիների ընթացքում պիտի հաստատ, որովհետև քաղաքականությունը բարդ ոլորտ է, որտեղ շատ մեծ է պատասխանատվությունն ու մրցակցությունը: «Մենք այս օրերին էլ տեսնում ենք, որ տարածքային թեկնածուները ինչ դժվար ճանապարհ են անցնում, որպեսզի կարողանան կայանալ, բայց նաև հույս ունեմ, որ տարիների ընթացքում մեր կանայք էլ ավելի կամրապնդվեն, կկարողանան իրենց ներդրումն ունենալ քաղաքականության մեջ: Ես նկատում եմ, որ կանանց դերակատարումն այս ոլորտում իսկապես գնալով ավելանում է, և հենց կանայք ետք է կարողանան այնպես անել, որ իրենց մուտքը քաղաքականություն արդարացված լինի` նպատակաուղղված մեր երկրում առկա բոլոր խնդիրների լուծմանը»,- եզրափակեց պատգամավորը:

ՀՀԿ խմբակցության մեկ այլ պատգամավոր` Ռուզաննա Մուրադյանը կարևորում է քաղաքականության մեջ կնոջ դերն առաջին հերթին նրա համար, որ կինը լրացնում է տղամարդու գործունեությունը: «Քաղաքականության մեջ երկու սեռերի ներկայացվածությունը շատ կարևոր է, որովհետև այն, ինչ տեսնում և զգում է կինը, տղամարդը կարող է չզգալ, ուստի նրանք միմյանց փոխլրացնում են: Իսկ, ընդհանուր առմամբ կինը քաղաքականության մեջ խաղաղության ու հանդուրժողականության տարածող ու ներդրող է: Կնոջ դերը քաղաքականության մեջ կարևորվում է նաև նրանով, որ շատ ու շատ խնդիրներ, որոնք տղաարդկանց կողմից լուծվում այլ մեթոդներով, կանանց կողմից նման խնդիրները լուծվում են երկախոսության, բանակցությունների, համոզելու ճանապարհով»,- նշեց պատգամավորը:

Ռուզաննա Մուրադյանն այն կարծիքին է, որ կանայք իրենց պարտականությունները, իրենց վրա դրված խնդիրները մինչև վերջ կատարելու մեծ պատասխանատվություն ունեն: «Նրանք նաև համառություն ունեն իրենց վրա դրված պարտականությունները մինչև վերջ կատարելու և ցանկացած իրավիճակում հաղթանակած դուրս գալու առումով: Կարծում եմ, որ սրանք այն հատկանիշներն են, որոնք կարող են արդյունավետ ու օգտակար լինել քաղաքականության մեջ»,- նկատեց Մուրադյանը:

Պատգամավորը լավատես է ու հույս ունի, որ առաջիկա տարիներին Ընտրական օրենսգրքում կլինի նոր փոփոխություն, որտեղ այլևս խոսք չի լինի կուսակցությունների և կուսակցությունների դաշինքների ցուցակներում կամ խորհրդարանում կանանց ու տղամարդկանց որոշակի հարաբերակցության մասին:  Նա հույս ունի, որ կգա ժամանակ, երբ խորհրդարան մտնելու համար կպայքարեն բոլոր կարող ուժերը և այլևս սեռերի բաժանում չի լինի: