Մեր երկրում պարարվեստն անուշադրության է մատնված. Իռեն Ուլիխանովան` Պարի միջազգային օրվա մասին

ЛАЙФ 29 Апрель, 2017 17:06

Այսօր` ապրիլի 29-ին, աշխարհը նշում է Պարի միջազգային օրը: Տոնական օրվա կապակցությամբ Life.panorama.am-ը զրուցել է Սոֆի Դեւոյանի «Պարի եւ հոգու թատրոնի» մենապարուհի Իռեն Ուլիխանովայի հետ, ով ոչ միայն իր շնորհավորանքներն է հղել գործընկերներին, այլեւ խոսել է Հայաստանում պարարվեստի ասպարեզում առկա բացթողումների մասին:

«Նախ շնորհավորում եմ իմ բոլոր կոլեգաներին, պարուսույցներին, սաներին եւ պարի սիրահարներին` մաղթելով նոր եւ գեղեցիկ բեմադրություններ, մեծ համերգներ ու նորանոր բարձրունքներ, ցանկանում եմ, որպեսզի լինենք գնահատված: Բոլորին մաղթում եմ մտքի վառ թռիչք ու այն ցուցադրելու հնարավորություն ոչ միայն մեր երկրում, այլեւ աշխարհում»,- նշեց Իռենը` հավելելով, որ տոնական օրն աշխատանքային է անցնելու.

«Չեմ կարծում, որ այսօր կնշենք այս տոնը, քանի որ բոլորս էլ զբաղված ենք աշխատանքներով, ցավոք, նաեւ պետությունը չի անդրադառնում այս տոնին: Հիշում եմ, տարիներ առաջ Սոֆի Դեւոյանի «Պարի եւ հոգու թատրոնը» մեծ համերգ ունեցավ` նվիրված Պարի միջազգային տոնին, իսկ այս տարի կսահմանափակվենք միմյանց շնորհավորելով»,- մանրամասնեց պարուհին:

Հարցին, թե Հայաստանում պարարվեստի բնագավառում ի՞նչն է պակասում, մեր զրուցակիցը շեշտեց.

«Համապատասխան ուշադրությունը պետության կողմից, առողջ մրցակցությունը, որը հանգեցնում է մեծ նախագծերի եւ համերգների ստեղծմանը, փառատոնները, մրցանակաբաշխությունները, համերգները` այս ամենը խիստ պակասում է: Այսօր փորձում են մեր ազգային պարերը պահպանել ու խրախուսել, ինչ-որ չափով այդ առումով կա նաեւ Մշակույթի նախարարության աջակցությունը, բայց միեւնույն է, ցուցաբերվող ուշադրությունը շատ քիչ է, մեր երկրում պարարվեստն անուշադրության է մատնված: Ցանկալի կլիներ, որպեսզ հնարավություններ ստեղծվեին արտերկրից մասնագետների հրավիրելու, ինչու ոչ` մեր մասնագետներն, խմբերին արտերկիր ուղարկել վերապատրաստվելու, ինչն այսօր արվում է խմբերի ղեկավարությունների հնարավորության սահմաններում միայն, որն էլ շատ քիչ է: Շատ կցանկանայի, որ պարարվեստը մեր երկրում զարգացում ապրեր համապատասխան ուշադրության շնորհիվ»:

Զրույցի վերջում Իռեն Ուլիխանովան խոսեց իր կյանքում պարի կարեւորության մասին.

«Պարը ես եմ, պարն ինձ համար ամեն ինչ է, մենք միշտ անբաժան ենք: Եթե եւս մեկ անգամ ծնվեի, կրկին այս մասնագիտությունը կընտրեի, միայն թե այս կյանքում պարով ուշ եմ սկսել զբաղվել` 15 տարեկանից, հաջորդ կյանքում ավելի շուտ այս արվեստ մուտք կգործեմ»,- ավարտեց Իռեն Ուլիխանովան: