Իշխանաձորում ազատամարտիկների նոր թաղամասն ընդլայնվում է

Արցախի հարավում Քաշաթաղի շրջանի հարավային Իշխանաձոր գյուղը Հակարիի միջին հոսանքում է՝ ընկած  Բերձոր-Կովսական, Որոտան-Հադրութ խաչմերուկում: Վերջերս աշխատանքային այցով Իշխանաձորում էի, որտեղ իրականանում են շինարարական, գյուղատնտեսական և այլ աշխատանքներ: Այցիս պահին այստեղ էին հարևան Երիցվանք, Արծվաշեն, Գետամեջ, Քաշունիք, Այգեկ և այլ համայնքների ղեկա վարները, ովքեր եկել էին ԱՀ կառավարության կողմից հատկացված շինանյութն ստանալու: Շրջվարչակազմի ղեկավար Սուրեն Խաչատրյանը տեղեկացրեց, որ բնակչությանը կառավարության կողմից անհատույց հատկացվել է շինանյութ, և համայնքների ղեկավարները եկել են տեղափոխելու և բաժանելու կարիքավոր բնակիչներին: Շրջվարչակազմի աշխատակազմի քաղաքաշինության և ճարտարապետության բաժնի վարիչ Հովհաննես Հակոբյանն անձամբ էր իրականացնում հատկացումները: Նա տեղեկացրեց բնակիչներին, որ հիմնականում տրամադրվում է տանիքի շինանյութ՝ փայտեղեն և թիթեղ:

«Արմենպրես»-ի հաղորդմամբ, Իշխանաձորում բնակություն են հաստատել մեր հայրենակիցները նաև Սիրիայից ու Լիբանանից: Հովակիմ Գիքեյանն այստեղ սննդի կետ է բացել, նաև՝ բենզալցակայան: Ուրախ է, որ արդեն հայրենիքում է բնակվում ընտանիքով: Նրա երազանքն էր, որ Հայաստանում հող ունենար, տուն կառուցեր; Այժմ երազանքն իրականություն է դարձել:

Անճարից հայրենիք է եկել նաև Դանիել Ջամբազյանը, ով զբաղվում է հողագործությամբ: Օգոստոսին նաև 4 եղբայրներն են ընտանիքներով գալու հիմնական մնալու նպատակով:

Հովհ. Թումանյանի անվան միջնակարգ դպրոցում աշակերտների մասնակցությամբ կայացավ տոնական միջոցառում՝ նվիրված աշխատավորների միջազգային օրվան: Ներկա էին շրջվարչակազմի ղեկավար Սուրեն Խաչատրյանը, աշխատակազմի ղեկավար Դավիթ Դավթյանը, համայնքի ղեկավար Արսեն Թելունցը, ուսուցիչներ, ծնողներ, հյուրեր: Աշակերտները հանդես եկան ռազմահայրենասիրական երգերով, պարով, ասմունքով: Դպրոցի տնօրեն Նազելի Եղիկյանը տեղեկացրեց, որ տարեցտարի աշակերտների թիվն ավելանում է: Այժմ 11 համակարգ դասարանում սովորում են 55-ից ավելի աշակերտ: Դպրոցական եռհարկանի շենքը, նա խատեսված է, այս ամռանը կնորոգվի: Դպրոցն ունի գրադարան, որից օգտվում են նաև գյուղի և հարևան բնակավայրերի բնակիչները:

Ռազմագիտության ուսուցիչ Աշոտ Հարությունյանն անցած տարվա սեպտեմբերից է աշխատում դպրոցում: Ծառայել է սահմանապահ զորքերում, ուսանում է ՀՀ ագրարային համալսարանի Ստեփանակերտի մասնաճյուղի 4-րդ կուրսում: Անցած տարի մասնակցել է ապրիլյան պատերազմական իրադարձություններին; Լավ գիտե՝ ինչ է նշանակում բնակվել սահմանամերձ տարածքներում, և ռազմագիտություն է սովորեցնում իր սաներին: Իշխանաձորում՝ Ազատամարտիկների թաղամասում, արդեն 2 ամիս ու ավելի է, ինչ 11 առանձնատուն է կառուցվում «Քաշաթաղ» բարեգործական հիմնադրամի կողմից:  Շինհրապարակում վ արպետները վերանորոգում էին առանձնատների տանիքները, կառուցվում է նաև հրապարակ՝ երկու մասով՝ մանկական խաղահրապարակ և մարզադաշտ: Հրապարակի ֆինանսավորումն ապահովում է «Հայրենասեր» բարեգործական կազմակերպությունը:

Անցած տարի Իշխանաձորում շահագործման հանձնվեցին 10 բնակելի առանձնատուն և 8 բնակարանանոց շենք: Ազատամարտիկների նոր թաղամասն արդեն ընդլայնվում է: Շինարարության աշխատանքները կազմակերպում է համայնքի ղեկավար Ա. Թելունցը; Ասաց՝ 11 առանձնատները կառուցելուց հետո ևս 20 մնան տուն կկառուցվի: Թաղամասի բնակիչների համար նաև զբաղմունքի կենտրոն է կառուցվում: Գարնանային այս օրերին տարածքի բոլոր բնակավայրերում բնակչության հիմնական զբաղմունքը հողագործությունն է՝ գարնանացանը: 

Զոհրաբ Ըռքոյան