Լուսինե Բադալյանի երեխաների անակնկալն ուղիղ եթերում և ամուսնու նվերը կադրից դուրս

Tert.am Life–ը գրում է

Մարտի 8–ից ապրիլի 7–ը Հայաստանում ընդունված է նշել կանանց միամսյակ։ Տղամարդիկ ջանք չեն խնայում իրենց կանանց շնորհավորել և գեղեցիկ անակնկալներ մատուցել։ Հաղորդավարուհի  Լուսինե Բադալյանը Tert.am Life–ի հետ զրուցում խոսել է միամսյակի, կնոջ խնդիրների և ստացած անակնկալների մասին։

 «Կնոջ իրավունքների մասին վերջերս շատ են խոսում։ Կարծում եմ, որ ամեն ինչ հենց կնոջից է կախված։ Բոլոր զարգացած երկրներում կնոջ ինքնադրսևորման համար պայմաններ են ստեղծված։ Եթե կինն ունի խնդիրներ, այդ հարցում մեղավոր է հենց ինքը, ոչ թե երկրի օրենքը կամ այլ գործոններ։ Իհարկե, սա իմ անձնական կարծիքն է։ Եթե կինն ինքն իրեն հարգում է, իր բոլոր պարտականությունները ճիշտ կատարում է, շատ հազվադեպ կտեսնենք, որ ճնշվում է հասարակության կամ տղամարդու կողմից։ Իհարկե, բացառություններ կան։ Հետևաբար` շատ լավ է, որ կանանց նվիրված տոն կա մեր երկրում, որը վերածվել է միամսյակի։ Լավ է, որ մեկ ամիս շարունակ խոսվում է կանանց մասին։ Բայց կնոջը շատ բան պետք չէ նրան պետք է ընդամենը սիրել և նա ամեն ինչ կանի։ Այդուհանդերձ, կինն էլ պետք է չմոռանա իր կոչման, պարտականությունների ու այն ամենի մասին ինչ պետք է, անպայման, անի»,– ասաց Լուսինեն։

 Նրա խոսքով` ինքը շատ դժվարությունների միջով է անցել, սակայն դրանք մարդկային դժվարություններ են, շատերն են անցել դրանց միջով։ «Եթե կինը ոտքի է կանգնում, ոչ ոք չի գցում նրան իր կանգնած տեղից, միայն նրա համար, որ նա կին է»,– նշեց հաղորդավարուհին։

 Վերջինիս համոզմամբ` կին լինելն ավելի դժվար է, քան տղամարդ։ «Թե՛ ֆիզիկապես, թե՛ հոգեպես կին լինելը դժվար է։ Նախ` զգացմունքային ծանրաբեռնվածությունը, հոգատարությունը, սերը, պատասխանատվությունը, որը կինը զգում է երեխաների նկատմամբ, հավասարաչափ են բաշխված զգացմունքային տեսանկյունից։ Կինը ոչ միայն աշխատում է ու փորձում ինտելեկտուալ ինչ–որ հարթության վրա պահել իրեն, այլև դրան ավելանում են մյուս հոգսերը՝ սկսած կենցաղային հարցերից վերջացրած երեխաների խնամքով։ Կարծում եմ՝ կանայք մեծ պատվով են կատարում իրենց պարտականությունները»,– դիտարկեց Լուսիեն։

 Հաղորդավարուհին ինքն իրեն անվանեց տարօրինակ մարդ, քանի որ որքան մեծանում է, այնքան սկսում է չսիրել տոները։ «Հատուկ օրերին ուշադրության կենտրոնում գտնվելը մի տեսակ անհարմարության մեջ է գցում ինձ։ Անընդհատ շնորհավորանքները սկսում են նյարդայնացնել։ Իհարկե, դա նորմալ չէ և դրա մասին գիտեմ, բայց չեմ սիրում ուշադրության կենտրոնում հայտնվել։ Լավ օր է, պետք է նման օրեր լինեն, որ կանանց շնորհավորեն, բայց ես անհամբերությամբ չեմ սպասում այս տոնին։ Օրեր կան, որոնց Մարտի 8–ից ավելի շատ եմ սպասում։ Այս տոնը պարտականության պես է։ Մեզ շնորհավորում են, մենք  էլ իրենց շնորհակալություն ենք ասում։ Դրան էլ նպաստել է Ֆեյսբուքն իր նշումներով»,– ասաց Լուսինեն։

Շարունակությունը՝ այստեղ