Աշոտ Բարսեղյան. Մեծ դժվարությամբ ենք միավորներ վաստակում

Հայաստանի Բարձրագույն խմբի առաջնության 9-րդ տուրում սեփական հարկի տակ «Ալաշկերտի» հետ ոչ-ոքիից հետո խաղի վերաբերյալ իր կարծիքն է հայտնել «Գանձասար Կապանի» գլխավոր մարզիչ Աշոտ Բարսեղյանը.

- Խաղի մասին ի՞նչ կարող եք ասել:

- Բավականին լարված հանդիպում ստացվեց, երկու թիմերն էլ լավ ֆուտբոլ ցուցադրեցին: Ցավոք, ինչպես «Շիրակի» հետ հանդիպման պարագայում, այս խաղում նույնպես ոչ-ոքի գրանցեցինք ու չկարողացանք հաղթել՝ չնայած որ առավելություն ունեինք: Պարզապես շնորհավորում եմ տղաների լավ ֆուտբոլի համար:

- Առաջին խաղակեսի ընթացքում տեղի ունեցած վիճաբանության մասին ի՞նչ կարող եք ասել:

- Սա ֆուտբոլ է ու նման բաներ պատահում են, խաղային դրվագում Տիգրան Բարսեղյանը ընկավ գետնին, ու ամենևին անհրաժեշտություն չկար նրա «վրա» բարձրանալու: Երկու կողմերի խաղացողներն էլ տաքացան, տրվեցին զգացմունքներին արդյունքում էլ եղավ այն, ինչ եղավ:

- Այս խաղով տնային 3 խաղերի շարքն ավարտվեց, 9 հնարավորից կապանյան թիմը վաստակեց միայն 5, արդյունքը գոհացուցի՞չ է:

- Մենք նախքան այս շարքի մեկնարկը որոշել էինք, որ պետք է ամեն ինչ անենք 9 միավոր վաստակելու համար. ցավոք՝ չստացվեց: Բայց տղաները 3 խաղերի ընթացքում մեծ ծավալի աշխատանք կատարեցին: Մենք միավորներ վաստակում ենք շատ մեծ դժվարությամբ: Ես դժվարանում եմ այս առաջնությունում մեր մասնակցությամբ որևէ խաղ հիշել, որում մենք մինչև վերջին վայրկյանը չպայքարենք:

- Տիգրան Բարսեղյանը զգուշացվեց, սա նրա 4-րդ դեղին քարտն էր, «Ուլիսի» հետ խաղում նրան չենք տեսնի: Սա թերևս լավագույն տարբերա՞կն էր, չէ որ մրցակիցը ետնապահ «Ուլիսն»է:

- Հայաստանի առաջնությունում ետնապահ թիմեր չկան, բոլորն էլ կարողանում են պայքարել և միավորներ վաստակել: Իսկապես Բարսեղյանի բացակայությունը մեծ կորուստ կլինի մեզ համար, բայց լավ է, որ նա չի մասնակցի միայն «Ուլիսի» հետ խաղին, որը համեմատական կարգով թույլ մրցակից է:

- Այս խաղը Հայաստանի Բարձրագույն խմբի ընթացիկ առաջնության ամենից լարված հանդիպո՞ւմն էր:

- Լարված հանդիպումներից էր, կարծում եմ, որ այս խաղը դուրեկան եղավ հատկապես երկրպագուների համար, քանի որ երկու թիմերն էլ հիանալի ֆուտբոլ ցուցադրեցին: