Սոնա Շահգելդյանը ապրիլ ամսին կդադարեցնի գործունեությունը

Երգչուհի Սոնա Շահգելդյանը ապրիլ ամսին կդադարեցնի իր ակտիվ գործունեությունը: Այս մասին Սոնան հայտնեց Life.panorama.am-ին եւ պատմեց առաջիկա ծրագրերի մասին.
 

«Այս պահին ակտիվորեն տարբեր համերգների եմ մասնակցում, որոնք հիմնականում նվիրված են կանանց մեկամսյակին: Միաժամանակ, նոր երգեր ու տեսահոլովակներ եմ պատրաստում, որոնք կներկայացնեմ արդեն մայիսին, քանի որ որոշում եմ կայացրել ապրիլին շատ պասիվ աշխատել ու այդպիսով իմ հարգանքի տուրքը մատուցել ապրիլյան քառօրյա պատերազմի զոհերին եւ Հայոց ցեղասպանության նահատկներին,- նշեց երգչուհին ու հավելեց.
 

«Ապրիլի վերջին օրերին եւ մայիսի սկզբին արտերկրում համերգներ են նախատեսվում: Բացի դա էլ հիմա աշխատում եմ շատ գեղեցիկ երգի վրա, որի խոսքերի հեղիանակը Գայանե Ավետիսյանն է,իսկ երաժշտությունը գրել է Արսեն Բարսամյանը: Այս երգը կունենա նաեւ տեսահոլովակ, որի համար արդեն իսկ որոշ կադրեր նկարված են: Ի դեպ` տեսահոլովակի ռեժիսորն է Սերժ Գաբյանը, ով ոչ միայն լավ ռեժիսոր է, այլեւ լավ մարդ: Նրա հետ առաջին անգամն եմ աշխատելու որպես ռեժիսոր, հուսամ` վերջինը չի լինի»:

Սոնա Շահգելդյանն այս ընթացքում ավելի շատ ժամանակ կտրամադրի բալիկին.
 

«Տղաս արդեն մեկ տարեկան երեք ամսական է: Շատ հետաքրքրասեր, ժպտերես ու չարաճճի փոքրիկ է, նաեւ շատ բարի: Նրա հետ ինձ լիարժեք եմ զգում` միասին խաղում ենք եւ երգում, ու թեեւ ես շատ եմ հոգնում, բայց սրանք ինձ համար հաճելի հոգսեր են»,- պատմեց երգչուհին:

 

 

Սոնա Շահգելդյանին հեռուստադիտողը այլեւս չի տեսնում «Դոմինո» սիթքոմում.
 

«Իմ սյուժետային գիծն արդեն ավարտված էր եւ ինձ հետ միասին էլի որոշ դերասաններ չմասնակցեցին նոր եթերաշրջանի նկարահանումներին: Միաժամանկ, պետք է հատուկ շեշտեմ, որ անձնակազմի հետ հիանալի հարաբերություններ ունենք ու անձնական ոչ մի խնդիր չի եղել: Ամեն դեպքում, ուրախ եմ, որ մարդիկ ինձ սիրեցին այս նախագծում, այսօր էլ նրանք կարոտում են ու շատ դեպքերում հարցնում այլեւս չնկարահանվելու պատճառների մասին»,- նշեց Սոնան:
 

Ի դեպ` մեզ հետ զրույցում Սոնա Շահգելդյանը նկատեց, որ արդեն իսկ այլ նախագծերից առաջարկներ ունի.
 

«Իհարկե, դեռեւս փակագծեր չեմ բացի, բայց միայն կասեմ, որ մեկ սիթքոմից եւ մի քանի գեղարվեստական ֆիլմերից արդեն առաջարկներ ունեմ, որոնք քննարկման փուլում են: Ի դեպ` առաջարկները միայն հումորային ժանրում չեն: Երբ վերջնական հայտարարի գանք, անպայման կբարձրաձայնեմ»,- հավելեց նա: