Արդեն հասանելի է հայերեն-չինարեն առաջին բառարանը

 Լիլիթ Հակոբյանի հեղինակած հայերեն-չինարեն առաջին բառարանի շնորհանդեսն անցկացվեց մարտի 29-ին` «Բուկինիստ» գրախանութում:

«2014 թվականին դասավանդում էի ԵՊՀ-ի միջազգային հարաբերությունների ֆակուլտետում: Չինարեն լեզվի առաջին դասախոսն էի: Անհրաժեշտ էր  հարստացնել ուսանողների դիվանագիտական բառապաշարը: Հենց այդ ժամանակ էլ որոշեցի բառարան կազմել, որը գործածական կլինի բոլորի համար: Գրքի վրա աշխատել եմ երկու տարի»,-«Արմենպրես»-ի հաղորդմամբ` նշեց բառարանի հեղինակ Լիլիթ Հակոբյանը:

Նրա խոսքով՝ իրեն այդ հարցում աջակցել է չինացի խմբագիրը, որը երկար տարիներ աշխատել է Հայաստանում: Լիլիթը շեշտեց, որ չինարեն է դասավանդում Երևանի մի քանի դպրոցներում և վստահ կարող է ասել, որ աշակերտների հետաքրքրությունը լեզվի նկատմամբ մեծ է:

«Բուկինիստ» գրախանութի տնօրեն Խաչիկ Վարդանյանը շնորհավորեց հեղինակին բառարանի լույս ընծայման կապակցությամբ և նշեց, որ բառարանը կարող է  մշտական գործածության գիրք դառնալ:

«Կոնֆուցիուս» ինստիտուտի չինացի տնօրեն Յան Մեյխուայը շեշտեց, որ իրենց համար դա մեծ տոն է, քանի որ առաջին անգամ է քաղաքական և դիվանագիտական տերմիններով հագեցած բառարան լույս տեսնում: «Սա մեծ նշանակություն ունի ոչ միայն ուսանողների, այլև այն մարդկանց համար, ովքեր ուսումնասիրում են մեր լեզուն»,-ասաց նա:

Բառարանը նախատեսված է չինարեն ուսումնասիրողների, լեզուն դասավանդողների, թարգմանիչների, դիվանագետների, լրագրողների, չինարենով հետաքրքրվող անձանց լայն շրջանակի համար:

Գրքում ընդգրկված են ոչ միայն չինական հիերոգլիֆներ, այլև լատինատառ արտասանության ձևեր «փինյին»-ով, ինչը զգալիորեն հեշտացնում է բառարանից օգտվելու կարգը:

Բառարանի հրատարակման անհրաժեշտությունը պայմանավորված է Հայաստանում չինական մշակույթի և չինարենի նկատմամբ հետաքրքրություն ցուցաբերող մարդկանց թվի աճով, ինչպես նաև հայերեն-չինարեն բառարանների բացակայությամբ: Բառարանը ներառում է դիվանագիտական և քաղաքական դաշտերում ամենագործածական տերմիններ և դրանցով բերված օրինակներ: 

Շնորհանդեսին Tea Studio Halabyan ստուդիայից Ալվինա Բաբասյանը ներկաներին ծանոթացրեց  չինական թեյախմության արվեստին:

Լիլիթ Հակոբյանը բաց դաս անցկացրերց և փորձեց չինարեն որոշ բաներ սովորեցնել15 րոպեում:

Շնորհանդեսի օրը դիվանագիտական և քաղաքական տերմինների հայերեն-չինարեն և ռուսերեն-չինարեն բառարանների համար 20 տոկոս զեղչ էր գործում:

Լիլիթ Հակոբյանը չինարեն ուսումնասիրում է 2009 թվականից: Սովորել է Վալերի Բրյուսովի անվան պետական լեզվաբանական համալսարանի «Կոնֆուցիուսի» ինստիտուտում:   Հետագայում աշխատել այդտեղ, ԵՊՀ-ում: Ներկայումս աշխատում է  Երևանի մի քանի դպրոցներում՝ իր գիտելիքները փոխանցելով հանրությանը: