Կոմիտասի անվան ազգային լարային քառյակը վառ տպավորություններով է վերադարձել Լոռվա մարզից

Վաստակավոր կոլեկտիվ Կոմիտասի անվան ազգային լարային քառյակը 2017 թվականի ապրիլի 5-7-ը "Մշակութային կանգառ" ծրագրի շրջանակում համերգներով հանդես եկավ Լոռու մարզում:

«Արմենպրես»-ի հաղորդմամբ`առաջին համերգը տեղի ունեցավ Դսեղ գյուղի մշակույթի տանը: Այն նվիրված էր հայոց մեծ բանաստեղծ Հովհաննես Թումանյանին, որի 150-ամյա հոբելյանը կնշվի 2019 թվականին: Քառյակի անդամներն այցելեցին Հովհաննես Թումանյանի տուն-թանգարան, որտեղ  հարգանքի տուրք մատուցեցին Մեծն լոռեցու հիշատակին, մի անգամ ևս հաղորդակից եղան նրա հոգևոր աշխարհին:

Երկրորդ համերգն Ալավերդի քաղաքի Ռոմանոս Մելիքյանի անվան երաժշտական դպրոցում էր: Այն նվիրվեց քառյակի հիմնադիր, թավջութակահար, մանկավարժ, ՀԽՍՀ ժողովրդական արտիստ, ԽՍՀՄ պետական մրցանակի դափնեկիր Սարգիս Ասլամազյանի ծննդյան 120-ամյակին:

Համերգից հետո դպրոցի տնօրեն Հռիփսիմե Շահինյանը Ալավերդու համայնքի ղեկավար Կարեն Փարեմուզյանի անունից հայ և համաշխարհային երաժշտության արժեքները աշխարհին և հայ ժողովրդի ամենալայն զանգվածներին մատուցելու, ինչպես նաև "Մշակութային կանգառ" ծրագրի շրջանակում ալավերդցիներին բարձր արվեստին հաղորդակից դարձնելու համար քառյակին պարգևատրեց համայնքապետի շնորհակալագրով:

Ալավերդու ճանապարհին տեղի ունեցավ կանգառ Օձունի 6-րդ դարի հռչակավոր եկեղեցու մոտ, որտեղ հոգևոր հովիվ Տեր Վրթանես քահանա Բադալյանը ներկայացրեց եկեղեցու պատմությունը, ծանոթացրեց նորոգման-աշխատանքներին: Նույն քառյակն այցելեց Վանաձորի Էդուարդ Կզարթմյանի անվ. N 1 երաժշտական դպրոց: Վանաձորում խորին երախտագիտությամբ և հարգանքով են հիշում Էդուարդ Կզարթմյանին: Դպրոցը 1977 թվականից կրում է նրա անունը: Այն բարձրաճաշակ մշակութային օջախ է Վանաձորում:

 Լոռվա համերգային շրջագայությունն ավարտվեց ապրիլի 7-ին Սպիտակի երաժշտական դպրոցում:

Մինչ համերգը քառյակի անդամները քաղաքի կենտրոնում կանգնեցված հուշարձանների մոտ ծաղիկներ դրեցին`խոնարհվելով 1988 թվականի ահեղ երկրաշարժի անմեղ զոհերի և 2016 թվականի ապրիլյան քառօրյա պատերազմի զոհված հերոսների հիշատակին:

Սպիտակի համերգից առաջ քառյակի լրատվության պատասխանատու Կարեն Քոչարյանը շնորհավորեց դահլիճում ներկա գտնվող գեղեցիկ սեռի ներկայացուցիչներին Մայրության և գեղեցկության օրվա կապակցությամբ: Ներկաներին քառյակի կողմից ծաղիկներ մատուցվեցին: Իսկ համերգը նվիրվեց Սպիտակ քաղաքի պատվավոր քաղաքացի ՀՀ ժողովրդական արտիստ Ռուբեն Մաթևոսյանի ծննդյան 75-ամյակին:

Համերգից հետո քառյակին հրավիրեցին երաժշտական դպրոցի հարևանությամբ գտնվող Սպիտակի գեղարվեստի դպրոց, որը հիմնվել է 1979 թվականին: Դպրոցի երիտասարդ տնօրեն Արփինե Հովսեփյանը ոգևորված պատմեց կրթամշակութային օջախի մասին, ներկայացրեց երեխաների աշխատանքները:

Կրթօջախի պատմության մեջ իր անուրանալի վաստակն ունի անվանի նկարիչ, դոցենտ Արտաշես Հունանյանը (ծննդով Սպիտակի շրջանի Ծաղկաբեր գյուղից), որի անունով էլ ցանկանում են կոչել դպրոցը:

Կոմիտասի անվան ազգային քառյակը ջերմ տպավորություններով վերադարձավ Լոռու մարզից:

Քառյակի անդամները շնորհակալություն են հայտնում երաժշտական բոլոր հաստատությունների, դպրոցների ղեկավարներին և կոլեկտիվներին, վարչական աշխատողներին` աջակցության համար:

Հունիսի 23-ին քառյակը հանդես կգա Արմավիրի արվեստի դպրոցում և Նալբանդյան գյուղի մշակույթի տանը: