Ավետիք Իշխանյան. «Եթե ընդդիմությունն իշխանությունների խաղի կանոններն ընդունի, դա նշանակում է, որ ի սկզբանե պարտված է». «Փաստ»

«Փաստ» օրաթերթը գրում է.

Կրթության ոլորտի վարչական ռեսուրսն ի շահ ընտրությունների օգտագործելու մասին շատ է խոսվել: Իսկ իշխանությունները նման խոսակցությունների ժամանակ մշտապես հակադարձել են, թե եթե կան փաստեր, ապա կարող են դրանք ներկայացնել: Ընդդիմադիրներին երկար ժամանակ չէր հաջողվում ծանրակշիռ փաստեր ներկայացնել, սակայն այս անգամ, պատկերը փոխվեց: Եվ հիմա արդեն փաստերով բոլորին պարզ դարձավ, որ մայրաքաղաքի և մարզերի տասնյակ դպրոցների և մանկապարտեզների տնօրեններ հաստատել են, որ այս ընթացքում զբաղված են ՀՀԿ–ի համար ցուցակներ կազմելով:

Եվ փաստորեն, թվով 84 դպրոցի և 30 մանկապարտեզի տնօրենի կողմից մանրամասն ներկայացրածը, թե ինչպես են ընտրողներին հավաքագրել ցուցակներ կազմել և դրանք ինչ են արել, ՀՀԿ–ի համար կրկին «փաստեր» չեն համարվում: Նշենք նաև, որ հարցվածներից ընդհամենը 22 տնօրեն է ասել, որ ՀՀԿ–ի համար ցուցակներ կազմելով և մարդկանց հավաքագրելով չեն զբաղվում: Ի դեպ, այս բացահայտմամբ պարզ է դարձել նաև, որ դպրոցների ցուցակներում ընդգրկված մարդկանց թիվը միջինում կազմել է 240, իսկ մանկապարտեզներինը՝ 150 մարդ, որտեղ հիմնականում ընդգրկված են եղել երեխաների ծնողները, իսկ Գյումրու թիվ 37 դպրոցի տնօրենն ընդունել է, որ մարդկանց վախեցնելու միջոցով է պարտադրում անպայման Հանրապետականին ընտրել։

«Հայաստանի Հելսինկյան կոմիտե» իրավապաշտպան հասարակական կազմակերպության նախագահ Ավետիք Իշխանյանը «Փաստի» հետ զրույցում նշեց, որ ամենակարևորն այն է, որ նախ հարկավոր է հասկանալ, թե ընդհանրապես ինչ բնույթի պետությունում ենք մենք ապրում:

«Եթե երկիրն իրավական է լինում, ապա այնտեղ գործում են օրենքները, իսկ ոչ իրավական երկրներում թեև լինում են օրենքներ, սակայն, որպես կանոն, դրանց առջև բոլորը չէ, որ հավասար են լինում: Հայաստանում ողջ դատաիրավական համակարգը Սահմանադրությամբ և օրենքներով սերտաճած է գործադիրի հետ: Այսինքն՝ տվյալ պարագայում մենք կարող ենք ոչ միայն խոսել, թե վարչական ռեսուրսի կիրառման, մարդկանց ցուցակագրելու, տվյալները հավաքագրելու, փոխանցելու, ընտրություններին իրենց թեկնածուի օգտին քվեարկել պարտադրելու դեպքում ինչ օրենքներ են խախտվել, այլ պետք է հասկանալ նաև, որ դա առաջին հերթին քաղաքական կոռուպցիայի արդյունք է»,– ասաց Ա. Իշխանյանը:

Ի դեպ, Քրեական օրենսգրքով նույնպես մարդկանց տվյալների հավաքագրման, վարչական ռեսուրսի օգտագործման և այլ նմանատիպ երևույթների համար պատիժ է նախատեսվում և կազմակերպության նախագահի կարծիքով՝ պատասխանատվության պետք է ենթարկվեն ոչ միայն դպրոցների ու մանկապարտեզների տնօրենները, այլ՝ նրանց հանձնարարողներից կազմված վարչական բուրգի բոլոր անդամները:

«Այս ամեն ինչը պարզ է նույնիսկ միջին մակարդակի իրավաբանի համար և յուրաքանչյուրը կարող են ասել, թե նման դեպքերում որ օրենքների որ հոդվածներով ինչ պատիժ է սահմանված: Սակայն այս ամենը որևէ կապ չունի մեր իրականության հետ, քանի որ այն մարմինները, որոնք պետք է զբաղվեն այս փաստերի մեկնաբանմամբ, նրանք նույնպես զբաղված են այն գործով, ինչով որ մանկապարտեզների տնօրենները: Ըստ օրենքների՝ մարզպետարանների, քաղաքապետարանների կողմից են նրանց նման բան հանձնարարել և նրանք բոլորը պետք է քրեական պատասխանատվության ենթարկվեն, իսկ ՀՀԿ–ն էլ պետք է դուրս մղվի մրցապայքարից»,– ասաց Ա. Իշխանյանը:

«Հայաստանի Հելսինկյան կոմիտեի» նախագահը նաև տարակուսանք հայտնեց, թե արդյոք այն նույն կենտրոնը, որը ինչպես մանկապարտեզների և դպրոցների տնօրեններին, շտաբերի պետերին, քաղաքապետերին և իրավապահ մարմիններին հրահանգել է ընտրողներին ցուցակագրել և վարչական ռեսուրս կիրառել, նույն կատարողներին կպատժի իր հանձնարարականը կատարելու համար: Ուստի այս պարագայում միամտություն կլինի մտածելը, որ եղած օրենքները կարող են գործել: Նա նաև ընդունելի չի համարում քաղաքական հաշվեհարդարը, որի շրջանակներում այսօր արդեն սկսել են կրթության նախարարի հրաժարականը պահանջել:

Ա. Իշխանյանը նշեց նաև, որ բոլոր պետական մարմինները, այդ թվում Դատախազությունը և ԿԸՀ–ն, այս պահին ընդամենը զբաղված են գործն ուսումնասիրելով:

«Եթե ընդդիմությունն ընդունում է իշխանությունների խաղի կանոնները և այս պայմաններում համաձայնում է մասնակցել ընտրություններին, նշանակում է, որ ընդդիմությունն ի սկզբանե պարտված է»,– ասաց Ա. Իշխանյանը:

Շարունակությունը` «Փաստ» օրաթերթի այսօրվա համարում: