ՀՀ ԶՈւ-ն, ԼՂՀ ՊԲ-ն ստիպված են համարժեք պատասխան տալ Ադրբեջանի գործողություններին, որպեսզի «տաք գլուխները հովացվեն». Վիգեն Սարգսյան

Մենք ապրում ենք հետաքրքիր ժամանակներում, հետաքրքիր տարածաշրջանում, որտեղ փոփոխություններ են տեղի ունենում ներպետական, տարածաշրջանային, միջազգային հարթություններում: Այս մասին այսօր «Վալդայ» միջազգային բանավեճի ակումբի արտագնա նիստում, որն անցկացվում է Երևանում, հայտարարեց ՀՀ պաշտպանության նախարար Վիգեն Սարգսյանը: 

Տարածաշրջանին ամենակարևոր փոփոխությունը, ըստ Վ. Սարգսյանի, հենց տարածաշրջանի իդենտիֆիկացիան է: Ըստ նրա՝ ԽՍՀՄ փլուզումը, իրադարձությունները հետխորհրդային տարածքում ձևավորեցին նոր մոտեցում, ընկալում տարածաշրջանի նկատմամբ: 

«Հարևան Թուրքիան, Իրանը, Ռուսաստանը որդեգրեցին տարածաշրջանին նոր դեր: Մերձավոր Արևելքում տեղի ունեցած իրադարձություններն էլ, որոնք հեռու են թվում, ևս կարող են ազդեցություն ունենալ Հարավային Կովկասի վրա: Տարածաշրջանն ինքն իրեն սկսեց այլ կերպ ընդունել: Եթե ինձ հարցնեք, թե որն է տարածաշրջանում տեղի ունեցած ամենակարևոր փոփոխությունը, ես կասեմ, որ դա նույնականացումն է»,- ասաց Վիգեն Սարգսյանը: 

Միջազգային հարթությունն էլ, ըստ պաշտպանության նախարարի, փոփոխությունների ենթարկվեց, մեծացավ Չինաստանի դերը, փոխվեցին ԱՄՆ վարչակարգը, ՌԴ-Արևմուտք հարաբերությունները, ՌԴ-ԱՄՆ հարաբերությունները:

«Փոքր երկրներին նման իրավիճակում հեշտ չէ, որովհետև առաջանում են նոր մարտահրավերներ: Հայաստանն իր հետաքրքրությունները կառուցում է ոչ թե տարածաշրջանային, միջազգային խաղացողների շահերի հակադրությամբ, այլ՝ դրանց ընդհանրությունների համադրությամբ: Դա գուցե ավելի բարդ է, կարող է տպավորություն թողնել լղոզված չկողմնորոշվածության, բայց իրականում սա թույլ է տալիս աշխարհը չբաժանել սև ու սպիտակի, մենք կարծում ենք, որ 21-րդ դարը պետք է հագեցած լինի համագործակցության ներկապնակի մասով, պետք է ստեղծվեն համագործակցության լայն սահմաններ, որովհետև մարտահրավերները, որոնց առաջ մենք կանգնած ենք ավելի լայն են, քան առանձին պետությունները սահմանները»,- նշեց Վիգեն Սարգսյանը: 

Հայաստանի համար անվտանգության հասկացությունը, ըստ պաշտպանության նախարարի, կապված է ֆիզիկական գոյության հետ: «Հայաստանը շուրջ 29 տարի է ներգրավված է Լեռնային Ղարաբաղի ժողովրդի ֆիզիկական անվտանգության ապահովման գործընթացում: Ժողովրդի ինքնորոշման իրավունքի իրացման ճանապարհին նրանց դեմ կիրառվեց կոշտ ռազմական ուժ, ագրեսիա, այն իրավունքի դեմ, որը ամրագրված էր միջազգային փաստաթղթերում, սովետական օրենսդրությամբ, որի համաձայն ամեն ժողովուրդ կարող էր որոշել իր ճակատագիրը, ինքնորոշվել: Ցավոք, սակայն, այս իրավունքի իրացման ճանապարհին դրանց հակադրվեց ռազմական կոշտ ուժ և Հայաստանը ներգրավվեց հակամարտության մեջ՝ դառնալով ԼՂ ժողովրդի անվտանգության երաշխավորը»,– ասաց նա:

Վիգեն Սարգսյանը նշեց, որ չնայած սպառազինության այն տարբերություններին, որոնք մնացին ԽՍՀՄ փլուզումից հետո, չնայած մեծ տարբերության դեմոգրաֆիկ ցուցանիշներում, Լեռնային Ղարաբաղի ժողովուրդը կարողացավ պաշտպանել իր իրավունքն ու սահմանել պետության հստակ գործող մեխանիզմ՝ պարբերաբար անցկացնելով խորհրդարանական, նախագահական ընտրություններ, իսկ վերջերս՝ նաև սահմանադրական հանրաքվե: 

«Լեռնային Ղարաբաղը կարողացավ կառուցել տնտեսական զարգացման մեխանիզմ, որը դանդաղ, բայց վստահ է առաջ գնում, ժողովրդավարական ազատություններ, որոնք միանգամայն տարբերվում են նրանից, ինչ Ղարաբաղին ուզում են առաջարկել կամ փաթաթել հարևան Ադրբեջանից: Մենք ելնում ենք նրանից, որ ներկայիս իրավիճակի հիմքը շփման գծում 94թ.-ի Հրադադարի մասին միջազգային համաձայնագրի շրջանակներում ստանձնած պարտավորությունները հարգելն է, որի համաձայն հակամարտության կողմերը պարտավորվել են խաղաղ ճանապարհով լուծել հիմնահարցը: Բայց ադրբեջանական կողմը, ցավոք, ամեն օր, այսօր էլ, խախտում է հրադադարի ռեժիմը դիվերսիոն հարձակումների, կրակոցների միջոցով: Հայաստանի Զինված ուժերը, Լեռնային Ղարաբաղի պաշտպանության բանակը ստիպված են համարժեք պատասխան տալ, որպեսզի «տաք գլուխները» հովացվեն, շեշտվի, որ Լեռնային Ղարաբաղի հակամարտությունը ռազմական ճանապարհով լուծում չունի»,- շեշտեց Վիգեն Սարգսյանը: