«Մենք գնում ենք առաջ. ես պատրաստ եմ, դուք պատրա՞ստ եք». Ռոբերտ Սարգսյանի կոչն Ավանի բնակիչներին

Այսօր Ավանի մշակույթի տանը մեկնարկեց թիվ 1 ընտրատարածքի Հանրապետական կուսակցության պատգամավորի թեկնածու Ռոբերտ Սարգսյանի նախընտրական քարոզարշավը և առաջին հանդիպումն Ավանի բնակիչների հետ:

Հանդիպմանը ներկա էին ԱԺ փոխնախագահ Էդուարդ Շարմազանովը, պատգամավորներ Գագիկ Մելիքյանն ու Վահրամ Մկրտչյանը: Ելութի սկզբում Ռոբերտ Սարգսյանը նախ շնորհավորել է դահլիճում ներկա կանանց և աղջիկներին` Մարտի 8-ի առթիվ, և մաղթել նրանց երջանկություն, առողջություն և հաջողություն բոլոր նախաձեռնություններում: «Քարոզարշավի մեկնարկը սկսում եմ Ավանից, որովհետև Ավանն իմ մեծ տունն է: Քաջատեղյակ եք, որ նոր ընտրակարգով ընդլայնվել է թիվ 1 ընտրատարածքը՝ ներառելով նաև Քանաքեռ-Զեյթուն և Նոր Նորք վարչական շրջանները: Այսպիսով մեր տունը մեծանում է»:

Ամփոփելով անցած չորս ու կես տարիների խորհրդարանական գործունեությունը, Ռոբերտ Սարգսյանն ընդգծել է, որ իր համար առաջնահերթը եղել է բնակիչների հետ անմիջական շփումը, ինչի ականատեսն ու վկան նախ և առաջ հենց ավանցիներն են: «Պատգամավոր լինելն ինձ համար երբևիցե ինքնանպատակ չի եղել: Այն եղել է ժողովրդին ծառայելու պատրաստակամություն, ինչն արել եմ մեծ պատասխանատվությամբ: Ու համոզված եղեք, որ միշտ պատրաստ եմ ծառայել մեր ժողովրդին»:

Ընդգծելով, որ ընտրողների վստահության քվեն ևս մեկ անգամ ստանալու դեպքում շարունակելու է աշխատել նույն ոգով ու նվիրումով, Ռոբերտ Սարգսյանն առաջարկել է ավանցիներին միասին ապահովել երկրի առաջընթացը:

«Չորս ու կես տարի իրար հետ առաջ ենք գնացել: Ես պատրաստ եմ, իսկ դուք պատրա՞ստ եք իրար հետ առաջ քայլելու», - հարցով եզրափակեց ելույթը Ռոբերտ Սարգսյանը, ինչին ի պատասխան հնչեց ավանցիների բուռն և երկարատև ծափահարությունները: Հանդիպմանը ներկա ԱԺ փոխնախագահ Էդուարդ Շարմազանովն էլ` խոսելով Ռոբերտ Սարգսյան թեկնածուի արժանիքների մասին, առանձնակի կարևորեց մարդկային այն որակները, որի իրական կրողն է հանդիսանում թեկնածուն:

 

«Ռոբերտ Սարգսյանը գործի մարդ է, պարկեշտ է ու մեր քաղաքական թիմի բոլոր առավելությունների կրողն է: Այս տարիների ընթացքում ապացուցել է, որ պառլամենտում ունի ոչ միայն քաղաքական մեծամասնության, այլ պատգամավորների ճնշող մեծամասնության համակրանքը: Ռոբերտ Սարգսյանի համոզմունքը, տեսլականն ու սկզբունքը հստակ է. Ազատ ու անկախ Հայաստան, հզոր Արցախ, Արցախ-Հայաստան-Սփյուռք ամուր կապ: Հետևաբար, Ռոբերտ Սարգսյանին ընտրելով՝ ընտրում ենք հզո՛ր Հայաստան, հզո՛ր Արցախ, հզո՛ր Սփյուռք», - նշել է Էդուարդ Շարմազանովը: Հանդիպմանը ներկա պատգամավորներ Գագիկ Մելիքյանն ու Վահրամ Մկրտչյանն էլ ներկայացրել են Ռոբերտ Սարգսյանի հետ անցած շուրջ երկու տասնամյակի պատմություն ունեցող քաղաքական ճանապարհը` ընդգծելով, որ բոլոր այդ տարիների ընթացքում բազում առիթներ են ունեցել համոզվելու նրա թե' մարդկային և թե' թիմային պարկեշտության մեջ:

«Մարդ, ով միշտ ժողովրդի կողքին է և հասանելի է բոլորի համար: Ռոբերտ ջան, քեզ հաղթանակ, մեզ բոլորիս հաղթանակ»,- ընդգծել է Գագիկ Մելիքյանը: