Բացվեց Զորիկ Գալստյանի լուսանկարչական աշխատանքների ցուցահանդեսը

Զորիկ Գալստյանի «Հայաստան» խորագրով լուսանկարչական աշխատանքների ցուցահանդեսը բացվեց ապրիլի 14-ին Սարգիս Մուրադյան պատկերասրահում:

 «Ցուցահանդեսը  նվիրված է Զորիկ Գալստյանի հիշատակին և  կրում  է «Զորիկ Գալստյանի Հայաստանը» խորագիրը:  Նա միլիոնից ավելի  լուսանկարներ է ստեղծել, սակայն այստեղ ներկայացված է ընդամենը  41 աշխատանք, որոնք Զորիկը նկարել է իր կյանքի վերջին հինգ տարվա ընթացքում: Նրա բոլոր գործերը լավն են, և ինձ համար բավականին դժվար էր առանձնացնել այս նկարները»,- «Արմենպրես»-ի հաղորդմամբ` նշեց  Զորիկ Գալստյանի ընկեր, գեղանկարիչ, ցուցահանդեսի կազմակերպիչ Սահակ Պողոսյանը:

Նրա խոսքով՝ Զորիկ Գալստյանը նախևառաջ իր մտերիմ ընկերն էր, հրաշալի մարդ:

«Մարդկանց մեծամասնությունը Զորիկին ճանաչում էր որպես «Ֆեյսբուքի Զորիկ», քանի որ նա ակտիվ էր այդ սոցիալական ցանցում, ավելի քան 5000 ընկեր ուներ, որոնց ցուցադրում էր իր լուսանկարներն ու կիսում իր մտորումներն ու հույզերը»,-ասաց Պողոսյանը և հավելեց, որ Զորիկ Գալստյանին սիրում էին բոլորը՝ մարդիկ ովքեր նրան անձամբ էին ճանաչում, մարդիկ, ովքեր նրան չէին տեսել:

«Կարծում եմ, որ նա դարձավ մերօրյա լավագույն լուսանկարիչներից մեկը, ցավոք, մենք նրան շուտ կորցրեցինք»,-նշեց լուսանկարիչ ընկերը:

Զորիկ Գալստյանը նաև հանրահավաքներ է նկարել: Սահակ Պողոսյանն ընդգծեց, որ հետագայում հնարավոր է կազմակերպել այդ լուսանկարների ցուցահանդեսը:

Միջոցառմանը ներկա էին բազմաթիվ արվեստագետներ, լուսանկարչի հարազատները:

«Հայրս դեռ վաղ հասակից զբաղվել է լուսանկարչությամբ: Սկզբնական շրջանում դա նրա համար հոբբի էր, որը ժամանակի ընթացքում վերածվեց ավելի լուրջ աշխատանքի: 90-ական թվականներին թվային ֆոտոխցիկ գնեց ու ավելի հաճախ սկսեց լուսանկարել հայկական բնաշխարհը: Նա ինձ համար ոչ միայն հիանալի հայր էր, այլև լավ ընկեր»,- շեշտեց Զորիկ Գալստյանի դուստր Անահիտ Գալստյանը:

Սերգեյ Փարաջանովի տուն-թանգարանի տնօրեն Զավեն Սարգսյանն ասաց, որ ծանոթ չէ Զորիկ Գալստյանին, սակայն շատ է հավանում նրա լուսանկարները, որոնցում Գալստյանը կարողացել է գեղեցիկ ու յուրօրինակ ներկայացնել Հայաստանը:

Ցուցահանդեսը բաց կլինի մինչև ապրիլի 26-ը: Ներկայացված աշխատանքները վաճառվում են: