Ի՞նչ շոու բիզնեսի մասին է խոսքը, երբ երգիչների եկամուտը մեծ մասամբ խնջույքներից և հարսանիքներից է կախված. Վիգեն Հովսեփյան

ФОТО 29 Апрель, 2017 13:11

Life.panorama.am-ի զրուցակիցն է իսպանական երգերով հայկական շոու բիզնես մուտք գործաց, սակայն այսօր արդեն նաեւ հայկական ժողովրդական երգեր կատարող Վիգեն Հովսեփայնը, ով երկար տարիներ ապրելով Իսպանիայում՝ մշտական բնակությամբ վերադարձել է Հայաստան:

-Վիգեն, հայաստանաբնակ հանդիսատեսը Ձեզ ճանաչեց իսպանական երգերով, բայց այսօր արդեն հայկական ժողովրդական երգերի ձայնասկավառակ եք ներկայացրել: Իսպանական երաժշտությունից՝ դեպի հայկական ժողովրդական երգեր՝ ինչպե՞ս կայացրիք այս որոշումն ու ինչպե՞ս ընթացավ այս ճանապարհը:

- Եթե համարենք որոշում, ապա դա կատարված էր շատ վաղուց, քանի որ մինչեւ իսպաներեն երգելը, ես երգել եմ եւ իմ հոգու ամբողջ էությամբ, հպարտությամբ եմ կրում հայկականը: Հաշվի առնելով մի քանի հանգամանք՝ չէի կարող բաց թողնել հնարավորությունը եւ չներկայացնել "ECHOES" ձայնասկավառակը, որի միջոցով փորձել եմ իմ փոքրիկ լուման ներդնել մեր հայկական երաժշտության տարածման եւ զարգացման գործընթացին:

-Այսինքն՝ երկար տարիներ ապրելով արտերկրում` Ձեզնից անկախ լինելով ուրիշ մշակույթի մեջ, սերը դեպի հայկականը փորձեցիք պահպանե՞լ, թե արդեն այստեղ վերածնել:

- Հայ լինելն ինձ համար ի վերուստ տրված մեծագույն շնորհ եմ համարում: Ոչինչ ինձ չէր կարող ստիպել կորցնել սերը դրա նկատմամբ: Իմ բոլոր հաջողությունները կախված են իմ տեսակից, իսկ իմ տեսակը ձեւավորել է հայկականը:

-Վիգեն, գիտեմ, որ իսպանական երաժշտությանը եւս հրաժեշտ չեք տվել: Ի՞նչ եք կարծում՝ հայ հանդիսատեսը Ձեզ ո՞ր ժանրում է առավել նախընտրում լսել: Ինքս դժվարանում եմ գտնել այս պատասխանը, քանի որ սիրվեցիք իսպանական երգերով, բայց այսօր շարունակում եք սիրվել հայկական ժողովրդական կատարումներով:

- Միանշանակ, հայկական կատարումները, երգի բառերը, շատ կարեւոր են երգը լիովին հասկանալու եւ զգալու համար, իսկ այստեղ` Հայաստանում, իսպաներենի ոչ բոլորն են տիրապետում, այդ իսկ պատճառով, կարծում եմ, որ հայերեն կատարումներս ավելի հոգեհարազատ կլինեն հայ հանդիսատեսին:

-Դուք այն երաժիշտներից եք, ով իր տեսակով արդեն իսկ ապացուցում է, որ կրթությունը միշտ չէ, որ որոշիչ է: Չունեք երաժշտական կրթություն, որը բնավ չի խանգարում Ձեզ: Հետաքրքիր է իմանալ՝ իրականում իսկապես համապատասխան կրթություն չունենալը Ձեզ համար խոչընդոտներ չի՞ ստեղծել:

- Երաժշտական կրթություն, ցավոք, չունեմ, բայց նպատակ ունեմ սովորելու որոշ բաներ, որոնք ինձ կօգնեն եւ կհեշտացնեն ստեղծագործել, քանի որ կան երաժշտական օրենքներ, որոնց կիրառման արդյունքում հնարավորություններդ ավելի են շատանում: Դեռեւս ոչ մի խոչընդոտ չեմ ունեցել կրթության բացակայության պատճառով, դա ինձ չի խանգարում:

-Վիգեն, այն երգիչներից եք, ով արդեն իսկ մի շարք համագործակցություններով է հայտնի: Այս առումով կնշե՞ք, թե որ համագործակցությունն է Ձեզ համար ամենատպավորիչը եղել եւ ի՞նչ է սպասվում առաջիկայում:

- Բոլոր համագործակցություններս իրենց հերթին հետաքրքիր եւ տպավորիչ են եղել, չեմ կարող առանձնացնել ինչ-որ մեկը, ամեն մեկն իր տեսակով յուրահատուկ է եղել:

-Դուք եկաք հայկական շոու բիզնես հաստատուն քայլերով, կոնկրետ գործերով ու մեծ ծրագրերով: Դրանց մի մասն արդեն իրականություն է, առաջիկայում հանդիսատեսն ի՞նչ սպասի Վիգեն Հովսեփյանից:

- Առաջիկայում կփորձեմ արտերկրում ներկայացնել "ECHOES" ձայնասկավառակը` համերգային շրջագայությամբ, որի աշխատանքներն արդեն սկսված են: Իմ մեծագույն նպատակներից մեկն է հայկական ծրագրով հանդես գալ արտերկրում եւ ներկայացնել մեր մշակույթը: Բացի այդ, ունեմ շատ մեծ ծրագրեր, որոնք կփորձեմ իրականություն դարձնել:

-Ի դեպ՝ կցանկանայի լսել ձեր կարծիքը հայկական շոու բիզնեսի մասին: Շատերը «փախչում» ես այս շոու բիզնեսից՝ փորձելով դրսում հաստատվել, դուք թողեցիք արտերկիրն ու եկաք Հայաստան: Սպասելիքները արդարացվա՞ծ են եւ ի՞նչ գնահատական ունեք այս ոլորտի հետ կապված:

- Ես ինձ չեմ տեսնում այդ բառակապակցության սահմաններում, քանի որ ես անում եմ այն, ինչ ինձ դուր է գալիս, եւ մինչ օրս մեծ մասամբ արժանացել եմ դրական արձագանքների: Կյանքում ոչինչ չեմ բացառում, բայց փորձելու եմ հավատարիմ մնալ իմ սկզբունքներին եւ հանդես գալ անկեղծ աշխատանքներով: Իսկ ինչ վերաբերում է շոու բիզնեսին, ի՞նչ շոու բիզնեսի մասին է խոսքը, երբ երգիչների եկամուտը մեծ մասամբ խնջույքներից եւ հարսանիքներից է կախված: Հայաստանում ամեն ինչ շատ խառն է: Հանրության պահանջարկից ելնելով՝ ստեղծվում են կեղծավոր եւ անորակ աշխատանքներ, որոնք աղտոտում են հայկական երգարվեստը: Մյուս կողմից էլ, մարդիկ գումար պետք է վաստակեն: Շատ բարդ թեմա է, կարող ենք շատ երկար քննարկել, բայց այս ամենի լուծումը ես տեսնում եմ մեր երկրի զարգացման եւ բարգավաճման մեջ, որից հետո ամեն ինչ իր տեղը կնկնի, իսկ այդ օրը շատ մոտ է, վստահ եմ:

-Վիգեն, եթե դեմ չեք լինի, կցանկանամ խոսել նաեւ Ձեր նորակազմ ընտանիքի մասին: Ինչպիսինն է կյանքն ամուսնացած տղամարդու կարգավիճակում, ինչպիսինն է կնոջ վերաբերմունքը Ձեր աշխատանքին, ի վերջո, երգիչ ամուսին ունենալը գուցե այնքան էլհեշտ չէ:

- Ընտանեկան կյանքը շատ լավ է, ուրախ եմ, որ հայակական օջախներին եւս մեկը գումարվեց` իմ եւ կնոջս ամուսնության արդյունքում: Իսկ թե արդյոք դժվար է երաժիշտ ամուսին ունենալը, կարծում եմ ավելի ճիշտ կլինի կինս պատասխանի այդ հարցին: