Ընտրություններում ՀՀԿ-ն կարողացավ հաջողություն գրանցել եռաշերտ աշխատանքի շնորհիվ. Գառնիկ Իսագուլյան

«Ազգային անվտանգություն» կուսակցության նախագահ Գառնիկ Իսագուլյանը կարծում է, որ չնայած քննադատություններին՝ մարդիկ զգացել են, որ խորհրդարանական ընտրություններին մասնակցելու համար Հայաստանի հանրապետական կուսակցությունը ձեւավորել էր ամենամրցունակ թիմը:

«Ամենակարեւոր խնդիրը մասնակիցների թվի հետ կապված բանավեճերն էին. արդյո՞ք քվեարկության մասնակիցների թիվը համապատասխանում է իրականությանը:  Հանրապետական կուսակցությունը գնաց այն հորդորներին, որ անպայման ընտրողների ցուցակները, հասցեներն ու ստորագրությունները հրապարակվեն: Դրանից հետո որեւէ մեկի կողմից թվաքանակի հավաստիության  հետ կապված վեճ չեղավ: Երկրորդն ընտրակաշառքների հետ կապված խոսակցություններն էին այն մասին, որ դրանց շնորհիվ ընտրություններում հնարավոր եղավ հասնել հաջողության: Որեւէ մեկը չի բացառում նման երեւո ւյթներ, բայց արդյո՞ք դրանք ունեցել են որեւէ ազդեցություն ընտրությունների արդյունքների վրա: Ըստ էության՝ ՀՀԿ-ից բացի, ոչ մի այլ կուսակցություն Ընտրական օրենսգիրքն ընդունելուց հետո չէր սկսել պատրաստվել ընտրություններին կամ էլ չէր հասկանում, որ ներառված որոշ դրույթների առկայության դեպքում չկայացած կուսակցությունների ընտրվելու հարցը դժվարանալու է»,-«Արմենպրես»-ի հաղորդմամբ՝ ասաց Գառնիկ Իսագուլյանը:

Նրա խոսքով՝ ընտրություններում հաջողություն գրանցած քաղաքական ուժը եռաշերտ հաղթանակի շնորհիվ կարողացավ դա անել: «Նախ բոլոր տեղերում նրանք ունեին իրենց առանձին շտաբերը: Առաջին շերտով աշխատում էին անհատներ, երկրորդ շերտով վարչապետը, ով եղավ բոլոր ընտրատարածքներում: Սրան գումարվեց Նախագահի անհատական աշխատանքը: Տեսանք, որ կուսակցությունները, որոնք իրենց հնարավորություններով չէին զիջում Հանրապետականին, ամեն դեպքում չկարողացան բոլոր ընտրատարածքներում առաջ անցնել: Խոսակցություններ կան, թե չսիրելով Հանրապետականին՝ ինչպես ժողոուրդը տվեց ձայնը նրան: Սիրել-չսիրելով չէ, որ առաջնորդվում են կամ ձայն են տալիս: Չկա մի քաղաքացի, որ նրա համար խաղաղությունը գերարժեք չլինի, բայց տեսանք, որ նույնիսկ այդ կարգախոսով քաղաքական ուժը չկարողացավ երկու տոկոսից ավելի շեմը հաղթահարել»,-ընդգծեց նա:

Անդրադառնալով ընտրություններում Օսկանյան-Րաֆֆի-Օհանյան դաշինքի պարտությանը՝ Գառնիկ Իսագուլյանը նշեց, որ նրանք չկարողացան համոզել մարդկանց, որ որոշ ժամանակ առաջ իշխանության բարձր դիրքերում գործունեություն ծավալած քաղաքական գործիչը կարող է հանդես գալ ընդդիմադիր դիրքերից:

Հայաստանում Ազգային ժողովի հերթական ընտրությունները կայացել են 2017թ. ապրիլի 2-ին: Ընտրությունների արդյունքներով խորհրդարան են անցել 4 քաղաքական ուժ` ՀՀԿ-ն, ՀՅԴ, «Ելք» դաշինքը և «Ծառուկյան» դաշինքը:  Հայաստանի Հանրապետական կուսակցությանը կողմ է քվեարկել 770 հազար 441,  «Ծառուկյան» դաշինքին`  428 հազար 836, «Ելք» դաշինքին` 122 հազար 65, Հայ Յեղափոխական Դաշնակցություն կուսակցությանը   103 հազար 48 ընտրող:  ՀՀԿ-ն քվեարկության արդյունքներով նորընտիր խորհրդարանում կունենա 58, «Ծառուկյան» դաշինքը՝ 31, «Ելք» դաշինքը 9, ՀՅԴ-ն՝ 7 մանդատ: