Ռումինական մամուլը լայնորեն լուսաբանել է Հայոց ցեղասպանության տարելիցը

Ռումինական մամուլն այս օրերին լայնորեն անդրադառնում է Հայոց ցեղասպանությանը: Հանրային TVR հեռուստատեսությունը, ռումինական այլ հեռուստակայաններ, Ռադիո Ռոմանիան, Agerpres լրատվական գործակալությունը, Adevarul թերթը եւ տեղական մամուլը լայնորեն լուսաբանում են Ռումինիայի տարբեր քաղաքներում Հայոց ցեղասպանության 102-ամյակին նվիրված միջոցառում ները:

Ինչպես հաղորդում է «Արմենպրես»-ը, ապրիլի 21-ի երեկոյան Կլուժի TVR հեռուստեսության ուղիղ եթերով հեռուստալրագրող Կարեն Սեբեշիի «Տրանսիլվանիան այսօր» հաղորդման հյուրերն էին ռումինահայ պատմաբան Էդուարդ Անտոնյանը եւ հեռուստախմբագիր Կլաուդիու Պադուրեանը/Claudiu Padurean, որոնք քննարկեցին ցեղասպանության թեման: TVR հեռուստեսությանը եւ ռումինական ռադիոյին հարցազրույցներ տվեցին դեսպան Համլետ Գասպարյանը եւ քաղաքական վերլուծաբան Պավել Դալլաքյանը: Հայոց ցեղասպանությանը նվիրված Կլուժի միջոցառումների մասին ընդարձակ հա ղորդում տարածեց ռումինական Աջերպրես/Agerpres գործակալությունը` լայն մեջբերումներ կատարելով, այնուհետեւ ամբողջությամբ տարածելով դեսպան Գասպարյանի ելույթը:

Ապրիլի 24-ին TVR Cluj ալիքի «Բազմագույն Տրանսիլվանիա» հաղորդումն ամբողջովին նվիրված էր Հայոց ցեղասպանությանը, այդ ողբերգության պատմական, քաղաքական եւ բարոյական ասպեկտներին: Հաղորդման հյուրերն էին հեռուստալրագրող Կարեն Սեբեշին/ Karen Attila Sebesi, պատմաբան, Հոլոքոստի մասնագետ Միքայել Շաֆիրը/Michael Shafir, գրող եւ քաղաքական գործիչ Վարուժան Ոսկանյանը: Ուղիղ եթերի մեջ օգտագործվել են դեսպան Համլետ Գասպարյանի եւ քաղաքագետ Պավել Դալաքյանի հետ զրույցից հատվածներ:

Gherlainfo.ro, ziarulfaclia.ro, ziar.com եւ այլ կայքէջերում պատմում են ապրիլի 23-ի կիրակնօրյա պատարագի եւ համայնքի շրջանակներում տեղի ունեցած միջոցառումների մասին:

Realitatea.net, ziuanews.ro եւ այլ կայքէջեր գրում են Երուսաղեմում թուրք պատմաբան Թաներ Աքչամի կողմից գաղտնազերված նամակի մասին, որը եւս մեկ անգամ ապացուցում է Հայոց ցեղասպանության իրողությունը: Խոսքը թուրք երկու բարձր պաշտոնյայի մասին է, որոնց նամակագրությունից պարզ է դառնում, որ Ցեղասպանության պլանն արդեն մշակված էր: Վերջում նշվում է նաեւ այն, որ Իսրայելի տարբեր քաղաքական եւ մշակութային գործիչներ հաճախակի կոչ են անում իրենց երկրի խորհրդարանին` ճանաչել Հայոց ցեղասպանությունը:

Hotnews.ro կայքէջը նշում է, որ չնայած ԱՄՆ նախագահ Դոնալդ Թրամպն իր ապրիլքսանչորսյան ելույթում չի օգտագործել ցեղասպանություն բառը, այնուամենայնիվ, այն առաջացրել է թուրքերի զայրույթը: Կայքէջը մեջբերումներ է ներկայացնում ԱՄՆ նախագահի ելույթից:

Cocoon.ro կայքէջը բավականին ծավալուն եւ մանրակրկիտ ներկայացնում է Հայոց ցեղասպանության նախապատմությունը, համիդյան եւ Ադանայի ջարդերը, քաղաքական իրավիճակը եւ կոնտեքստը, հայերի դերն Առաջին համաշխարհային պատերազմում եւ Ցեղասպանության ընթացքն` ըստ փուլերի, խոշոր երկրների վերաբերմունքը, ընդհանուր պատճառված վնասի չափը, հայերի պանդխտությունը, Նեմեսիս խմբի գործողությունները, հայ-թուրքական պատերազմները, Սեւրի, Կարսի եւ Լոզանի պայմանագրերը, Ցեղասպանությունը գրականության մեջ, նահատակների սրբադասումը, Թուրքիայի եւ Հայաստանի պաշտոնակն դիրքորոշումը եւ հանրային կարծիքը, միջազգային հանրության դիրքորոշումը եւ այլն:

Adevarul.ro կայքէջը ներկայացնում է ֆրանսահայ Կայծ Մինասյանի վերջերս ռումիներեն թարգմանված Հայերի հօդս ցնդածերազանքը գրքի շնորհանդեսը եւ գրքից բավականին մեծ մեջբերում է անում: Կայքը նյութ է զետեղել նաեւ ապրիլի 25-ին Կոնստանցայում հայկական խաչքարի բացման մասին:

Actualmm.ro կայքէջը ներկայացնում է, թե պատմության ընթացքում ինչեր են տեղի ունեցել ապրիլի 24-ին` ծավալուն տեղ հատկացնելով Ցեղասպանությանը:

Roman24.ro, ziarulderoman.ro եւ այլ կայքէջեր ներկայացնում են ապրիլի 24-ին Ռոման քաղաքում տեղի ունեցած գիտական սիմպոզիումը, որին մասնակցեցին պատմաբաններ, գիտաշխատողներ եւ այլն:

bzc.ro եւ այլ կայքէջեր անդրադառնում են ապրիլի 21-ին Կլուժ-Նապոկա քաղաքում Ցեղասպանությանը նվիրված միջոցառման ընթացքում Ռումինիայում ՀՀ դեսպան Համլետ Գասպարյանի ելույթին:

Reporterul.ro կայքէջը ռումինահայ հռչակավոր ջազմեն Հարրի Դավիդյանի` Բոտոշան քաղաքում ապրիլի 22-ին ունեցած համերգի կոնտեքստում ծավալուն ներկայացնում է Հայոց ցեղասպանության պատմությունը: 

Ապրիլի 26-ին TVR1-ի «Համակեցություն» հաղորդման հյուրն էր ռումինահայ պատմաբան Էդուարդ Անտոնյանը: 

Ռումինահայ «Արարատ» հանդեսն օրըստօրե ծանուցում էր իրադարձությունների մասին եւ իր ռումինալեզու կայքէջում զետեղում ծավալուն նյութեր: