Տիգրան Համասյանը երաժշտասերներին կմատուցի իր նոր ստեղծագործությունները

Ջազ-դաշնակահար, բազմաթիվ մրցույթների հաղթող Տիգրան Համասյանը մենահամերգներով հանդես կգա հայ երաժշտասերների համար: Համերգները կկայանան  մայիսի 7-ին և 8-ին` Արամ Խաչատրյան համերգասրահում: Այս և ապագա ծրագրերի մասին դաշնակահարը զրուցեց մայիսի 5-ին՝ լրագրողների հետ հանդիպմանը:

«Հնչելու են իմ նոր «An ancient observer» խորագրով ձայնասկավառակում տեղ գտած ստեղծագործությունները: Ալբոմում զետեղվել են վերջին չորս տարվա ընթացքում ստեղծված գործերը: Այն թողարկվել է մարտի 31-ին»,-«Արմենպրես»-ի հաղորդմամբ՝ նշեց դաշնակահարը և հավելեց, որ ամեն անգամ Հայաստանում համերգ տալիս մեծ էներգիա է ծախսում, քանի որ պատասխանատու է իրեն զգում հայրենակիցների առաջ:

Երաժշտի խոսքով` ինքը պատրաստվում է էտյուդների նոր շարք գրել, որը   հիմնված կլինի բացառապես ժողովրդական պարզ մեղեդիների վրա, որոնք ռիթմիկ և հետաքրքիր կլինեն:

«Ժողովրդական և հոգևոր երգերի մշակումներ անելիս անհրաժեշտ է դրանք լավ ուսումնասիրել, հասկանալ և հիմնավորված մոտեցումներով մատուցել, հակառակ դեպքում քեզ չեն ընկալի»,-ասաց Համասյանը: 

Ըստ նրա`արտասահմանում հայկական ժողովրդական մեղեդիներն ընկալվում են որպես էկզոտիկա, իսկ հայրենիքում հանդիսատեսը  գեղագիտական հաճույք է ստանում դրանցից:

Անդրադառնալով Հայաստանում ջազ երաժշտությանը` նա ընդգծեց, որ չկա մրցակցություն, քիչ են երաժիշտները և երաժշտության քննադատները, հավանաբար դա է պատճառներից մեկը, որ իր ներկայացրած գործերը գրեթե  չեն քննադատվում:

Մինչ 2018 թվականի ավարտը Տիգրան Համասյանը մենահամերգներով հանդես կգա  Ժնևում,  Մոսկվայում, Ճապոնիայում, Ավստրալիայում և այլ երկրներում:

Տիգրան Համասյանը ծնվել է 1987 թվականին Գյումրիում։ Մանկուց սիրել է երաժշտությունը։ Երաժշտական գործիքները նրան ավելի են գերել, քան խաղալիքները։ Յոթ տարեկանում ավելի խորն է արտահայտվում նրա սերը ջազի նկատմամբ, իսկ կարևորագույն զբաղմունքներից մեկը դառնում է վերոնշյալ երաժշտությունը լսելը։ Հոգեհարազատ ելևէջներով ջազին ժամեր հատկացնելով՝ գտնում է նոտաներ ու հետագայում լրջորեն զբաղվում այս երաժշտությամբ։ Փառատոններից մեկի ժամանակ ֆրանսիացի դաշնակահար Ստեփան Կոչոյանը, տպավորվելով տղայի հրաշալի նվագով, նրան հրավիրում է Ֆրանսիա՝ մասնակցելու տարբեր համերգների։ Երիտասարդ դաշնակահարը շարունակում է ստեղծագործել ինչպես հայրենիքում, այնպես էլ՝ արտասահմանում: