Գրողների միությունում հարգեցին Հրաչյա Մաթևոսյանի հիշատակը

 Արձակագիր, հրապարակախոս, լրագրող Հրաչյա Մաթևոսյանի 80-ամյակին նվիրված հիշատակի ցերեկույթն անցկացվեց ապրիլի 11-ին` Հայաստանի գրողների միությունում:

«Հրաչյա Մաթևոսյանն իր գործերում անդրադառնում էր ժամանակի հրատապ խնդիրներին և ժողովրդական կենսափիլիսոփայության կրող էր»,-«Արմենպրես»-ի հաղորդմամբ` նշեց Հայաստանի գրողների միության նախագահ Էդվարդ Միլիտոնյանն ու հավելեց, որ երբ Հրաչյա Մաթևոսյանն ընթերցում էր որևէ մեկի ստեղծագործությունն ու հավանում այն, անպայման արտահայտվում էր: «Հրաչյա Մաթևոսանն աննման մարդ էր, սիրելի բոլորի կողմից»,-եզրափակեց նա: 

ՀՀ գրողների միության քարտուղար, գրականագետ, թարգմանիչ, Պետրոս Դեմիրճյանն ասաց, որ Հրաչյա Մաթևոսյանի հետ կապված լավ հիշողություններ ունի: «Տարբեր հանգստյան տներում ենք եղել, և կարող եմ ասել, որ նա պաշտում էր բնությունն ու կնոջը հորդորում երեխաների հետ հաճախ ժամանակ անցկացնել բնության գրկում: Կարծում եմ, որ դա պայմանավորված էր նրանով, որ Հրաչյան Լոռվա բնաշխարհում էր ծնվել»,-ընդգծեց նա:

Դեմիրճյանի խոսքով` Մաթևոսյանն իր բոլոր մտահոգութուններն արտահայտել է իր ստեղծագործութուններում:

«Երբ իմացա, որ Հրաչյան Հրանտ Մաթևոսյանի եղբայրն է, սկսեցի հետևել նրա գործունեությանը: Նրա ստեղծագործություններում հստակ կարելի է տեսնել մեր կյանքը 90-ական թվականներից մինչ օրս: Մաթևոսյանները հոգևոր հարստություն են տվել մեր ազգին»,-ասաց գրականագետ Աելիտա Դոլուխանյանը:

Նա ընդգծեց, որ Մաթևոսյանների ընտանիքը հավանաբար երջանիկ է, որ նման մեծեր է տվել հայ ժողովրդին:

Միջոցառմանը ներկա էին գրողի հարազատները, գործընկերները, գրողի ստեղծագործության երկրպագուներ:

Հրաչյա Մաթևոսյանը 1955 թվականին ավարտել է Երևանի արհեստագործական 3-րդ ուսումնարանը և Երևանի տպարաններում աշխատել որպես գրաշար։ 1962 թվականին ընդունվել և 1966-ին ավարտել է Երևանի համալսարանի ժուռնալիստիկայի ֆակուլտետը։

Երկար տարիներ աշխատել է Հայաստանի կույրերի միավորման հրատարակչությունում և մամուլում «Ավանգարդ», «Հայրենիքի ձայն», «Հայաստան»։ Նրա պատմվածքները, հոդվածները, հարցազրույցները տպագրվել են հանրապետական մամուլում, գրական հանդեսներում։

Հրատարակվել են նրա «Մաճկալներ» (պատմվածքներ, 1978թ.), «Բարի մարդկանց հովիտը» (վիպակներ և պատմվածքներ, 1982թ.), «Աստղերի հետ թռչում էր իմ ձին» (պատմվածքներ, 1983թ.), «Ալևորներ» (վիպակ և պատմվածքներ, 1984թ.), «Գունավոր փոքրիկ Ջեկսին» (մանկական պատմվածքներ, 1986թ.), «Մոլորյալ ժամ» (1999թ.), «Խաչքար Հայաստան» (2002թ.), «Սիրով։ Էջեր» («Սիրո մատյան» գրքից, 2003թ.), «Տուն մոր համար» (վիպակ, 2003թ.), «Սարերիդ նման դու հպարտ ապրիր» (2004թ.), «Կայծահեղ Հրանտ» (2005թ.), «Սարաշեղջ Արագած» (2006թ.) գրքերը: