Ներկայացրել ենք որակ և կյանք փոխող ծրագիր. Կարեն Կարապետյան

ՀՀ վարչապետ, Հանրապետական կուսակցության նախագահի առաջին տեղակալ Կարեն Կարապետյանը վստահ է՝ հայ ժողովուրդն ունի մեծ ներուժ երկիրը դարձնելու ֆանտաստիկ երկիր: Այդ մասին վարչապետը նշեց Կարեն Դեմիրճյանի անվան մարզահամերգային համալիրում նախընտրական քարոզարշավի ամփոփիչ միջոցառման ժամանակ: «Այս մեկ ամսվա ընթացքում շրջելով Հայաստանով, հանդիպելով, խոսե լով մեր ժողովրդի հետ, ինքս ինձ համար վերահաստատել եմ մի պարզ ճշմարտություն՝ մենք տաղանդավոր ժողովուրդ ենք, մենք ունենք մեծ ներուժ մեր երկիրը դարձնելու ֆանտաստիկ երկիր:  Չկա որևէ պատճառ, որ այդպես չլինի: Մեր Հայաստանը լինելու է ժամանակակից, զարգացող և առաջ շարժվող, տրամաբանական և օրենքի երկիր, պահպանելով մեր ավանդույթները, ինքնատիպությունը, մեզ համար հարազատ միջավայրը,  միևնույն ժամանակ, լինելով բաց և հասկանալի աշխարհի համար: Այսօր մենք ունենք երիտասարդ, ընդամենը 25 տարվա անկախ պետություն, բայց այն քիչ հին ազգերից ենք, որ հազարամյակերի միջով անցնելով, ունենք պետականություն»,-«Արմենպրես»-ի հաղորդմամբ, ասաց Կարեն Կարապետյանը:

ՀՀ վարչապետը, ամփոփելով քարոզարշավը, խոստովանեց, որ ինքն իր հետ շատ համերաշխ է, որովհետև չկա մի բան, որ ասել է և որի համար պատրաստ չէ պատասխանել տալ: «Հանդիպումների ժամանակ չեմ հրապուրվել նրանով, որ դիմացինիս ասեմ մի բան, որ նրան դուր գա, եղել ենք ազնիվ և անկեղծ: Այդ նույն սկզբունքները դրել ենք մեր ծրագրի և գործողությունների մեջ: Սիրելի ժողովուրդ, այսօր ներկայացում ենք մի ծրագիր, որն ունի բոլոր այն հատկանիշները, որոնք առանձնահատուկ են որակ փոխող, կյանք փոխող ռեֆորմներին: Այն  հավակնոտ է և համարձակ, այն իրատեսական է և ռացիոնալ, մենք ւնենք կամք և համառություն՝ այն իրականացնելու: Մենք ակնկալում ենք ձեր աջակցությունը ոչ միայն ապրիլի 2-ին՝ ձեր ակտիվ քաղաքացիական դիրքորոշումը դրսևորելով, այլ նաև ապրիլի 2-ից հետո՝ ձեր արժանապատիվ մասնակցությունն ունենալով մեր նոր Հայաստանը կառուցելու քրտնաջան աշխատանքում: Մենք միասին պետք է անցնենք այդ ճանապարհը և այդ ճանապարհին ՀՀԿ-ն պատրաստ է ձեր կողքին լինել ու պատասխանատվությունը վերցնել իր վրա»,- ընդգծեց ՀՀԿ նախագահի առաջին տեղակալը՝ հավելելով, որ հասարակությունն ապրիլի 2-ին որոշելու է վաղվա Հայաստանը:

Հայաստանում Ազգային ժողովի հերթական ընտրությունները կկայանան ապրիլի 2-ին: Նախընտրական քարոզարշավը մեկնարկել է մարտի 5-ից և կշարունակվի մինչև մարտի 31-ը: Ազգային ժողովի ընտրություններին մասնակցելու համար գրանցվել է 9 քաղաքական ուժ, որից 5-ը կուսակցություններ են, 4-ը դաշինք: Ազգային ժողովի ընտրություններին կմասնակցեն Հայաստանի Հանրապետական, «Հայկական վերածնունդ», Հայաստանի Կոմունիստական, Հայ Յեղափոխական Դաշնակցություն, «Ազատ դեմոկրատներ» կուսակցությունները, ինչպես նաև «Ծառուկյան», «Ելք», Կոնգրես-ՀԺԿ և «Ելք&r aquo; դաշինքները: