Life.panorama.am-ը գրում է.
Life.panorama.am-ի զրուցակիցն է դերասանուհի, պարուհի Արմինե Մանուկյանը, ում այժմ տեսնում ենք «Կայարան» հեռուստասերիալում: Զրույցի սկզբում Արմինեն պատմեց այն ճանապարհի մասին, որը նրան բերեց հեռուստատեսութուն.
«Սովորաբար բոլորի մոտ էլ այդպես է լինում, մեկ անգամ նկարահանվում ես եւ եթե համոզիչ ես լինում, առաջարկները հաջորդում են միմյանց: Հետաքրքրականն այն է, որ երբեք քասթինգների չեմ մասնակցել, ինձ գտել են, ինչի համար շատ ուրախ եմ: Տարիներ առաջ, նկարահանվեցի տեսահոլովակում, որից հետո հրավեր ստացա առաջին անգամ նկարահանվել «Եզրագծից այն կողմ» սերիալում, դրան հաջորդեց «Քույրը» հեռուստասերիալը, որից հետո դադար վերցրի, քանի որ աշխատանքներս շատ էին ու չէի հասցնում, դե իսկ նախորդ տարի հրավեր ստացա «Կայարան» հեռուստասերիալում նկարահանվել ու որոշեցի համաձայնվել»,- պատմեց Արմինեն:
Երիտասարդ դերասանուհին առաջին մասնագիտությամբ պարուհի է.
«Սովորել եմ Պարարվեստի պետական քոլեջի «Բալետի» բաժնում, ապա ընդունվեցի Երեւանի թատրոնի եւ կինոյի պետական ինստիտուտի «Պարարվեստի ռեժիսուրա» ֆակուլտետը, որին զուգահեռ սկսեցի աշխատել Օպերայի եւ բալետի ազգային ակադեմիական թատրոնում՝ որպես բալետի պարուհի, ի դեպ՝ այստեղ պատիվ ունեմ աշխատելու մինչ օրս, եւ ուախությամբ պետք է ասեմ, որ ի հակառակ շատերի կարծիքների` մենք ունենք հրաշալի ներկայացումներ, որոնց ժամանակ դահլիճները միշտ լեփ-լեցուն են: Շատ հաճելի փաստ է, որ այսօր մարդիկ նախընտրում են իրենց երեկոներն անցկացնել՝ բալետ դիտելով»,- պատմեց Արմինե Մանուկյանը:
Ի դեպ՝ արդեն երկար ժամանակ է, ինչ Արմինեն ղեկավարում է «Արման Հովհաննիսյան փրոդաքշենի» պարային մասը:
Հարցին, թե երկու մասնագիտություններից երիտասարդ արտիստուհին ո՞ր մեկին է նախապատվություն տալիս, պատասխանեց.
«Պարուհին պետք է ունենա նաեւ դերասանի վարպետության գիտելիքներ: Այսինքն՝ պարն ուսումնասիրելով՝ ես սովորել եմ նաեւ դերասանի մասնագիտությունը: Պարում եմ դեռ վեց տաեկանից, բայց դերասանուհու մասնագիտությունը եւս ինձ շատ հոգեհարազատ է: Ես կարողանում եմ ինքնադրսեւորվել տեսախցիկի առաջ, իսկ դրան օգնել է այն հանգաանքը, որ հատկապես բալետի պարողը առանց խոսքի՝ միայն շարժումների ու ժեստերի լեզվով բեմում խաղ է ցույց տալիս: Պարն ինձ օգնել է միշտ, դրա համար այժմ երկու աշխատանքներն էլ շատ հաճույքով եմ անում ու չեմ տարանջատում»:
Թեեւ Արմինեն հիմնականում դրական կերպարներով է հանդես եկել, բայց, իր խոսքով, պատրաստ է նաեւ բացասական դերով ներկայանալ.
«Կոնկրետ հիմա կերտում եմ մի հերոսուհու, ով սկզբում հավատարիմ էր ընկերուհուն, բայց հետո դավաճանեց նրան՝ տիրանալով ընկերուհու սիրելի տղամարդուն: Ես պատրաստ եմ կերտել յուրաքանչյուր դեր, անգամ բացասական, քանի որ ինձ հետաքրքիր է տարբեր բնավորություններ վերարտադրել»,- նշեց նա:
Մեր նկատառմանը՝ դերասանուհին իր հերոսուհիներին արդյոք փոխանցում է իր բնավորության գծերը, թե նրանք որեւէ կերպ կապ չունեն Արմինե Մանուկյանի հետ, պատասխանեց.
«Չէ, ավելի շատ նրանք կապ չունեն ինձ հետ: Իրականում ես ավելի ակտիվ եմ իմ էությամբ, կյանքով լի, ընկերասեր, չեմ սիրում իմ մասին խոսել, բայց ընկերներս ասում են, որ իմ ներկայությունը իրենց ուրախություն է պատճառում: Ես միշտ ժպտում եմ, դրա համար էլ, երբեմն, երբ տխրում եմ, այն շատ ակնհայտ է երեւում, մարդիկ անմիջապես արձագանքում են՝ ասելով, որ ժպիտս պակասել է»:
Հարցին, թե իր խաղում դերասանուհին նշանակություն տալի՞ս է արդոյք հանրային կարծիքին, թե առաջնորդվում է մասնագետների խորհուրդներով, պատասխանեց.
«Իհարկե, ինձ համար մեծ նշանակություն ունի հանրային կարծիքը, որովհետեւ նրանք են նույն այդ ֆիլմերը դիտողները, միաժամանակ նաեւ մեծ ուշադրություն եմ տալիս մասնագիտական կարծիքներին, բայց յուրաքանչյուր հարցում վերջնական որոշում կայացնում եմ՝ լսելով սրտիս ձայնին»:
