Մեր երկրի քաղաքական դաշտը և այնտեղ կատարվող ամեն ինչ վերահսկվում է Բաղրամյան 26–ից «Փաստ»

«Փաստ» օրաթերթը գրում է.

Մեր հյուրն է «Ժողովրդավարական Հայրենիք» կուսակցության նախագահ Պետրոս Մակեյանը

– Պարոն Մակեյան, տրամաբանակա՞ն էին, արդյոք, այս ընտրությունների արդյունքները:

– Տրամաբանությունը նայած թե որ հարթության մեջ ես դիտարկում: Եթե դիտարկում ես այն հարթության մեջ, որ չէր գործում ընտրական համակարգը, ու իր գործն էր անում ընտրակաշառքը, ապա տրամաբանական էր:

Իսկ եթե լիներ իրական ընտրություն, այսինքն` իրական ընտրական համակարգի պարագայում այդ արդյունքները որևէ տրամաբանության մեջ չեն տեղավորվում: Որովհետև այդ դեպքում պետք է Հանրապետական կուսակցությունը ընտրական նվազագույն շեմը հաղթահարելու խնդիրներ ունենար:

Փաստացի մեր երկրում ընտրություն չի եղել, եղել է համատարած ընտրակաշառքների բաժանում: Այնպես որ, այս պարագայում ընտրությունների մասին խոսելն իսկ անիմաստ է:

– Բայց, համենայն դեպս, ժողովուրդն իր ցանկությամբ գնաց ու ընտրեց: Իր ձայնը տվեց Հանրապետական կուսակցությանը: Դրան ինչպե՞ս եք նայում:

– ժողովուրդը մեծավ մասամբ, հայհոյելով, անիծելով Հանրապետական կուսակցությանը և նրա լիդեր Սերժ Սարգսյանին, բայց այլընտրանք չտեսնելով ընդդիմադիր դաշտում, գնաց ընտրակաշառքի հետևից: Բանն այն է, որ մեր երկրում չկա, ձևավորված չէ քաղաքական ուժեղ բևեռ, որպեսզի ժողովուրդը նրա հետ հույսեր կապի: Ուստի այս ամենի հետևանքով քվեարկեց ընտրակաշառքի տրամաբանությամբ ու ձայնը տվեց Հանրապետական կուսակցությանը:

– Կարելի՞ է ասել, որ մեր քաղաքական դաշտն այնպես է ամայացված, որ ժողովուրդն այլևս ընտրության հնարավորություն չունի:

– Ճշմարտությունն այն է, որ շուրջ 20 տարի է, ինչ քաղաքական դաշտը համակարգված ոչնչացվում է, փորձ են անում ստեղծել իրենց քիմքին հաճելի քաղաքական մթնոլորտ: Ուստի և «ի հայտ են գալիս» իրենց ձեռնտու քաղաքական կուսակցություններ: Եվ սա բնական է, որովհետև եթե երկրում չի գործում ընտրական համակարգը, ապա այդ պարագայում հնարավոր չէ, որ կայանա քաղաքական դաշտը կամ կայանան քաղաքական իրական կուսակցությունները:

Մեր երկրի ողջ քաղաքական դաշտը և այն, ինչ կատարվում է այդ դաշտում, ամբողջությամբ վերահսկվում է Բաղրամյան 26–ից: Սա միանշանակ է: Սկզբնական շրջանում այնտեղ նստած էր Ռոբերտ Քոչարյանը և քաղաքական դաշտը նա էր վերահսկում: Ապա նրան հաջորդեց Սերժ Սարգսյանը, ով էլ ավելի կատարելագործեց կեղծիքի համակարգը:

Ուստի Հայաստանում քաղաքական դաշտի, քաղաքական կուսակցությունների և ընդհանրապես ընտրությունների մասին խոսելն անիմաստ է:

– Իսկ կարելի՞ է ասել, որ այսօր մեր երկրում բազմակուսակցական համակարգը միֆ է ընդամենը: Փաստացի գոյություն ունի միակուսակցական համակարգ` միահեծան իր իշխանավորներով:

– Հայաստանում նույնիսկ ձեր ասած ձևակերպումը գոյություն չունի: Սա բանդա է, որ զավթել է իշխանությունը և որևէ կերպ չի ցանկանում այն վերադարձնել ժողովրդին:

Եվ այս հարցում իրենց դերակատարությունն ունեն քաղաքական տարբեր ուժեր, կուսակցություններ: Հեռու չգնանք` երբ ձևավորվեց 4+4+4 ֆորմատը, հայտարարում էին ժողովրդավարության հաղթանակի մասին, որ այլևս ընտրակեղծիքը բացառվում է և այլն, և այլն: Այդ ֆորմատի ձևավորմանը մասնակից ուժերն էլ հենց փաստացի սպասարկել են իշխանություններին:

Մինչդեռ այս իշխանություններին չէր կարելի որևէ շանս տալ: Որովհետև այս իշխանությունն օգտագործում է ամեն ինչ, և օգտագործում է ամենքին: Անգամ Հայ Ազգային Կոնգրեսի նման փորձառու քաղաքական ուժին օգտագործեց իր ծրագրերում: Ներգրավեց նաև քաղաքացիական հատվածի ներկայացուցիչներին ու, 4+4+4 ֆորմատի շրջանակներում, իբև թե, համաձայնության եկավ ընդդիմադիր դաշտի հետ:

Ու աշխարհին ցույց տվեց, որ Հայաստանի Հանրապետությունում կա քաղաքական համակարգ, որտեղ իշխանությունը, ընդդիմությունը և քաղաքացիական հասարակությունը լեզու են գտել իրար հետ: Ու այդ համաձայնությունը դրոշակ սարքեցին ու թափահարեցին: Հետագայում էլ այն դարձրեցին վարագույր, որպեսզի հերթական անգամ կեղծեն ընտրությունները:

– Փաստորեն հանճարեղ ղեկավարներ ունենք մենք: 

– Իրենց աթոռը պահելու, թալանը շարունակելու, ժողովրդին ճորտացնելու, ստրկացնելու առումով հանճարեղ են, այո: Չեմ կարող չընդունել այդ փաստը:

Շարունակությունը` «Փաստ» օրաթերթի այսօրվա համարում