Սամվել Ֆարմանյանը ԵԽԽՎ-ի ուշադրությունն է հրավիրել Ադրբեջանում ֆաշիստական նոր ռեժիմի ձևավորման հնարավորության վրա

 Եվրոպայի խորհրդի խորհրդարանական վեհաժողովի հայաստանյան պատվիրակության անդամ Սամվել Ֆարմանյանը, ելույթ ունենալով Եվրոպական ժողովրդական կուսակցության խմբի անունից, վեհաժողովի ուշադրությունն է հրավիրել Ադրբեջանում մարդու իրավունքների և հիմնարար ազատություների խախտումների վրա՝ հիշեցնելով, որ Ադրբեջանի նախագահ Իլհամ Ալիևի ռեժիմի ավելի քան 100 քաղաքական հակառակորդներ անազատության մեջ են, քանի որ բարձրաձայնել են Ադրբեջանում մարդու իրավունքների կոպիտ խախտումների մասին: Սամվել Ֆարմանյանը վեհաժողովին կոչ է արել ուշադրություն դարձնել այս փաստերի վրա, որպեսզի Արևելյան Եվրոպայի մեծ ընտանիքում նոր ֆաշիստական ռեժիմ չբյուրեղանա:

«Ստրասբուրգում վերջին օրերի ամենաքննարկվող թեման փախստականների ճգնաժամն է: Այդ հարցը լայն  քննարկման առարկա է դարձել  է նաև Նյու Յորքում ՄԱԿ-ի գագաթնաժողովի ընթացքում: Մենք քննարկում ենք մի իրավիճակ, երբ հարյուր հազարավոր փախստականներ բախում են Եվրոպայի դռները՝ փորձելով պահպանել իրենց ամենահիմնարար՝ կյանքի իրավունքը: Որքանո՞վ ենք մենք համակողմանիորեն անդրադառնում այս ամենի պատճառներին: Չպե՞տք է արդյոք մենք անդրադառնանք այն պատճառներին, որ հանգեցնում են նման իրավիճակի և դիմակայենք դրանց: Այս ամենի պատճառներից են փակ հասարակությունները, կառավարման ավտորիտար ձևերը, բռնապետության հետևանք հանդիսացող մարդու իրավունքների և հիմնարար ազատությունների խախտումները, ֆաշիստական ռեժիմին բնորոշ այլատյացությունը և ատելության սերմանումը, որոնք կարող են տառապանքներ պատճառել միլիոնավոր մարդկանց: Արդեն չորրորդ օրն է, ինչ ես անցկացնում եմ վեհաժողովում, և որտեղ որ եղել եմ՝ կլինեն քաղաքական խմբեր, թե հանձնաժողովներ, կամ լիագումար նիստերի ընթացքում ես լսում եմ միայն Ադրբեջանի մասին: Մենք պետք է ուշադրություն դարձնենք այն փաստի վրա, որ միայն մենք չէ, որ խոսում ենք Ադրբեջանում մարդու իրավունքների կոպիտ խախտումների մասին: Ալիևի ռեժիմի 100-ից ավելի քաղաքական հակառակորդներ այս պահին անազատության մեջ են, իսկ իմ ադրբեջանցի գործընկեր պարոն Հուսեյնովը ծափահարում է Հայաստանի ընդդիմության առաջնորդներից մեկին, ով այստեղ ելույթ է ունեցել Հայաստանում սահմանադրական բարեփոխումների գործընթացի վերաբերյալ: Մենք ցանկանում ենք վայելել ադրբեջանցի ընդդիմադիրներին ծափահարելու հաճույքը, ովքեր ելույթ կունենան վեհաժողովում. Կքննադատե՞ն նրանք իրենց կառավարությանը, թե ոչ»,-  իր ելույթում ասել է Ֆարմանյանը:

Պատգամավորը նկատել է, որ Ադրբեջանում տնտեսության վիճակը վատթարացել է, քանի որ անկում են ապրել նավթի գները, իսկ նրանց տնտեսությունը հիմնված է նավթի պաշարների վրա: Նա նաև նշել է, որ Ադրբեջանում մոտենում են խորհրդարանական ընտրությունները, որի նախաշեմին Ադրբեջանի նախագահը մեծացնում է հակաեվրոպական հռետորաբանությունը՝ քննադատելով եվրոպական բոլոր կառույցներին, հակահայկական քարոզչությունը, շարունակում է ազատազրկել մարդու իրավունքների պաշտպան ակտիվիստների,  ինչպես նաև սրում է իրավիճակը ԼՂ հակամարտության գոտում:

«Եզրակացությունը մեկն է՝ մենք պետք է ուշադրություն դարձնենք բոլոր այս փաստերի վրա, որպեսզի կանխենք Արևելյան Եվրոպայի մեծ ընտանիքում նոր ֆաշիստական ռեժիմի ձևավորումը»,- եզրափակել է Սամվել Ֆարմանյանը: