Մեկ օր՝ ֆրանսիական շնչով կամ Ֆրանսիան մեկ օրով տեղափոխվել էր Նոյեմբերյան (ֆոտոշարք)

Գինի, կրոասան, Էյֆելյան աշտարակ, Շանել և, իհարկե, Ազնավուր: Թվարկվածները և շատ ուրիշ հետաքրքիր բաներ կարելի էր գտնել երեկ՝ Հայկական Ազգային ԵԿՔԱ կողմից Նոյեմբերյանում կազմակերպված հերթական մշակութային երեկոյին, որը, ինչպես հասկացաք, նվիրված էր Ֆրանսիային:

Երեկոյին համապատասխան՝ ֆրանսիական էր ամեն ինչ. երաժշտությունից մինչև ուտելիքներ, մասնակիցների հագուստ և անգամ խատուտիկի գինի: 

Երեկոյի ընթացքում մասնակիցները, բացի ֆրանսիական՝ բոլորին հայտնի կերակուրներից, համտեսեցին նաև «Դիժոնական», «Կղեպ», աղցան «Նրբություն» ու «Բագետ» հաց, որոնք կազմակերպիչներն իրենց ձեռքով էին պատրաստել՝ խստիվ հետևելով բաղադրատոմսին: 

Միջոցառման կազմակերպիչ, ԵԿՔԱ անդամ Գոհար Ասլիկյանը նկատում է, որ երեկոներով հետաքրքրվողների թիվը գնալով մեծանում է.

«Առնվազն 2-3 ամիսը մեկ մենք մուտք ենք գործում մի երկիր, ծանոթանում այդ երկրի մշակույթին, խոհանոցին, ավելի մեծ պատկերացում կազմում դրա մասին: Սկսել ենք իտալական երեկոյից, որի ժամանակ ընդամենը պիցցա էր ու գինի, ու այդպես նմանատիպ երեկոների հիմքը դրվեց: 2017 թվականին սա 2-րդ միջոցառումն էր, հունվարին կազմակերպված հնդկական երեկոյից հետո: Կարող եմ ասել, որ վերջին 2-3 երեկոներին մասնակիցների հետաքրքրվածությունն աննախադեպ աճել է, նույնիսկ ստիպված ենք տեղերը սահմանափակել»,- Past.am-ի հետ զրույցում նշեց Գոհարը:

Հասարակական կազմակերպության ներսում ձևավորված գեղեցիկ ավանդույթ կա. եթե անդամներից որևէ մեկը ինչ-որ երկիր է գնում, իր հետ նրանց խոհանոցին կամ հենց երկրին բնորոշ ինչ-որ բան է բերում, և հենց այդպես էլ ընտրվում է մշակութային հաջորդ երեկոյի թեման:

Հայկական Ազգային ԵԿՔԱ նախագահ Աիդա Զուրաբյանը շատ կարևոր է համարում նմանատիպ միջոցառումների կազմակերպումը՝ հատկապես մարզաբնակ երիտասարդների համար.

«Քանի որ մեր կազմակերպությունը միջազգային շարժման մասնակից է, շատ ենք կարևորում տարբեր երկրների հետ մշակութային շփումները: Նմանատիպ երեկոներ կազմակերպելու գաղափարը մեկ հոգու չի պատկանում, միասնական քննարկումների արդյունք է: Արդեն մոտ 10-15 մշակութային երեկո ենք կազմակերպել: Երեկո է եղել, ընդամենը 6 հոգով ենք անցկացրել, բայց երբեք ինչ-որ մեկին ստիպողաբար չենք կանչել: Հիմա հասել ենք մի կետի, երբ ես այս երեկոներին հյուրի կարկավիճակում եմ, մասնակիցները աշխատանքի հստակ բաժանում են կատարել, և միայնակ ամեն ինչ կարողանում են պատշաճ մակարդակով կազմակերպել: Սա արդեն մեծ ձեռքբերում եմ համարում:

Երևանցի երիտասարդի համար, գուցե, այս երեկոն այնքան էլ հետաքրքիր չլինի, բայց մարզում, ժամանցի վայրերի բացակայության պարագայում, նմանատիպ միջոցառումների կազմակերպումը, ըստ իս, շատ կարևոր է՝ շփման, գիտելիքների, փորձի փոխանակման, ինչպես նաև՝ ժամանցի առումով»,- նշեց Զուրաբյանը:

ՀԿ անդամ Ժեննի Մաճկալյանը փոքրիկ, բայց շատ ուսուցողական պրեզենտացիա էր կազմակերպել, որն օգնեց մասնակիցներին բացահայտել Ֆրանսիան ամենատարբեր կողմերից: Իսկ Նունե Ազիզյանը, ով առաջին անգամն էր մասնակցում երեկոներին, փոքրիկ խաղ-խաչբառ էր կազմել, որը նույնպես օգնեց երկիրը ճանաչելու հարցում:

Հատկանշական է, որ միջոցառմանը ներկա էին միայն իգական սեռի ներկայացուցիչներ: Կազմակերպիչների խոսքով՝ իրենք որևէ սահմանափակում չեն դնում հյուրերի առումով և հույս ունեն, որ շուտով նաև արական սեռի ներկայացուցիչները կսկսեն հետաքրքրվել իրենց երեկոներով:

Լիլիթ Ալավերդյանը մասնակցել է մինչև հիմա կազմակերպված գրերթե բոլոր միջոցառումներին և փաստում է, որ ամեն անգամ փոփոխությունը միայն դրական ուղղությամբ է.

«Վստահությամբ կարող եմ ասել, որ կազմակերպիչները հասնում են իրենց առջև դրված նպատակին: Կոնկրետ ես, և, համոզված եմ՝ մասնակիցներից շատերը, նոր գիտելիքներ են ստանում տվյալ երկրի մասին, բացահայտում հետաքրքիր մանրամասներ, որոնք մինչև այժմ չեն իմացել:

Ինձ համար մինչ այժմ կազմակերպվածներից ամենատպավորիչը մեքսիկական երեկոն է եղել, հատկապես ուտելիքները, համերը շատ են տպավորվել: Իսկ ամերիկյան երեկոն ինձ համար առանձնացավ իր բազմամարդությամբ: Հենց Ամերիկայից ներկայացուցիչ ունեինք, և շատ հետաքրքիր ու բովանդակալից ստացվեց ամեն ինչ: Անհամբերությամբ սպասում եմ արաբական երեկոյին, քանի որ իր մշակույթով այդ երկիրը շատ է տարբերվում, և նորություն կլինի մեզ համար»,- նշեց Լիլիթը:

Հ.Գ. ԵԿՔԱ-ն (Երիտասարդ կանանց քրիստոնեական ասոցիացիա, անգլերեն՝ YWCA) համաշխարհարհային շարժում է, որն ավելի քան 120 երկրներում պայքարում է կանանց և աղջիկների իրավունքների համար: Կազմակերպությունը Նոյեմբերյանում իր աշխատանքն սկսել է 2011 թվականի սեպտեմբերից:

 

Մարիամ Նալբանդյան