«Արմմոնո»-ի շրջանակում ունեցած հաջողությունները ներկայացումներին ճանաչում են բերում նաև արտերկրում

«Արմմոնո» միջազգային թատերական փառատոնին մասնակցությունը դերասանների համար շատ կարևոր մի քայլ է: Այն հնարավորություն է տալիս նաև 3-4 օրվա ընթացքում լսել տարբեր երկրների, տարբեր լեզվի ու մշակույթի  ներկայացուցիչ մարդկանց: «Արմենպրես»-ի հաղորդմամբ՝ այս մասին մայիսի 2-ին կայացած ասուլիսին ասացին 15-րդ ամենամյա հոբելյանական փառատոնի մասնակիցներ Ռոման Վիկտյւկը, Բեսո Զանգուրին և Սուսաննա Բաղդասարյանը:

«Մենք այստեղ ենք եկել շատ հետաքրքիր ներկայացմամբ: Հանդես եմ գալու հոգեբանական ներկայացման մեջ: Քանի որ բոլոր կովկասցիներս էմոցիոնալ առումով նման ենք իրար, այդ պատճառով՝ հուսով եմ, որ լավ արձագանքի կարժանանամ իմ խաղով: Ոչ միայն Վրաստանում, այլև ամբողջ աշխարհում այս ներկայացումը լավ է ընդունվում: Հավանաբար, այն հետաքրքիր է նաև այն պատճառով, որ տղամարդն է մարմնավորում կնոջ կերպարը»,-ասաց Շ. Ռուսթավելու անվան ազգային թատրոնի առաջատար դերասան Բեսո Զանգուրին:

Կնոջ կերպար կերտելու դժվարության մասին դերասանն ասաց, որ  բեմն այն վայրն է, որտեղ պետք է տեղի ունենա կախարդանք՝ անկախ նրանից այնտեղ կկանգնի կին, թե տղամարդ: Կարևորը՝ դերը ճիշտ կատարվի և հասնի հանդիսատեսին: 

Ֆրանսիայից եկած դերասանուհի Սուսաննա Բաղդասարյան-Ֆլեյսը փառատոնին մասնակցում է  «Տրիումֆ» ծրագրով: Այս ծրագրով հանդես գալը նշանակում է, որ ներկայացումը նախորդ անգամ ունեցել է հաջողություն, և դերասանին հնարավորություն է տրվել կրկին մասնակցել փառատոնին՝ նույն ներկայացմամբ:

«Անցյալ տարի, «Արմմոնո»-ի շրջանակում, կայացավ իմ հեղինակային պիեսի պրեմիերան: Ներկայացումը հաջողություն ունեցավ, և անմիջապես հրավիրվեց մի քանի արտասահմանյան երկրներ: Բայց ինձ համար առաջին տեղում Հայաստանն ու Հայաստանի հանդիսատեսն է»,- ասաց Սուսաննա Բաղդասարյան-Ֆլեյսը և նշեց, որ Հայաստանի հաջողությունն է ծնել  արտասահմանյան երկրներում ունեցած հաջողությունը: Դերասանուհին հիշեցրեց նաև, որ իր հեղինակային պիեսն այսօր 17:00-ին կներկայացնի Երևանի Պատանի հանդիսատեսի թատրոնում:

«Մենք շատ քաղաքներ ենք գնում՝ ներկայացումների և միշտ ցուցադրում ենք այն, ինչից հետո մարդիկ ասում են՝ սա կախարդանք էր: Այս ներկայացվելիք գործը ստեղծված է հատուկ  «Արմմոնո» փառատոնի համար: Լինելու է պրեմիերա: Այսօր ժամը 19:00-ին ռոմանտիկ ներկայացմամբ հանդես կգամ Երևանի պետական տիկնիկային թատրոնում»,-ասաց ՌԴ վաստակավոր արտիստ, Ռոման Վիկտյուկի թատրոնի առաջատար դերասան Դմիտրի Բոզինը և նշեց, որ շատ ուրախ է փառատոնին մասնակցելու համար, արդեն հասցրել է դիտել երեք ներկայացում, որոնք դիպել են իր սրտին: