«Հուսով եմ՝ կյանքում ինչ-որ բանի կհասնի՝ այդպես արտահայտվելով երիտասարդ մարդկանց մասին». Տաթև Հովակիմյանը՝ «Արտավազդ» մրցանակաբաշխության և իր հասցեին հնչած քննադատությունների մասին

Exclusive

Թատրոնի միջազգային օրը՝ մարտի 27-ին, կայացավ «Արտավազդ» ամենամյա մրցանակաբաշխությունը, որն այս տարի նվիրված էր հայ անվանի դերասան Էդգար Էլբակյանի 90-ամյակին:

Տարվա լավագույն երիտասարդ դերասանուհի անվանակարգում այս անգամ հաղթող ճանաչվեց Տաթև Հովակիմյանը՝ «Խոսիր ինձ հետ» ներկայացման դերի համար:

Past.am-ը որոշեց շնորհավորել դերասանուհուն.

«Ինձ համար շատ անսպասելի էր ու շատ հաճելի: Երբ գործընկերուհիս արձագանքեց, նոր հասկացա, որ իմ անունն են կարդացել: Ճիշտ է, հանդիսատեսը քեզ գնահատում է, բայց երբ լսում ես անունդ, ևս մեկ անգամ քեզ գնահատված զգալու առիթ ես ունենում: Հետաքրքիր զգացողություններ ունեցա»,- մեզ հետ զրույցում նշեց Տաթևը:

Հատկանշական է, որ տարվա լավագույն երիտասարդ դերասան անվանակարգում էլ հաղթող ճանաչվեց նույն ներկայացումից Դավիթ Սարգսյանը: Երիտասարդ դերասանուհին սա պատահական չի համարում.

«Թատրոնն ու կինոն անսամբլային աշխատանք են: Չեմ կարծում, որ արվեստի այս ճյուղերի մեջ որևէ մեկը կարողանա անհատապես գոյատևել: Օրինակ՝ նկարիչը կարող է, ինքն է իր կտավն ստեղծում, բայց մենք մեր կտավն ստեղծում ենք միասին՝ թե՛ խաղընկերոջ, թե՛ ռեժիսորի, թե՛ նկարչուհու, լույսը վարողի կամ կուլիսներում աշխատողի հետ: Այս մրցանակը ռեժիսորի՝ Սամսոն Մովսիսյանի աշխատանքի արդյունքն էր, ինչպես նաև՝ դերասանների խաղի: Հաջողությունը գալիս է միասնական աշխատանքի շնորհիվ»:

Մրցանակաբաշխության արդյունքները բուռն քննարկումների տեղիք տվեցին համացանցում, եղան ինչպես դրական, այնպես էլ բացասական կարծիքներ: Մասնավորապես, լրագրող, վերլուծաբան Արթուր Հայրապետյանը ֆեյսբուքյան իր ">էջում ընդգծված կերպով վատ էր արտահայտվել թե՛ մրցանակաբաշխության, թե՛ հաղթողների, այդ թվում՝ Տաթևի մասին:

Անդրադառնալով գրառմանը՝ Տաթևը մեկնաբանեց.

«Անկեղծ ասած՝ չգիտեմ, թե Արթուր Հայրապետյանն ով է: Ֆեյսբուքյան իմ էջը փակ է, ես լուրեր չեմ ընթերցում, բայց երեկ երեկոյան ինձ ուղարկեցին նրա գրառումը: Ինձ համար առաջին հերթին ծիծաղելի էր, որ նա ապատեղեկատվություն է տարածում՝ նշելով, որ ես տարվա լավագույն դերասանուհի եմ ճանաչվել, այն դեպքում, երբ ինձ մրցանակ են տվել տարվա երիտասարդ դերասանուհի անվանակարգում: Լավագույն դերասանուհի ճանաչվել է Ջուլիետա Ստեփանյանը:

Արթուրի խնդիրն է, որ ինձ երբևէ չի տեսել թատրոնում, թող հաճախի թատրոններ: Ես արդեն հինգ տարի է՝ ինչ աշխատում եմ թատրոնում: Կարելի է ուսումնասիրել, հետո նման ձևով արտահայտվել: Իսկ, առհասարակ, կարծում եմ՝ արդեն վատ է, որ տղամարդն այդպես է արտահայտվում երիտասարդ դերասանուհու մասին:

Անկեղծ ասեմ՝ ես ոչ տանջվեցի, ոչ էլ տառապեցի նրա գրածից, որովհետև շատ հաճելի մարդկանցից լսել եմ շատ հաճելի շնորհավորանքներ և կարծում եմ՝ Արթուրն այդ մարդկանց հասնելու համար դեռ շատ ճանապարհ ունի անցնելու: Ամեն դեպքում՝ դա նրա կարծիքն է, որը ես հարգում եմ, հաջողություն իրեն ու հուսով եմ՝ կյանքում ինչ-որ բանի կհասնի՝ այդպես արտահայտվելով երիտասարդ մարդկանց մասին»:

Իսկ այն հարցին, թե առհասարակ ինչ կարծիք ունի տիտղոսների մասին և ինչպես է վերաբերվում դրանց, Տաթևը պատասխանեց.

«Հենրիկ Մալյանի խոսքերը հիշեցի՝ «Թատրոնն առաջ էր թատրոն, հիմա այստեղ միայն տիտղոսներ կրող մարդիկ են»: Ես իհարկե դեմ եմ, որ դերասանը տիտղոսի համար պայքարի, փորձի ամեն գնով ստանալ: «Արտավազդ» մրցանակաբաշխությանն ինձ էլ, Դավիթին էլ պարոն Բաբայանն է ներկայացրել, իսկ նա այն արվեստագետն է, ով գիտի՝ երբ, որտեղ, ինչ ներկայացնի:

Ես համաձայն եմ, որ շատ ժամանակ պայքար է գնում տիտղոսների համար, բայց եթե դու արդարացիորեն մրցանակ ես ստանում, դա շատ հաճելի է՝ որպես արածդ գործի վաստակ: Ավել բան մրցանակը չի կարող տալ, եթե դու ոչինչ ես: Ժամանակը ցույց կտա՝ դու ինչ-որ բան անու՞մ ես մրցանակն ստանալուց հետո, թե դա մնում է միայն որպես մրցանակ՝ ստացած այսինչ թվին: Իսկ չարախոսել, իրար ուտել պետք չէ, թողեք՝ անցնի, գնա»:

 

Մարիամ Նալբանդյան