Մոնիկա Նազարյանը՝ հեռուստաէկրաններին չերևալու, ժողովրդական երգի և առաջիկա պլանների մասին

Exclusive

Past.am-ի զրուցակիցն է սիրված երգչուհի, «Ժողովրդական երգիչ 3» նախագծի մասնակից Մոնիկա Նազարյանը:

 

 

- Ձեր՝ հեռուստաէկրաններին չերևալուց սկսենք: Շատ մարդկանց թվում է, որ եթե հայտնիները հեռուստացույցով չեն երևում, ուրեմն դադարերցրել են իրենց գործունեությունը: Ձեր դեպքում ինչպե՞ս է:

- Համաձայն եմ: Կոնկրետ ես՝ երեք ամիս անընմեջ հեռուստաէկրաններին էի, և երբ դրանից հետո դադար եղավ, մարդկանց թվում է, թե ես ոչինչ չեմ անում: Բայց իրականում շատ-շատ բան եմ անում ու երևի թե շատ շատերից ավելի շատ, ովքեր ամեն օր երևում են էկրաններին: Բազմաթիվ երգեր եմ թողարկել, համացանցով ինձ հետևողները տեղյակ են: Բազմաթիվ շրջագայություններ եմ ունեցել. ներկա պահին պատրաստվում եմ Ամերիկա մեկնել, հետո՝ Եվրոպայի մի քանի երկրներ: Իսկ այստեղ ու դրսում ունեցածս համերգներն անհաշիվ են: Իսկ ինչ մնում է էկրաններին երևալուն, ինձ թվում է՝ ժամանակի ընթացքում կլինի:

- «Ժողովրդական երգիչ» նախագծից խոսենք. եթե վերցնենք Մոնիկային մինչ նախագիծը և դրանից հետո, ի՞նչ է փոխվել Ձեր մեջ՝ որպես մարդ և որպես երգչուհի:

- Նախագծից առաջ էլ եմ շատ երգել, ուղղակի մինչև նախագիծը մի քանի տարի դադարի մեջ էի՝ ձայնի փոփոխման շրջանի հետ կապված: Նախագիծն այդ դադարից հետո առաջին քայլն էր: Նախագծից հետո շատ չեմ փոխվել. ավելի շատ հասունացել եմ, շատ բաների միջով եմ անցել, շատ բան եմ տեսել: Իսկ որպես երգչուհի՝ ավելի ու ավելի շատ են սկսել ճանաչել, համերգներն են շատացել և, իհարկե, փորձն է ավելացել:

- Ինչու՞ հատկապես ժողովրդական երգը:

- Փոքր տարիքից եմ երգել ու լսել, այդ երաժշտությունն անընդհատ մեր տանը հնչել է: Ես հիշում եմ, երբ միացնում էին ուրիշ ոճի երաժշտություն, ես լսում էի, որովհետև երաժշտությունն իմ մեջ կա: Բայց երբ կողքի սենյակում միանում էր Օֆելյա Համբարձումյան կամ Ռուբեն Մաթևոսյան, ես միանգամից վազում էի այնտեղ, որովհետև իմ արյան մեջ դա է: Եվ ոչ միայն իմ. ցանկացած հայի մեջ ժողովրդական երգը կա, պարզապես միջավայր է պետք, որ դա զարգացնեն: Իսկ հեռուստացույցով ու ռադիոյով պետք է անընդհատ հնչի ժողովրդականը, որ մարդիկ սկսեն պահանջել:

- Երբևիցե Ձեզ այլ ժանրերում փորձե՞լ եք կամ պատկերացնու՞մ եք, որ մի օր կարող եք այլ ժանրում երգել:

- Ցանկացած երգիչ, ում կոկորդը գոնե 60 տոկոսով տիրապետում է ժողովրդկան երգի խաղիկներին, շատ հեշտությամբ կարող է երգել ցանկացած ժանրով՝ թե՛ դասական, թե՛ էստրադա, թե՛ ռաբիս: Իսկ մյուս ժանրերի դեպքում սա հնարավոր չէ: Ես փորձել եմ և՛ էստրադային, և՛ դասական, Մանկավարժական ինստիտուտի Արվեստի բաժնում 4 տարի դասական վոկալի դասեր եմ անցել: Բայց հասկացել եմ, որ դա իմը չի, որ եթե ես երգեմ, պետք է երգեմ միայն ժողովրդական, քանի որ միայն այդ դեպքում կարող եմ վստահ բեմ դուրս գալ: Իսկ ես չեմ սիրում ինչ-որ բան թերի անել:

- Եվ վերջում, ի՞նչ սպասենք Ձեզնից առաջիկայում:

- Այս պահին մի քանի երգի վրա եմ աշխատում, որոնք առաջիկայում կներկայացնեմ հանրության ուշադրությանը: Հնարավոր է՝ լինեն նաև տեսահոլովակներ. միտքը կա, բայց դեռ մտածում եմ՝ որ երգի վրա նկարահանել, որ ավելի հաճելի, լսելի լինի: Եվ իհարկե, ինչպես սկզբում նշեցի, շարունակական են լինելու նաև համերգներն ու շրջագայությունները:

 

 

Մարիամ Նալբանդյան