Էժանագին փիառով չեմ զբաղվում. Նարեկ Մակարյանն՝ ԱՄՆ-ում բնակվելու և իր անվան հետ կապված սկանդալի մասին

ЛАЙФ 26 Апрель, 2017 14:34

Life.panorama.am-ի զրուցակիցն է երգիչ, դերասան Նարեկ Մակարյանն, ով վերջին ամիսներին գտնվում է ԱՄՆ-ում:

-Նարեկ, ամիսներ առաջ մեկնեցիք ԱՄՆ ընդամենը մեկ ամսով, եւ արդեն երկար ժամանակ է, ինչ Միացյալ նահանգները Ձեզ «չեն թողնում» վերադառնալ: Որո՞նք են չվերադառնալու պատճառները եւ ե՞րբ սպասենք ձեզ Երեւանում:

- Դեռ երեք ամիս չկա, ինչ ԱՄՆ-ում եմ: Վերադարձս հետաձգվեց, քանի որ գործնական առաջարկներ եղան: Կարծում եմ՝ դեռ երկու ամիս էլ Միացյալ նահանգներն ինձ բաց չեն թողնի:

-Գուցե թաքուն մտքե՞ր ունեք այդտեղ վերջնականապես հաստատվելու: Շատերն են խոստանում հեռանալ 1-2 ամսով, ու այլեւս չեն վերադառնում:

- Ես շատերի փոխարեն պատասխան տալ չեմ կարող: Ինչ վերաբերվում է ինձ, ապա միշտ էլ ասել եմ, որ երբեք չգիտես, թե կյանքն ու հանգամանքները, ո՞ր ուղղությամբ մարդու կտանեն: Այս պահի դրությամբ, այստեղի գործերն ավարտելուն պես, պատրաստվում եմ վերադառնալ Հայաստան:

-Ի սկզբանե ԱՄՆ էիք գնացել ծրագրերի պատճառով, կպատմե՞ք, թե այս ընթացքում ինչե՞ր եք հասցրել իրականացնել եւ ի՞նչ ծրագրեր դեռ ունեք:

- Մի քանի ծրագրերի եմ մասնակցել: Հիմա դեռեւս տեսահոլովակիս նկարահանման հարցերով եմ զբաղվում, ինչպես նաեւ, բազմաթիվ ելույթներ եմ ունեցել: Ապրիլի 20-ին կայացավ Մարտին Ահարոնյանին հեղինակային համերգը, որին ես էլ եմ մասնակցեցի, ինչպես նաեւ, հրավեր էի տացել Գլենդելի քաղաքապետարանի կողմից՝ մասնակցելու ապրիլի 24-ին կայանալիք ծրագրին՝ նվիրված Հայոց Ցեղասպանության 102-րդ տարելիցին: Սա ամենախոշոր ամենամյա ծրագրերից է, եւ ինձ համար մեծ պատիվ էր դրան մասնակցելը: Ի դեպ՝ այդ օրը ելույթ ունեցանք ես ու կենդանի լեգենդ Հարութ Փամբուկչյանը:

-Նարեկ, ինչպես գիտենք, այդտեղ եւս բավականին զարգացել է հայկական ֆիլմարտադրությունը եւ հատկապես սերիալային արտադրությունը: Գուցե որպես դերասա՞ն էլ այդտեղ Ձեզ փորձեք:

- Որպես դերասան հանդես գալու առաջարկներ ունեցա, բայց ստիպված էի մերժել, քանի որ ընդունելու դեպքում ավելի երկար պիտի մնայի ԱՄՆ-ում: Իսկ ես արդեն հազիվ եմ կարոտին դիմանում:

-Իհարկե, յուրաքանչյուր արտիստի համար երազանք է հայտվել ամերիկյան շոու բիզնես, բայց ինչպես փորձն է ցույց տվել, անհնարին ոչինչ չկա: Մտքեր ունե՞ք այդ ասպաեզրում եւս քայլեր անել:

- Ինչու ոչ: Ես չեմ ուզում ինքնագովեստով զբաղվել, եւ նույնիսկ ավելորդ է ասելը, որ ես իմ կատարողական արվեստի վրա վստահ եմ, պարզապես ինչ-որ կերպ նման հնարավորություն պիտի ընձեռնվի: Այդ ուղղությամբ ինքս չեմ աշխատել, բայց երեւի պետք է մտածել: Կյանքում ամենակարեւորը ճիշտ ժամանակին ճիշտ տեղում հայտնվելն է:

-Ձեր լուսանկարներին հետեւլով՝ հասկանալի է դառնում, որ հայկական շոու բիզնեսի շատ ներկայացուցիչների հետ եք մտերիմ: Կպատմե՞ք այդտեղի Ձեր ընկերների, նրանց հետ շփման մասին: Հասցրե՞լ եք ինտեգրվել այդտեղի ապրելաոճին:

- Ապրելաոճին չեմ ինտեգրվել մի պարզ պատճառով՝ ես այստեղ չեմ բնակվում: Իհարկե, ունեմ շատ ընկերներ, կոլեգաներ: Բոլորին շատ եմ սիրում, գնահատում նրանց կամեցողությունը եւ աջակցություն ցուցաբերելու պատրաստակամությունը: Գիտեք, այստեղ շատ հարցերում է հեշտ սխալվելը, մեծ երկիր է եւ դժվար ու անհնարին է ամեն ինչին տիրապետելը: Շնորհակալ եմ բոլոր այն մարդկանց, ովքեր կողքիս են եւ ինձ ուղղորդում են ամեն հարցում:

-Նարեկ, Հայաստանից ի՞նչը եւ ո՞ւմ եք ամենաշատը կարոտել:

- Հենց հարցը լսեցի, անմիջապես Աշոտ Սաթյանի երգն անցավ մտքովս՝ «Թռչեի մտքով տուն, ուր իմ մայրն է արթուն»: Մորս եմ անսահման կարոտել, այդ կարոտս նկարագրելու համար բառեր չեմ գտնում: Ես իրոք սիրում եմ հայրենիքս եւ իսկապես շատ խորը կարոտ եմ զգում: Սա երկրորդ դեպքն է, որ երկար ժամանակով եմ բացակայում երկրից. Նախորսդ անգամ Մոսկվայում էի: Իրոք, դժվար է տանից հեռու լինելը:

-Չեմ կարող չանդրադառնալ վերջերս Ձեր եւ Քրիստինե Պեպելյանի՝ «Հավատա» երգի շուրջ սկանդալային հրապարակումներին: Թեեւ երկու կողմից էլ պատասխաններ հնչել են, այնուամենայնիվ, հետաքրքիր է նաեւ այժմ լսել Ձեր մեկնաբանությունը:

- Իմ պատասխանը նույնն է: Ես աշխատում եմ հեռու մնալ, այսպես կոչված, սկանդալներից: Ինչպես ասել եմ՝ երգը ոչ թե ներկայացվել է ինձ, այլ ես աշխատել եմ այդ երգի վրա, դա ձայնագրվել է եւ տեսահոլովակ է նկարահանվել: Նաեւ շեշտեմ, որ, այո, Քրիստինեն զանգահարել է ինձ այս երգի հետ կապված, բայց մեր մեջ բանակցություն չի եղել, նա ինձ միայն հայտնել է, որ տվյալ երգը վաճառվել է իրեն: Եվս մեկ անգամ նշեմ, որ էժանագին փիառով չեմ զբաղվում, դրա կարիքը չունեմ: